THE GODFATHER
By Mario Puzo
Letlingtu :Lallawmawma (Loma Hmar)
Bu I
Then 5
Los Angeles-a thlawhna a tum chuan khua a la thim a. Hagen chu Hotelah a innghata, a
inbualin a inziat fai a, chu khawpuia khua rawn var mek chu a thlir ta a. Tukhthuan leh
chanchinbu chu a rooma thawn chho turin a chah a, Jack woltz nena an inhmuh hun tur zing dar
10 nghakin a chawl ta veng veng a. Appointment siam chu rin ai takin a lo awl a. A hma ni khan
Hagen chuan Movie siamna lama hnathawktu pawl zinga thil ti thei ber, mipakhat a hming Billy
Goff chu a call a. Don Corleone hnen atanga thu hmu a ni tih sawiin a tuka Jack Woltz-a Hagenan a hmuh theih nana ruahmanna siam tura Jack Woltz chu be tura hrilhin, an inhmuhnain Hagen
chu a tilungawi lo a nih chuan Movie Studio-ah chuan hnathawktute nawrhna a thleng maithei
tih Jack Woltz chu hrilh turin a ti a. Darkar khat hnuah chuan Hagen chuan Goff phone call chu a
dawng ta a. Appointment chu zing dar 10-ah a ni ang a. Woltz chuan hnathawktute nawrh
maitheih thu thuchah chu a dawng ngei a, mahse a ngaihsak tehchiam lo. Goff chuan, “Chu chu a
lo tul ta a nih chuan, keimah ngeiin Don chu ka biak phawt a ngai ang.” a ti a.
“Chutiang a nih chuan, a lo be mai ang che.” Hagen chuan a ti a ni. Chutianga a tih chuan
thutiam tur a pumpelh a ni. Don duh dan Goff-an a remti mai chu mak a ti lem lo. Chhungkaw lal
ram chu New York pawn lamah zauh la ni chiah lo mah se, Don chuan hnthawktu pawl hruaitute
chu a lo puih tawh thin a vangin tih theih a nei hman tawh tho a. An zinga mi tam tak chuan
inthianthatna avangin Don lakah bat an nei a ni.
Mahse zing dar 10-a appointment awm chu a fuh lo tlat. Chumi awmzia chu appointment
list-a hmasa ber a ni a, chawchhun ei tura sawm a ni dawn lo bawk. A awmzia chu Woltz chuan
a ngaipawimawh tawk lo a ni. Woltz chuan suma a tham ruk thin avangin Goff chuan a sawithaih
na vak lo pawh a ni maithei e. A chang chuan Don chuan a hlawhtlinnaah chuan chhungkaw
sumdawnna lam thatna turin a hming langsar tur hi a thup deuh thin a. Chutiangah chuan a
hming khan awmzia a nei ta thin lo a ni.
A lo thlir lawkna kha a dik a ni tih a lo lang ta a. Inhmuhna tur hun darkar chanvea a pelh
thleng chuan Woltz chuan a innghah tir a. Hagen chuan pawi a ti chuang lem lo. Reception room
chu a ropuiin a nuam hle a, a awmna ep chiaha thutna dup sendukah chuan Hagena naupang
hmuh tawh zinga hmeltha ber chu a thu a. Kum 11 emaw 12 emaw aia upa chu a ni lo vang.
Puitling thawmhnaw hak ang man to tak, mahse simple deuh si a inbel a. A sam chu rangkachak
rawng niin a mit chu tuifinriat ang maiin a pawl riai a, a hmui a sen no chek bawk. A nu ni ngei
tur hi a bulah chuan a awm a, ani chuan Hagen chu chaldelh hmel zet hian a rawn melh a, a
hmaia va ben chawrh a chak hle.
Angel naupang leh a nu Dragon ang mai, tiin Hagen chuan a ngaihtuah a. Chu nu
mitmeng rum tak chu a lo melh let ve a.
A tawp a tawpah chuan hmeichhe thau lam inchei nalh zet, la valai tak hian office intlar
phei thluah kaltlangin producer Office lam pan chuan a hruai ta a. Chung office-te mawina leh a
chhunga hnathawka awmte chuan Hagen chu a hip hle a. A nui sak a. An vai chuan remhre taka
office hna atanga tana Movie lama intahluh tum an ni a. A tam zawk hi chu an damchhungin he
office-ah hian an thawk anga a nih loh chuan beidawngin anmahni khaw lamah an haw leh
hlawm dawn a ni.
Jack Woltz chu pa sang tak, pian tha tak a ni a. A dul kiar zet chu a suit thui nalh zet
chuan a thup bo lek lek a ni. Hagen chuan a chanchin chu a hrechiang hle. Kum sawm a nihin
beer tin ruakte tawlaia nawrin khawchhak lamah a inhlawh thin a. kum 20 a nih chuan a pa puiin
thawmhnaw siamna lamah rim takin a thawk bawk. Kum 30 mi a nihin a New York chhuahsanin
khawthlang lamah a kal a, Nickeledon & Pioneered Motion Pictures-ah sum thawh vein kum 40
a nih meuh chuan Hollywood-a Movie lama mihausa tawntaw a ni chho ta a, tawngkam thlahdah
tak, lerh zet niin, Chinghne koham tak angin tleirawl rual zingah a vakvel ta thin a ni. Kum 50
mi a nih chuan a inthlakthleng ta hlawk a. Thusawi zirna a nei a. English chhiahhlawh hnen
atangin inchei dan a zir a, nungchang tha a zir tel bawk. A nupui hmasa a thih chuan Khawvel
huapa hmingthang lemchan thiam hmeltha zet, lemchan lam chawlhsan ta nen an innei leh a.
Tuna Kum 60 mi a nih hian lemziak hlui te khawn khawmin, President’s Advisory Committeeah member a ni a. Movie siamna lama kut themthiamna chawisanna lam Foundation Dollar
maktaduaih tam tak len velna chu a din bawk a. A fanu chuan English Lord pasalah a nei a, a
fapa chuan Italian lal fanu a nei bawk.
America-a Movie lam chanchinthar ziaktute zawng zawngin an ziah dan chuan, tunhnaia
a tuichilh ber chu a sakawr In, kum kal taa cheng maktaduaih zet a senna chu a ni. English
sakawr tha hmingthang zet mai Khartoum chu cheng sing sawmruk laia a lei leh, chu
intlansiaknaa hnehtu la tawng lo sakawr chuan intlansiakna lam bansanin chi thlahtu atan a
sakawr inah a chawl hahdam dawn a ni tih a puan chuan chanchinbu tin phek hma ber a chang
chiang hle a ni.
Hagen chu hawihhawm takin a lo dawngsawng a, A hmel tha tak, nisa em uk kharh leh
fai taka ziahah chuan a nui nia ngaih theih turin a then sang a. Pawisa tam tak sen ral a, tunlai
thiamna sang ber ber hmanga enkawl a ni chungin kum 60 mi a nihna a lang tho a ni. A hmai chu
thui khawm ang maiin a lang zur tap a. A chet vel chuan mipawimawh elkhen a nihna a lang thei
a. Donin a neih ang, a chenna khawvel thunun hneh ngawih ngawihna ang kha a nei ve a ni.
Hagen chuan a kal chhanah chu sawi nghalin, Johnny Fontane-a thian tana palai hna
thawk tura lo kal a nih thu chu a sawi a. He a thian hi thiltithei tak a ni a, Mr.Woltz chuan a thil
duh tetham tak chu a tihsak chuan a lawmna leh inthianthatna tawp ngai lo chu Mr.Woltz lakah
chuan a tiam a ni. Chu a thil duh chu kar leh maia Studio-in an siam tan tur indo filma a
changtupa atana Johnny Fontane hman chu a ni.
A hmai zur tap chu a che chang miah lo a, hawihhawm mah mah hian, “I thian chuan eng
thil nge min tihsak ve ang?” tiin Woltz chuan a zawt a. A awah chuan inphahhniam derna tak hi
a lang thei a.
Hagen chuan chu inphahhniam derna aw chu haiderin, “Hnathawktute nen buaina in nei
niawmin a lang a. ka thian chuan chu buaina chu a tireh hmak thei a ni. I studio tana pawisa
hailut tam thei tak Star lar tak i nei a, mahse ani chuan Marijuana atangin Heroin-ah a kaisang
tawh a ni. Ka thian chuan i Star tha ber chuan Heroin a khawih leh tawh lo ang tih a tiam che a.
Kum lo kal leh zel turah pawh thil thleng a awm a nih chuan i vawikhat rawn call chuan harsatna
a tikiang mai dawn a ni.”
Naupangin insawithei taka a thil sawi a ngaihthlak sak ang maiin Jack Woltz chuan a lo
ngaithla a. “Min nawr luih i tum tihna em ni?” a ti hrawk a.
Hagen chuan, “Teuh lo mai, Thiante tan thil ka rawn dil mai a ni. Engmah i hloh chuang
lo tih rawn sawifiah ka tum mai a ni.”
A duh vang reng emaw tih mai turin, Woltz hmelah chuan thinrimna a lo lang a. Hagen
lamah chuan a awn phei deuh a, “Awle, nang uihur fapa, i tan leh i boss, a tua pawh chu lo ni se,
ka han hrilh ang che, Johnny Fontane chuan kha Movie kha a chang ngai lo vang. Mafia hotu
thing zet zet engzat pawh lo chhuak se pawi ka ti lo.” A han thu ngil a, “Thurawn ka han pe ang
che, ka thian. Edgar J.Hoover, i lo hre tawh phawt ang a”- Woltz chu za lo zetin a nui a- “kha ka
thian tha tak a ni a, nawr luih ka ni tih ka hriattir hlauh a nih chuan. Nangni ho hian engin nge
deng che u tih pawh in hre hman lo vang.” a ti a.
Hagen chuan dawhthei takin a lo ngaithla a. Woltz te ang dinhmun atang chuan chu aia
nasa zawk chu a lo beisei a. Hetiang atthlak taka khawsa mi hi Dollar maktaduaih za hen
Company hotu a ni thei a maw? Don chuan pawisa dahkhamna tur thil thar a ngaihtuah a nih
chuan chu chu hriateng tur a ni; he industry-a an thluak bur ber berte pawh hetiang michhaw an
nih chuan, Movies lam chu a ngaihtuah chi khawp ang. Kha tawng khumna khan a tibuai lem
lova. Hagen chuan Don hnen atangin inbiakrem dan kalhmang chu a zir tawh tlat a ni. “Thinrim
ngai suh ang che.” tiin Don chuan a hrilh a, “Vauna hmang bawk suh la, rilru fim takin ngaihtuah
ang che.” ‘Rilru fim’ tih chu italian chuan a fiah deuh zawk a Ragione- zawmpui tihna lam a
kawk deuh. He inbiakrem dan thiamnaah hi chuan Hmuhsitna te, vauna te haider a, biang lehlam
pawh dawh a ngai hial thin.
Inbiakna dawhkanah Don darkar riat chhung zet vauna te, hmuhsitnate dawng chunga a
thu lai Hagen hian a lo hmu tawh a, mi chak tak pakhat, tawrawt leh chapo zet mai hmin a tum a
ni. Darkar riat a ral hnuah chuan Don chuan a ngaihna hre tawh lo ni awm takin a kut a han phar
a. chu dawhkana thu ve dang hnenah chuan, “Tumahin hepa nen hi chuan thil an ngaihtuah ho
thei lo vang.” tih pahin room atang chuan a kal chhuak ta a. Chu pa chaka chu hlauhna avangin a
dang var pap a. Palai tirin Don chu roomah hruai luh leh a ni a, inremna chu neih a ni ta a ni.
Mahse thlahnih hnuah chuan chu pa chaka chu a luhmehna dawr ngainat berah kahhlum a ni ta a
ni.
Tichuan Hagen chuan a han sawi tan leh ta a. Aw pangngai thei ang berin, “Ka card hi en
la.” a ti a, “Dan hremi ka ni a. Ka rawn inrawlh thuk lutuk em ni? Vauna thu kam khat pawh ka
chhakchhuak em ni? Johnny Fontane-a kha Movie-a a luh theihna tur chuan i sawi ang apiang
pawm thei turin ka rawn inbuatsaih a. Mahse he thil te tham lek tan hi chuan ka phal rai ropui
tawk viau tawhin ka hria. Johnny chuan a part turah khan amah chu a tha ber tih i pawm tih a
sawi a. Chutiang a nih loh chuan he thil hi dil i ni lo ang tih ka sawi duh bawk. I sum dahkhamah
buaina i nei palh a nih pawhin. Ka Client chuan chu Movie sum chu tum a inhuam a ni. Mahse
chiang takin ka han sawi ang e. Aih i tih chu aih a ni tawp tih ka hrethiam a. Tumahin an nawr
lui che emaw nawr luih che an tum emaw thei lo. Mr.Hoover nena in inthianthatna pawh kan hria
e, Ka boss chuan chu chu a zah khawp mai tih kan sawi belh ang e. In inlaichinna chu a zah
takzet a ni. ”
Chumi chhung zawng chuan Woltz chuan ngaihsak lo zetin pen a lo khal mai mai a.
Pawisa chungchang sawi a nih veleh a ngaihven ta deuh a. “He Movie budget hi dollar
maktaduaih nga lai a ni.” inphahhnuai der takin a han ti a.
Hagen chu a rilru dek hle niawm takin a faifuk raih a. “Ka boss chuan a ngaihdan
tawmpui thei mai tur mi thian tam tak a nei a.”
A vawikhat nan Woltz chuan chu thil chu a la thutak ve tan ta a ni. Hagen-a card chu a
han en vang vang a, “Ka va hre ngai lo che ve.” a ti a. “New York-a dan hremi lian zual ho chu
ka hre vek a. mahse nang teh hrep hi tunge i nih?”
“Hna eng eng emaw chu ka khawih ve nual a,” Hagen chuan a ti a. “Thil pakhatah chauh
ka insawrbing ta a ni.” a tho a. “I hun ka la hek tawh lo ang” a kut a phar chhuak a, Woltz chuan
a lo chibai a. Kawngkhar lamah a kal zet hnuin a lo hawi let leh a.
“Mi tamtak an nihna ang aia lan pawimawh tum nen in lo inhmu tawh thin ang ka ring.
Mahse kei chu chu mi letling chiah chu a ni. Engvangin nge kan hriat dun kan thianpa kha i lo
zawh mai lo ang? i ngaihtuah tha leh duh a nih chuan. Ka awmna Hotel-ah i lo call mai dawn a
nia.” A han ngawi hlek a. “Hei hi bawlhhlawhah i ngai maithei, mahse Mr. Hoover-an a theih
phak bak nia a ngaihte pawh ka Client chuan i tan thil a ti thei a ni.”Chu producer pa meng zim
ta sawt chu a hmu a, a tawpah chuan thuchah chu a hrethiam ve ta e. “Taka, i film siamte ka
ngaina khawp mai.” Hagen chuan a theihtawpa thuhnuairawlh chungin, “He thil tha hi ti zel teh.
Kan ramin a mamawh a ni.”
Chumi tlai lamah chuan Hagen chuan Woltz Secretary hnen atangin Phone call a dawng
ta a. Darkar khat hnuah Woltz-a thingtlang ina zanriah ei turin carin a rawn lam dawn a ni.
Darkar thum lai tlan ni mahse carah chuan bar leh mamawh lamna thil dang pawh a awm thu a
rawn sawi bawk a. Woltz chu a mimal thlawhnain a kal thung ang a, engvanga thlawhnaa kal
tura sawm zawk lo nge a nih ang le? Secetary aw chuan a sawi belh leh a, “Mr.Woltz chuan
zanriak tura rawn inpeih turin a duh che a, zing lamah airportah a va thlah dawn che a ni.”
“Ka lo ti ang e.” Hagen chuan a ti a. Chu chu ngaihtuah ngai dang a ni leh ta. Eng tin nge
Woltz chuan zing lamah New York a pan dawn tih a hriat theih? A han ngaihtuah vang vang a.
Ni thei ta ber nia lang chu Woltz chuan amah zui rua thil pawimawh awm thei ang zawng
zawng hre turin Private Detective a ruai a ni. Chuti a nih chuan Woltz chuan Don tana ding a ni
tih a hre tawh ngei ang a, chu mi awmzia chu Don chanchin pawh a lo hre tawh ang a, tunah
chuan thil a la thutak viau tawh ang chu. Chu bakah thil eng emaw tih a ngai bawk ang a, tiin
hagen chuan a ngaihtuah a, tukina a lan ang ai ngawt kha chuan Woltz hi a lo fing viau thei bawk
a ni.
*****
Jack Woltz-a in chu filma kulh mawi tak kan hmuh ang hi a ni hawt a. Thing phun chawp
kara kulh, tual zawl zau tha tak mai te leh Sakawr In leh a vela hnim peh tur tha tak tak awm te
chu a awm a. Kawldai leh pangpar hmun te, hnim awm te reng reng chu film star lar tak
kutzungtin ang maia uluk taka enkawl a ni a.
Woltz chuan Hagen chu bathlarah chuan a lo lawm a. bathlar pawh chu Air-condition vek
niin darthlalang banga kual chhuah vek a ni bawk. Producer chu duhdah deuh takin silk kawr
dumpawl leh chhawhchhi buhpawlh rawng kekawr tlawn a ha a. Savun chapal nem chi a bun
bawk a. Chung a incheina leh rawng vel avang chuan a hmai zur tap leh vawt ruih chu a phawk
hrain a lang a. Hagen chu Martini no lian zet a lo pe a, amah pawh chuan a dang a dawm ve
nghal a. Chawhma lam ai kha chuan a nelawm tawh hle a ni. Hagena dara kuah pah chuan,
“Zanriah kil hmain hun tlem te kan la nei a, ka sakawrte va en ang hmiang.” a ti a. Sakawr In
pana an kal lai chuan, “I chanchin chu ka lo chhui a ni, Tom. I boss chu Corleone a ni tih min
hrilh tur che a nia. Johnny-an keimah min bum nana bumhmang satliah a rawih mai mai ni turah
ka ngai che a. Ka lo ngaihsak lem lo a ni. Hmelma siam ka duh vang a ni lo va, hetiang lam hi
chu ka ring lem lo. Mahse tunah chuan hlim takin i awm teh ang. Hna thil chu chaw ei zawhah
kan sawi dun dawn nia.”
Mak tak maiin Woltz chu a mikhualte ngaihsak mi tak mai a ni a. A tih dan thar, chin dan
thar chu sawifiahin a sakawr in chu America rama hlawhtling bera siam a beisei a. Sakawr in chu
kangmei laka him tura duan a ni a. Thianghlim thei ang bera vawn a niin, Private Detective-in
uluk taka a duan hmanga venhimna pawh kalpui a ni. A tawpah chuan sakawr in te deuh bul an
va thleng a, chu mi bang pawn lamah chuan thirphek lian takah hian chhinchhiahna a intar a.
“Khartoum” tih hi a inziak a.
Chumi chhunga sakawr chu Hagena, hetiang lam hre lo tak mitah takngial pawh chuan
mawi chungchuang tak a ni a. A chalh arh hlai taka lunghlu pianhmang anga var pap tih loh a
taksa dang zawng chu a dum tak hlarh a ni a. A mit buang thak, apple tiat zet chu a tle sur a.
Woltz chuan chhuang takin, “Khawvela sakawr intlansiaknaa hman chi ropui ber a nih hi. Nikum
khan England-ah Dollar nuaihkhat laiin ka lei a ni. Russia mi Czar meuh pawhin sakawr pakhat
manah chutiang zat chu a hmang ngam lovang ka ti ngam sak. Mahse intlansiaknaah ka tel tir
dawn lo. Chithlah turin ka dah dawn a ni. He ramin a hriat theih tirh ata Sakawr intlansiak chi
vulhna hmun ropui ber ka siam dawn a ni.” a ti a.
Sakawr tuang chhah lai chu zutin, “Khartoum, Khartoum” tiin a ko a. A awah chuan a
duh takzet tih a lang thei. Sakawr pawh chuan a lo chhawn ve buk buk a. Woltz chuan, “Sakawr
pu tha tak ka ni asin.” a ti a, “Mahse kum 50 mi ka nihin a chungah ka chuang tan chauh a ni.” a
ti a, a nui hawk hawk a.
“Cossack(Russia rama sakawr chungchuang sipai) hovin Russia rama ka pite ho an
pawngsual anga an thisen ka kai ve a ni maithei a ni.”
Khartoum-a dul vel chu a chul a, ngaina takzet tih hriat deuhin,“A sazu hi han en teh,
hetiang sazu hi han nei ve mai ila chuh.”
Inah chuan zanriah ei turin an kir leh ta a. An ei chhung chuan chhiahhlawh pathumin an
vil reng a. Table pawh chu rangkachak leh silver hmanga cheimawi a ni a. Mahse ei tur thung
chu a pangngai satliah mai a ni thung. Woltz chu a mah chauha khawsa a ni a, eitur lam a
ngaihtuah tehchiam lo tih a chiang hle a ni. Havana Cigar an tana an zuk vang vang thleng chuan
Hagen chuan a ngaichang a. A tawpah chuan, “Johnny chuan a chang dawn nge dawn lo?” tiin a
zawt ta tawp a.
“Ka thei lo a ni.” Woltz chuan a ti a. “Duh pawh ni ila Johhny-a chu ka dah thei tlat lo. A
changtu tur zawng zawng tan contract sign vek a ni tawh a. kar leh atangin shooting neih tan a ni
dawn a ni. Ka tihdanglam theih a ni tawh lo a ni.”
Hagen chuan dawhtheih lo zetin, “Mr.Woltz, dinhmun sang bera awm mite nena inbiak
hlawkna chu, khatiang chhuanlam kha pawm theih a ni tlat lo a ni. I duh ang apiang i ti thei
alawm.” A sikret chu a han fawp a. “Ka client chuan a thutiam kha a hlen theih loh i hlau em
ni?”
Woltz chuan ro halhin, “Hnathawktu te nen harsatna kan nei ang tih chu ka ring alawm.
Goff khan chu mi chungchangah chuan min rawn call a ni, kha zawng sen pa kha. Kum tinin
dollar nuaihkhat puanhnuaiah ka pe thin tih hre lo ang maiin a rawn tawng vel a. Chubakah kha
Star kha Heroin chu in nghei tir thei ang tih ka ring bawk a, mahse ka ngaihsak tehchiam lo. Tin,
Ka film siam tur chu pawisa ka intum thei bawk e. A chhan chu kha Fontane sawn chhepa kha ka
hua a ni. I boss hnenah chuan hrilh la, he thil hi chu ka ti thei lo vang, mahse thil dangah chuan
min ring thei ang, thil engkimah a ni mai.”
Nang sawn tenawm pa, tiin Hagen chuan a ngaihtuah a, eng vang teh hrepa he tiang
thleng thleng min hruai si nge i nih? He Producer hian eng emaw ngaihtuah chu a nei a ni. Hagen
chuan vawt raihin, “Thil awm dan i hrethiam lo a ni. Mr.Corleone hi Johnny Fontane-a
Godfather a ni asin. Chu mi awmzia chu inlaichinna nghet tak, sakhaw thianghlim hmanga
inlaichinna a ni.” Sakhaw thil a swi lan avanga zahna lantir nan Woltz chu a lo kun ngaih a.
Hagen chuan sawi zawmin, “Italian ho chuan fiamthu ho te an nei a, Khawvel hi a khirhkhan em
avangin mihring chuan amah enkawl tur pa pahnih a neih a ngai a ni, an ti. Chuvang chuan
Godfather an nei thin a ni.
Johnny-a pa boral atang kha chuan, Mr.Corleone chuan mawhphurhna chu thuk zawkin a
la ta a. Mr.Corleone hi rilru na hma tak a ni a, a thil dil hmasak hnawl a nih tawh chuan a
pahnihna a awm tawh lo ang.”
Woltz chuan a dar a chhin ak a, “Pawi ka ti khawp mai. A chhanna chu aih a la ni reng.
Mahse heta i awm tak rau rauah chuan, Hnathawktu te buaina ching fel tur khan engzat nge ka
hman ngai ang? a pawisain, tunah min han hrilh teh.”
Chu chuan Hagena harsatna pakhat chu a tikiang ta phawt a ni. Movie-a Johnny-a chang
lo tura thu a tih tluk vek tawh hnuah engvanga inhmuh nana heti chen hun la pe tlat nge a nih
ang? Tuna an inbiakna hian a ti danglam tawh awm chuang si lo a. Woltz chuan him hlein a
inhria a; Don Corleone-a thiltihtheihna a hlau lem lo a ni. Politic lama zawmpui a neihna te, FBI
chief nena an inthian thatna avangte, a vanneihna leh Film Industry lama thiltithei tak a nih
avang te chuan Woltz chuan Don lakah derthawng niin a inngai lo a ni. Mi thil thlir zau tak tan
chuan, Hagen takngial tan pawh, Woltz dinhmun chu nghet tak niin a lang tlat a ni.
Hnathawktute buaina-a a sum senral tur zawng zawng chu hloh a inhuam a nih chuan Don tan
chuan tihchhiat theih loh niin a lang tlat. Mahse chu thil chhutnaah chuan dik lo pakhat a awm
tlat. Don Corleone chuan a Godson hnenah chu filmah chuan a chang ngei ang tih a tiam tawh a,
Don chuan, Hagen-a hriat theih chinah, chutiang thilah chuan a thutiam a bawhchhe ngai lo tlat a
ni.
“Min ngai sual der a ni.” Hagen chuan a ti a. “Thil inhnehchhuha thil dik lo tihpuitu
angah min siam i tum a. Mr.Corleone chuan a mah dawrtu tana i thil tihsak chu thiantha anga
rulh let nan che he hnathawktute buaina chinfel hi a tum mai chauh a ni. Thian tha
induhsaktawnna angin, a dang a awm lo. Min ngai thutak lo riau a ni. Ka ngaihdan chuan chu
chu i tihsual niin ka hria.”
Woltz chu, chutiang hun remchang chu a lo nghak reng ni awm takin, a thin tiur ta a, “Ka
hrethiam takzet a ni.” a ti a. “Chu chu Mafia tih dan a ni lo’mni? Nem tak leh no taka tawng
chunga invau hi a ni lo’mni? Chiang fakin ka han sawi ang e. Johhny Fontane chu he partah hian
a chang lo vang, hemi atan hian tha viau ni mah se. Star ropui takah a siam ngei tur chu a ni.
Mahse a ni dawn lo, a chhan chu kha naupang chimawma kha ka hua a ni. Film siamna atan hian
ka theh chhuak dawn a ni. A chhan ka hrilh ang che aw, ka thlazar hnuaia awm hmeichhe hlu tak
a tichhia asin. Kum nga chhung teh meuh he nula hi ka enkawlin zai te, lam te, lemchante a zir a.
Dollar nuaih chuang lai ka seng a ni. Star ropui taka siam tum ka ni a. Tlang takin ka han sawi
ange, mi khirh tak ka nih loh zia leh pawisa ringawt a nih loh zia i hriat nan. Kha nula kha a
hmelthain, he khawvela ka neih leh ka neih tawh zinga ropui ber a ni.
Tui Pump chhuahna ang tur turin a hip chhuak thei ngei ang che. Chutah Johnny chu a aw
nem tak leh mi hip theihna thing zet nen a lo lang a, nula chu a tlan bo ta a ni. Nuihzatbura min
siam tur ringawtin thil engkim kha a tithlawn zo ta vek a. Ka dinhmun anga ding tan chuan e,
Mr.Hagen, nuihzatbura awm chu a theih loh a ni. Chuvangin Johnny chu ka ban ngei a ngai ta a
ni.”
A vawikhatna atan Woltz chuan Hagen chu makti takin a siam a ni. Chutiang thil tethama
puitling than kin tawhin hna thila nghawng a neih tir chu a awihawm loh hial zawk. Hagen-a
khawvel, Don corleone-a khawvelah chuan Hmeichhe hmel mawinate, mipat hmeichhiatna
kawnga an zei leh zei lohte chuan hmun tereuhte pawh an chang phak lo. Chutiang chu mimal
thil a ni a, Chutiang anih loh chuan inneihna leh chhungkaw mualphona a ni mai. Hagen chuan
vawikhat beih leh hram a tum ta a.
“I dik chiah lawm Mr.Woltz,” Hagen chuan a ti a. “Mahse he thil tereuhte hi ka client,
Mr.Corleone tana a pawimawh zia i hrethiam lo ang. Nausen Johnny-an baptisma a chan laiin
Mr.Corleone hian a kutin a kuangkuah asin. Johnny-a pa a boral hian, Mr.Corleone chuan nu leh
pa nihna chu a koa innghat riakah a ngai nghal hmiah a ni. Ni e, mi tam takin an chunga a thil lo
tih tawhte avanga an lawm zia entir nan leh an zah zia lan tir nan ‘Godfather’ tiin an ko asin.
Mr.Corleone chuan a thiante chu a tithlawn ngai lo.”
Woltz chu a ding thut a. “Ka hre tam tawk tawh e. Misualin thu min pe ngai lo va, thupek
ka pe zawk thin. he phone hi ka la kang a nih chuan Jailah zanin hun hi i hman mai ang. Chu
Mafia misual hotu chuan chet rum a tum viau a nih chuan, Band leader ang mai mai kha ka ni lo
tih a hre mai ang. Ni e, kha chanchin kha ka hre ve asin. ngaithla teh, i pu Corleone-a chuan
engin nge deng tih pawh a hre hman lo palh ang e. White house lama ka tlaktlumna ka hmang a
nih phei chuan.” a ti a.
Mi mawl, zawngsen mawla leh, tiin Hagen chuan a ngaihtuah a. Engtin nge mipawimawh
tak, President thurawn petu, khawvela Studio lian ber hotu a nih theih le? tiin Hagen chuan mak
a ti hle. Film siamna lamah Don chu a inrawlh ve ngei tur a ni ang. Ha pa hian thuchah chu a
hrethiam tlat lo.
“Zanriah tui tak avang leh tlai hun nuam tak avang hian ka lawm e,” Hagen chuan a ti a.
“Airport panna tur lirthei min ngaihtuahsak thei ang em? Zan riah kher a ngaiin ka hre ta lo.”
vawt raihin a nui a, “Mr.Corleone chuan chanchin tha lo hi hriat vat a duh thin a.”
Pawn light eng hnuaia a chuanna tur nghaka a din lai chuan, Hagen chuan hmeichhe
pahnih, chhuahna kawnga limousine lo ding pan mek hi a hmu a. Woltz-a office-a a hmuh
hmeichhe naupang kum sawmpahnih mi hmeltha tak leh a nu kha an lo ni a. Mahse chu naupang
hmui nalh zet kha tunah chuan hnwihsen sennoa chhah taka hnawih a lo ni tawh a. A mit pawl
riai chu a dava riai a. Car khawngkhar inhawng sa lam pana a kal chuan a ke zen thlarh chuan a
zo lo ni awm takin, sakawr no nei zo hlim angin a kal tawi tawi a, a nu chuan lo puiin car-a a lut
tur chu a pui a, chumi pah chuan a beng bulah thupek a chhakchhuak zauh bawk. A nu chu rawn
inherin Hagen chu a rawn en zawk a, a mitmeng sa zetah chuan mupui ang maia hnehtu intihna a
lang thei. Amah pawh chu limousine chhung-ah chuan a pil bo ta daih a.
Kha vang kha a nih chiah kha, Los Angeles atanga thlawhnaa a kal ve loh nachhan, tiin
Hagen chuan a ngaihtuah a. Hmeichhe naupang leh a nu kha Movie Producer pa nen khan an zin
ho a ni a. Chu chuan Woltz chu zanriah kil hmaa chawlh hahdamna a pe a, kha naupang chungah
khan mipa hna a thawk ngei a ni. Chu khawvelah chuan Johnny chu chen a duh a maw?
Vanneihna chang mawlh teh se, Woltz pawh chuan.
****
Paulie Gatto chuan hna hmanhmawh thlak hi a haw hle, a bikin tharum thawhna a tel
dawn phei chuan. Ruahmanna siam lawk duh mi a ni. Zanina mi ang te hi, tlangval hawklak thu
mai mai mah ni se, tu emawin tihsual a neih vaih chuan thil serious takah a chang thei tlat. Tunah
chuan beer in chungin a hawi kual a, chung tlangval hawklak pahnihte hmeichhe vakvai pahnihte
nena Bar atanga chhuak mek te chu a mitmei reng a.
Paulie Gatto chuan chung tlangval pahnihte chanchin a hriat tur ang chu a hre vek tawh a.
An hming chu Jerry Wagner leh Kevin Moonan an ni a, kum 20 mi vel an niin, hmeltha tak, sam
buang thang leh dung sang, pian tha tak an ni. An pahnih chuan kar hnih hnu maia khawpawn
lama awm College zawm tur an ni a. An pate ve ve chu politics lama thiltithei tak an nih avangin
leh College zirlai an nihna avang chuan Sipaia luh pawh an pumpelh thei a ni. An pahnih chuan
Amerigo Bonasera fanu pawngsual thubuai avanga chhuah lailawk mek an ni a. Sawn chhe ho
chu, tiin Paulie Gatto chuan a ngaihtuah a, Sipai tan pumpelhin, an chhuah lailawkna chu
bawhchhiain zan lai thleng thlengin barah zu inin, mihur an um a. Tlangval hawklak tak hi chu.
Paulie Gatto pawh chu a sipai tanna tur tih khawtlai a ni a, a chhan chu Draft committee
hnenah doctor-in amah chu mi ngo kum 26, nupui la nei lo, rilru lam harsatna a tawh avanga
electric hmanga shock tawh, tia a report vang a ni. Chung zawng zawng chu a dik lo vek a,
Mahse Paulie chuan chu ngaihhnathiamna chu hlawh zo hlein a inhria. Paulie-an chhungkaw
sumdawnna-a, “thil tih that” a neih hnuah Clemenza-in chutiang chuan ruahmanna a siam a ni.
Tuna a hna tur hi chung naupangte college an luh hma ngeia tih zawh vat tur a ni tia hrilh
tu chu Clemenza hi a ni a. Eng vang teh hrepa New Yorkah kher tih ngai nge maw a nih le? tiin
Gatto chuan a ngaihtuah a.
Clemenza hian a hna tur chauh pe loin thupek dang belh a ching hle a, Heng hmeichhe
vakvai pahnihte hi an ruala an kal ve zel chuan zanin chu a thlawnin a luangral mai dawn a ni.
Hmeichhe pakhatin nui hawk hawk chunga ring taka, “I a ta em ni Jerry? Khawi carah
mah ka zui lut lo ang che. Kha hmeichhe khawngaihthlak tak ang khan Hospitala hun hman ka
duh chai hleinem.” a tih chu a hre thei a, a awah chuan lungawi hmel hliah hliahin a lang. Chu
chu Gatto tan chuan a tawk chauh, beer chu a in zo a, kawtthler thim takah chuan a chhuak ta a.
kawtthlera eng awmchhun chu Bar dang atanga eng lo chhuak chauh chu a ni. Dawr dang zawng
zawng chu an inkhar tawh a. Chulai vela police car vak vel thin chu Clemenza an a lo buaipui
daih tawh a, Radio atanga kohna an dawn hma chuan an lo kal lo ang a, chutah pawh
muangchangin an lo kal dawn a ni.
Car kawngkhar pali nei, Chevy Sedan ngheng chuan a ding a. A seat hnng lamah chuan
mi pahnih, palian zet zet mai chu hmuhtheih mang lohin an thu a, Paulie chuan, “An lo chhuah
hunah lo bei ang che u.” a ti a.
A thleng rang teh thut lutuk niin a la ngai fan a. Chung tlangvalte chanchin Police copy
chu Clemenza’n a pe a, chung tlangval pahnih chuan zantin zuin tur leh bar-a nula awmte
fawrpui turin an chhuak thin. Paulie chuan Chhungkaw zinga mi chak tak tak pahnih a thlang
chhuak a, chung tlangvalte chu a kawhhmuh a. Tih dan tur a hrilh bawk a ni. An lu chhipah leh
tukkhumah chuan khawih loh tur a ni a, Tihpalha thihna thlen thei a ni tlat. Chutiang bak chu an
duh dan hawi zawng apiangin a ni mai. tawngkam khat chiahin a vau lawk a, “Chung tlangval
pahnihte chu thlakhat ral hmaa Hospital atanga an chhuah chuan, Truck khalh hna thawk turin in
kir leh ang.”
Chung pa chak pahnihte chu car atang chuan an chhuak a. An pahnih chuan Boxer chawl
tawh, club tenau bak pel thei lo an ni a, sum inpuk tawn kual velna hmangin Sonny Corleone
chuan a la chhuak thei hlauh a, ei hmuhna tur an neih phah ta a ni. Dik tak chuan tunah pawh
hian an lawmzia han tih lan chu an chak zek zek a ni.
Jerry Wagner leh Kevin Moonan te lo chhuah hun chu a remchang takzet a ni. Bar-a
nulate chhaih fiamna khan an tleirawl chapona rilru a tinat lai tak a ni a. A car ngheng ar ar
chung chuan Paulie Gatto chuan nuihzat tih hriat deuh hian a lo au a, “Hey, Casanova, khang
nulate khan an va thingthla chiang che u ve.”
Tlangval pahnihte chu phur takin an rawn inher a. An thinrim hrikthlakna atan chuan
Paulie chu a tha zet mai, hmai tung rat mai, dungtawi leh sa pan lam deuh, indawrna lama fing
zet si chu. Phur zetin an bawh phei a, mahse hnung lam atangin an ban te chu mi pahnihin an
rawn vuan ta tlat a. Chu tih lai chuan Gatto chuan a kut dinglamah a bik taka siam Brass knucle,
thil zum 1/6 inch-a sei invuah fur chu a lo vuah mek a. Karkhata vawithum Gym-a kal thin a ni
bawk a, A chet hun chu a dik hle. Wagnera hnarah tak chuan a kuttum chuan a va deng dawt a.
Wagner-a vuantupa chuan chawikangin, Paulie chuan a han chho dawm leh siah a. Wagner chu a
zawi hnawk a, a vuantu chuan a thlah ta a. Chu mi hun chhung chu second ruk vel chauh a ni.
An pahnih chuan Kevin Moonan, au chhuah tum mek chu an hmachhawn leh ta a. A
hnung lama vuantu chuan awlsam takin a kut khat chauhin a vuan a, a kut dangin a au chhuah
theih loh nan a hrawkah a rek bawk a.
Paulie Gatto chu rang takin Carah chuan a lut ta vat a. Midang pahnih chuan Moonan chu
an sawi sa ta a, inngaihtuah harh hlau ni awm fahranin, he khawvela an hun neihchhun hmang ni
awm fahrana thahnemngaiin an tuk ta chawrh chawrh a. An kuttum chu a lo thlawnin an hmang
lo kher mai, chiai miah lovin, a hun dik chat chatah an hnek a, an taksa rihna zawng zawng nena
an hnek apiang chuan tisa a tithler hawk hawk zel a ni. Gatto chuan Moonan-a hmai chu a va
hmu zawr a, hriat hleitheih a ni tawh lo. Mi pahnihte chuan Moonan chu kawngsirah
hnutchhiahin Wagner lam chu an pan leh ta a.
Wagner chu din a lo tum mek a, tanpuitu kohin a au chhuak ta a, Bar atang chuan
thenkhat an rawn chhuak a, mi pahnihte pawh chu an hmanhmawh deuh a ngai ta a ni. Wagner
chu an thingthit tir a, pakhat zawk chuan a kut lain hnung lamah a herhsak a, chutah a hnungzang
thlurah chuan a tlawh ta chawrh a, ruh tliak ri rawp chu a hriat theih a. Wagner na ti lutuk a te tak
rawng rawng avangin tukverhte chu a rawn inhawng ta sup sup a. Mi pahnihte chu hmanhmawh
takin an che sawk sawk a. Pakhat zawk chuan Wagner chu kaithovin a luah nghet takin a vuan a.
Pakhat zawk chuan a kuttum hrawl zet chuan chu targetah tak chuan a lawk ta bur a. Bar atang
chuan mi an rawn chhuak tam ta deuh a, mahse tumahin rawn tihbuai an tum lo. Paulie Gatto
chuan, “Lo kal rawh u, a tawk tawh.” tiin a au a, pa lian pahnihte chu carah rang taka zuang
lutin, Paulie chu a dawk chhuak nghal zawk a. Tu emaw chuan car pianhmang chu chhinchhiahin
a liscence numberte pawh a lo hre maithei, mahse chu chuan thil pawi a thlen lo vang. California
Liscence plate hman a niin chu pawh chu ruk a ni a, chubakah New Yorkah hian Chevy Sedan
car dum nuaih chuang lai a awm bawk.
inbualin a inziat fai a, chu khawpuia khua rawn var mek chu a thlir ta a. Tukhthuan leh
chanchinbu chu a rooma thawn chho turin a chah a, Jack woltz nena an inhmuh hun tur zing dar
10 nghakin a chawl ta veng veng a. Appointment siam chu rin ai takin a lo awl a. A hma ni khan
Hagen chuan Movie siamna lama hnathawktu pawl zinga thil ti thei ber, mipakhat a hming Billy
Goff chu a call a. Don Corleone hnen atanga thu hmu a ni tih sawiin a tuka Jack Woltz-a Hagenan a hmuh theih nana ruahmanna siam tura Jack Woltz chu be tura hrilhin, an inhmuhnain Hagen
chu a tilungawi lo a nih chuan Movie Studio-ah chuan hnathawktute nawrhna a thleng maithei
tih Jack Woltz chu hrilh turin a ti a. Darkar khat hnuah chuan Hagen chuan Goff phone call chu a
dawng ta a. Appointment chu zing dar 10-ah a ni ang a. Woltz chuan hnathawktute nawrh
maitheih thu thuchah chu a dawng ngei a, mahse a ngaihsak tehchiam lo. Goff chuan, “Chu chu a
lo tul ta a nih chuan, keimah ngeiin Don chu ka biak phawt a ngai ang.” a ti a.
“Chutiang a nih chuan, a lo be mai ang che.” Hagen chuan a ti a ni. Chutianga a tih chuan
thutiam tur a pumpelh a ni. Don duh dan Goff-an a remti mai chu mak a ti lem lo. Chhungkaw lal
ram chu New York pawn lamah zauh la ni chiah lo mah se, Don chuan hnthawktu pawl hruaitute
chu a lo puih tawh thin a vangin tih theih a nei hman tawh tho a. An zinga mi tam tak chuan
inthianthatna avangin Don lakah bat an nei a ni.
Mahse zing dar 10-a appointment awm chu a fuh lo tlat. Chumi awmzia chu appointment
list-a hmasa ber a ni a, chawchhun ei tura sawm a ni dawn lo bawk. A awmzia chu Woltz chuan
a ngaipawimawh tawk lo a ni. Woltz chuan suma a tham ruk thin avangin Goff chuan a sawithaih
na vak lo pawh a ni maithei e. A chang chuan Don chuan a hlawhtlinnaah chuan chhungkaw
sumdawnna lam thatna turin a hming langsar tur hi a thup deuh thin a. Chutiangah chuan a
hming khan awmzia a nei ta thin lo a ni.
A lo thlir lawkna kha a dik a ni tih a lo lang ta a. Inhmuhna tur hun darkar chanvea a pelh
thleng chuan Woltz chuan a innghah tir a. Hagen chuan pawi a ti chuang lem lo. Reception room
chu a ropuiin a nuam hle a, a awmna ep chiaha thutna dup sendukah chuan Hagena naupang
hmuh tawh zinga hmeltha ber chu a thu a. Kum 11 emaw 12 emaw aia upa chu a ni lo vang.
Puitling thawmhnaw hak ang man to tak, mahse simple deuh si a inbel a. A sam chu rangkachak
rawng niin a mit chu tuifinriat ang maiin a pawl riai a, a hmui a sen no chek bawk. A nu ni ngei
tur hi a bulah chuan a awm a, ani chuan Hagen chu chaldelh hmel zet hian a rawn melh a, a
hmaia va ben chawrh a chak hle.
Angel naupang leh a nu Dragon ang mai, tiin Hagen chuan a ngaihtuah a. Chu nu
mitmeng rum tak chu a lo melh let ve a.
A tawp a tawpah chuan hmeichhe thau lam inchei nalh zet, la valai tak hian office intlar
phei thluah kaltlangin producer Office lam pan chuan a hruai ta a. Chung office-te mawina leh a
chhunga hnathawka awmte chuan Hagen chu a hip hle a. A nui sak a. An vai chuan remhre taka
office hna atanga tana Movie lama intahluh tum an ni a. A tam zawk hi chu an damchhungin he
office-ah hian an thawk anga a nih loh chuan beidawngin anmahni khaw lamah an haw leh
hlawm dawn a ni.
Jack Woltz chu pa sang tak, pian tha tak a ni a. A dul kiar zet chu a suit thui nalh zet
chuan a thup bo lek lek a ni. Hagen chuan a chanchin chu a hrechiang hle. Kum sawm a nihin
beer tin ruakte tawlaia nawrin khawchhak lamah a inhlawh thin a. kum 20 a nih chuan a pa puiin
thawmhnaw siamna lamah rim takin a thawk bawk. Kum 30 mi a nihin a New York chhuahsanin
khawthlang lamah a kal a, Nickeledon & Pioneered Motion Pictures-ah sum thawh vein kum 40
a nih meuh chuan Hollywood-a Movie lama mihausa tawntaw a ni chho ta a, tawngkam thlahdah
tak, lerh zet niin, Chinghne koham tak angin tleirawl rual zingah a vakvel ta thin a ni. Kum 50
mi a nih chuan a inthlakthleng ta hlawk a. Thusawi zirna a nei a. English chhiahhlawh hnen
atangin inchei dan a zir a, nungchang tha a zir tel bawk. A nupui hmasa a thih chuan Khawvel
huapa hmingthang lemchan thiam hmeltha zet, lemchan lam chawlhsan ta nen an innei leh a.
Tuna Kum 60 mi a nih hian lemziak hlui te khawn khawmin, President’s Advisory Committeeah member a ni a. Movie siamna lama kut themthiamna chawisanna lam Foundation Dollar
maktaduaih tam tak len velna chu a din bawk a. A fanu chuan English Lord pasalah a nei a, a
fapa chuan Italian lal fanu a nei bawk.
America-a Movie lam chanchinthar ziaktute zawng zawngin an ziah dan chuan, tunhnaia
a tuichilh ber chu a sakawr In, kum kal taa cheng maktaduaih zet a senna chu a ni. English
sakawr tha hmingthang zet mai Khartoum chu cheng sing sawmruk laia a lei leh, chu
intlansiaknaa hnehtu la tawng lo sakawr chuan intlansiakna lam bansanin chi thlahtu atan a
sakawr inah a chawl hahdam dawn a ni tih a puan chuan chanchinbu tin phek hma ber a chang
chiang hle a ni.
Hagen chu hawihhawm takin a lo dawngsawng a, A hmel tha tak, nisa em uk kharh leh
fai taka ziahah chuan a nui nia ngaih theih turin a then sang a. Pawisa tam tak sen ral a, tunlai
thiamna sang ber ber hmanga enkawl a ni chungin kum 60 mi a nihna a lang tho a ni. A hmai chu
thui khawm ang maiin a lang zur tap a. A chet vel chuan mipawimawh elkhen a nihna a lang thei
a. Donin a neih ang, a chenna khawvel thunun hneh ngawih ngawihna ang kha a nei ve a ni.
Hagen chuan a kal chhanah chu sawi nghalin, Johnny Fontane-a thian tana palai hna
thawk tura lo kal a nih thu chu a sawi a. He a thian hi thiltithei tak a ni a, Mr.Woltz chuan a thil
duh tetham tak chu a tihsak chuan a lawmna leh inthianthatna tawp ngai lo chu Mr.Woltz lakah
chuan a tiam a ni. Chu a thil duh chu kar leh maia Studio-in an siam tan tur indo filma a
changtupa atana Johnny Fontane hman chu a ni.
A hmai zur tap chu a che chang miah lo a, hawihhawm mah mah hian, “I thian chuan eng
thil nge min tihsak ve ang?” tiin Woltz chuan a zawt a. A awah chuan inphahhniam derna tak hi
a lang thei a.
Hagen chuan chu inphahhniam derna aw chu haiderin, “Hnathawktute nen buaina in nei
niawmin a lang a. ka thian chuan chu buaina chu a tireh hmak thei a ni. I studio tana pawisa
hailut tam thei tak Star lar tak i nei a, mahse ani chuan Marijuana atangin Heroin-ah a kaisang
tawh a ni. Ka thian chuan i Star tha ber chuan Heroin a khawih leh tawh lo ang tih a tiam che a.
Kum lo kal leh zel turah pawh thil thleng a awm a nih chuan i vawikhat rawn call chuan harsatna
a tikiang mai dawn a ni.”
Naupangin insawithei taka a thil sawi a ngaihthlak sak ang maiin Jack Woltz chuan a lo
ngaithla a. “Min nawr luih i tum tihna em ni?” a ti hrawk a.
Hagen chuan, “Teuh lo mai, Thiante tan thil ka rawn dil mai a ni. Engmah i hloh chuang
lo tih rawn sawifiah ka tum mai a ni.”
A duh vang reng emaw tih mai turin, Woltz hmelah chuan thinrimna a lo lang a. Hagen
lamah chuan a awn phei deuh a, “Awle, nang uihur fapa, i tan leh i boss, a tua pawh chu lo ni se,
ka han hrilh ang che, Johnny Fontane chuan kha Movie kha a chang ngai lo vang. Mafia hotu
thing zet zet engzat pawh lo chhuak se pawi ka ti lo.” A han thu ngil a, “Thurawn ka han pe ang
che, ka thian. Edgar J.Hoover, i lo hre tawh phawt ang a”- Woltz chu za lo zetin a nui a- “kha ka
thian tha tak a ni a, nawr luih ka ni tih ka hriattir hlauh a nih chuan. Nangni ho hian engin nge
deng che u tih pawh in hre hman lo vang.” a ti a.
Hagen chuan dawhthei takin a lo ngaithla a. Woltz te ang dinhmun atang chuan chu aia
nasa zawk chu a lo beisei a. Hetiang atthlak taka khawsa mi hi Dollar maktaduaih za hen
Company hotu a ni thei a maw? Don chuan pawisa dahkhamna tur thil thar a ngaihtuah a nih
chuan chu chu hriateng tur a ni; he industry-a an thluak bur ber berte pawh hetiang michhaw an
nih chuan, Movies lam chu a ngaihtuah chi khawp ang. Kha tawng khumna khan a tibuai lem
lova. Hagen chuan Don hnen atangin inbiakrem dan kalhmang chu a zir tawh tlat a ni. “Thinrim
ngai suh ang che.” tiin Don chuan a hrilh a, “Vauna hmang bawk suh la, rilru fim takin ngaihtuah
ang che.” ‘Rilru fim’ tih chu italian chuan a fiah deuh zawk a Ragione- zawmpui tihna lam a
kawk deuh. He inbiakrem dan thiamnaah hi chuan Hmuhsitna te, vauna te haider a, biang lehlam
pawh dawh a ngai hial thin.
Inbiakna dawhkanah Don darkar riat chhung zet vauna te, hmuhsitnate dawng chunga a
thu lai Hagen hian a lo hmu tawh a, mi chak tak pakhat, tawrawt leh chapo zet mai hmin a tum a
ni. Darkar riat a ral hnuah chuan Don chuan a ngaihna hre tawh lo ni awm takin a kut a han phar
a. chu dawhkana thu ve dang hnenah chuan, “Tumahin hepa nen hi chuan thil an ngaihtuah ho
thei lo vang.” tih pahin room atang chuan a kal chhuak ta a. Chu pa chaka chu hlauhna avangin a
dang var pap a. Palai tirin Don chu roomah hruai luh leh a ni a, inremna chu neih a ni ta a ni.
Mahse thlahnih hnuah chuan chu pa chaka chu a luhmehna dawr ngainat berah kahhlum a ni ta a
ni.
Tichuan Hagen chuan a han sawi tan leh ta a. Aw pangngai thei ang berin, “Ka card hi en
la.” a ti a, “Dan hremi ka ni a. Ka rawn inrawlh thuk lutuk em ni? Vauna thu kam khat pawh ka
chhakchhuak em ni? Johnny Fontane-a kha Movie-a a luh theihna tur chuan i sawi ang apiang
pawm thei turin ka rawn inbuatsaih a. Mahse he thil te tham lek tan hi chuan ka phal rai ropui
tawk viau tawhin ka hria. Johnny chuan a part turah khan amah chu a tha ber tih i pawm tih a
sawi a. Chutiang a nih loh chuan he thil hi dil i ni lo ang tih ka sawi duh bawk. I sum dahkhamah
buaina i nei palh a nih pawhin. Ka Client chuan chu Movie sum chu tum a inhuam a ni. Mahse
chiang takin ka han sawi ang e. Aih i tih chu aih a ni tawp tih ka hrethiam a. Tumahin an nawr
lui che emaw nawr luih che an tum emaw thei lo. Mr.Hoover nena in inthianthatna pawh kan hria
e, Ka boss chuan chu chu a zah khawp mai tih kan sawi belh ang e. In inlaichinna chu a zah
takzet a ni. ”
Chumi chhung zawng chuan Woltz chuan ngaihsak lo zetin pen a lo khal mai mai a.
Pawisa chungchang sawi a nih veleh a ngaihven ta deuh a. “He Movie budget hi dollar
maktaduaih nga lai a ni.” inphahhnuai der takin a han ti a.
Hagen chu a rilru dek hle niawm takin a faifuk raih a. “Ka boss chuan a ngaihdan
tawmpui thei mai tur mi thian tam tak a nei a.”
A vawikhat nan Woltz chuan chu thil chu a la thutak ve tan ta a ni. Hagen-a card chu a
han en vang vang a, “Ka va hre ngai lo che ve.” a ti a. “New York-a dan hremi lian zual ho chu
ka hre vek a. mahse nang teh hrep hi tunge i nih?”
“Hna eng eng emaw chu ka khawih ve nual a,” Hagen chuan a ti a. “Thil pakhatah chauh
ka insawrbing ta a ni.” a tho a. “I hun ka la hek tawh lo ang” a kut a phar chhuak a, Woltz chuan
a lo chibai a. Kawngkhar lamah a kal zet hnuin a lo hawi let leh a.
“Mi tamtak an nihna ang aia lan pawimawh tum nen in lo inhmu tawh thin ang ka ring.
Mahse kei chu chu mi letling chiah chu a ni. Engvangin nge kan hriat dun kan thianpa kha i lo
zawh mai lo ang? i ngaihtuah tha leh duh a nih chuan. Ka awmna Hotel-ah i lo call mai dawn a
nia.” A han ngawi hlek a. “Hei hi bawlhhlawhah i ngai maithei, mahse Mr. Hoover-an a theih
phak bak nia a ngaihte pawh ka Client chuan i tan thil a ti thei a ni.”Chu producer pa meng zim
ta sawt chu a hmu a, a tawpah chuan thuchah chu a hrethiam ve ta e. “Taka, i film siamte ka
ngaina khawp mai.” Hagen chuan a theihtawpa thuhnuairawlh chungin, “He thil tha hi ti zel teh.
Kan ramin a mamawh a ni.”
Chumi tlai lamah chuan Hagen chuan Woltz Secretary hnen atangin Phone call a dawng
ta a. Darkar khat hnuah Woltz-a thingtlang ina zanriah ei turin carin a rawn lam dawn a ni.
Darkar thum lai tlan ni mahse carah chuan bar leh mamawh lamna thil dang pawh a awm thu a
rawn sawi bawk a. Woltz chu a mimal thlawhnain a kal thung ang a, engvanga thlawhnaa kal
tura sawm zawk lo nge a nih ang le? Secetary aw chuan a sawi belh leh a, “Mr.Woltz chuan
zanriak tura rawn inpeih turin a duh che a, zing lamah airportah a va thlah dawn che a ni.”
“Ka lo ti ang e.” Hagen chuan a ti a. Chu chu ngaihtuah ngai dang a ni leh ta. Eng tin nge
Woltz chuan zing lamah New York a pan dawn tih a hriat theih? A han ngaihtuah vang vang a.
Ni thei ta ber nia lang chu Woltz chuan amah zui rua thil pawimawh awm thei ang zawng
zawng hre turin Private Detective a ruai a ni. Chuti a nih chuan Woltz chuan Don tana ding a ni
tih a hre tawh ngei ang a, chu mi awmzia chu Don chanchin pawh a lo hre tawh ang a, tunah
chuan thil a la thutak viau tawh ang chu. Chu bakah thil eng emaw tih a ngai bawk ang a, tiin
hagen chuan a ngaihtuah a, tukina a lan ang ai ngawt kha chuan Woltz hi a lo fing viau thei bawk
a ni.
*****
Jack Woltz-a in chu filma kulh mawi tak kan hmuh ang hi a ni hawt a. Thing phun chawp
kara kulh, tual zawl zau tha tak mai te leh Sakawr In leh a vela hnim peh tur tha tak tak awm te
chu a awm a. Kawldai leh pangpar hmun te, hnim awm te reng reng chu film star lar tak
kutzungtin ang maia uluk taka enkawl a ni a.
Woltz chuan Hagen chu bathlarah chuan a lo lawm a. bathlar pawh chu Air-condition vek
niin darthlalang banga kual chhuah vek a ni bawk. Producer chu duhdah deuh takin silk kawr
dumpawl leh chhawhchhi buhpawlh rawng kekawr tlawn a ha a. Savun chapal nem chi a bun
bawk a. Chung a incheina leh rawng vel avang chuan a hmai zur tap leh vawt ruih chu a phawk
hrain a lang a. Hagen chu Martini no lian zet a lo pe a, amah pawh chuan a dang a dawm ve
nghal a. Chawhma lam ai kha chuan a nelawm tawh hle a ni. Hagena dara kuah pah chuan,
“Zanriah kil hmain hun tlem te kan la nei a, ka sakawrte va en ang hmiang.” a ti a. Sakawr In
pana an kal lai chuan, “I chanchin chu ka lo chhui a ni, Tom. I boss chu Corleone a ni tih min
hrilh tur che a nia. Johnny-an keimah min bum nana bumhmang satliah a rawih mai mai ni turah
ka ngai che a. Ka lo ngaihsak lem lo a ni. Hmelma siam ka duh vang a ni lo va, hetiang lam hi
chu ka ring lem lo. Mahse tunah chuan hlim takin i awm teh ang. Hna thil chu chaw ei zawhah
kan sawi dun dawn nia.”
Mak tak maiin Woltz chu a mikhualte ngaihsak mi tak mai a ni a. A tih dan thar, chin dan
thar chu sawifiahin a sakawr in chu America rama hlawhtling bera siam a beisei a. Sakawr in chu
kangmei laka him tura duan a ni a. Thianghlim thei ang bera vawn a niin, Private Detective-in
uluk taka a duan hmanga venhimna pawh kalpui a ni. A tawpah chuan sakawr in te deuh bul an
va thleng a, chu mi bang pawn lamah chuan thirphek lian takah hian chhinchhiahna a intar a.
“Khartoum” tih hi a inziak a.
Chumi chhunga sakawr chu Hagena, hetiang lam hre lo tak mitah takngial pawh chuan
mawi chungchuang tak a ni a. A chalh arh hlai taka lunghlu pianhmang anga var pap tih loh a
taksa dang zawng chu a dum tak hlarh a ni a. A mit buang thak, apple tiat zet chu a tle sur a.
Woltz chuan chhuang takin, “Khawvela sakawr intlansiaknaa hman chi ropui ber a nih hi. Nikum
khan England-ah Dollar nuaihkhat laiin ka lei a ni. Russia mi Czar meuh pawhin sakawr pakhat
manah chutiang zat chu a hmang ngam lovang ka ti ngam sak. Mahse intlansiaknaah ka tel tir
dawn lo. Chithlah turin ka dah dawn a ni. He ramin a hriat theih tirh ata Sakawr intlansiak chi
vulhna hmun ropui ber ka siam dawn a ni.” a ti a.
Sakawr tuang chhah lai chu zutin, “Khartoum, Khartoum” tiin a ko a. A awah chuan a
duh takzet tih a lang thei. Sakawr pawh chuan a lo chhawn ve buk buk a. Woltz chuan, “Sakawr
pu tha tak ka ni asin.” a ti a, “Mahse kum 50 mi ka nihin a chungah ka chuang tan chauh a ni.” a
ti a, a nui hawk hawk a.
“Cossack(Russia rama sakawr chungchuang sipai) hovin Russia rama ka pite ho an
pawngsual anga an thisen ka kai ve a ni maithei a ni.”
Khartoum-a dul vel chu a chul a, ngaina takzet tih hriat deuhin,“A sazu hi han en teh,
hetiang sazu hi han nei ve mai ila chuh.”
Inah chuan zanriah ei turin an kir leh ta a. An ei chhung chuan chhiahhlawh pathumin an
vil reng a. Table pawh chu rangkachak leh silver hmanga cheimawi a ni a. Mahse ei tur thung
chu a pangngai satliah mai a ni thung. Woltz chu a mah chauha khawsa a ni a, eitur lam a
ngaihtuah tehchiam lo tih a chiang hle a ni. Havana Cigar an tana an zuk vang vang thleng chuan
Hagen chuan a ngaichang a. A tawpah chuan, “Johnny chuan a chang dawn nge dawn lo?” tiin a
zawt ta tawp a.
“Ka thei lo a ni.” Woltz chuan a ti a. “Duh pawh ni ila Johhny-a chu ka dah thei tlat lo. A
changtu tur zawng zawng tan contract sign vek a ni tawh a. kar leh atangin shooting neih tan a ni
dawn a ni. Ka tihdanglam theih a ni tawh lo a ni.”
Hagen chuan dawhtheih lo zetin, “Mr.Woltz, dinhmun sang bera awm mite nena inbiak
hlawkna chu, khatiang chhuanlam kha pawm theih a ni tlat lo a ni. I duh ang apiang i ti thei
alawm.” A sikret chu a han fawp a. “Ka client chuan a thutiam kha a hlen theih loh i hlau em
ni?”
Woltz chuan ro halhin, “Hnathawktu te nen harsatna kan nei ang tih chu ka ring alawm.
Goff khan chu mi chungchangah chuan min rawn call a ni, kha zawng sen pa kha. Kum tinin
dollar nuaihkhat puanhnuaiah ka pe thin tih hre lo ang maiin a rawn tawng vel a. Chubakah kha
Star kha Heroin chu in nghei tir thei ang tih ka ring bawk a, mahse ka ngaihsak tehchiam lo. Tin,
Ka film siam tur chu pawisa ka intum thei bawk e. A chhan chu kha Fontane sawn chhepa kha ka
hua a ni. I boss hnenah chuan hrilh la, he thil hi chu ka ti thei lo vang, mahse thil dangah chuan
min ring thei ang, thil engkimah a ni mai.”
Nang sawn tenawm pa, tiin Hagen chuan a ngaihtuah a, eng vang teh hrepa he tiang
thleng thleng min hruai si nge i nih? He Producer hian eng emaw ngaihtuah chu a nei a ni. Hagen
chuan vawt raihin, “Thil awm dan i hrethiam lo a ni. Mr.Corleone hi Johnny Fontane-a
Godfather a ni asin. Chu mi awmzia chu inlaichinna nghet tak, sakhaw thianghlim hmanga
inlaichinna a ni.” Sakhaw thil a swi lan avanga zahna lantir nan Woltz chu a lo kun ngaih a.
Hagen chuan sawi zawmin, “Italian ho chuan fiamthu ho te an nei a, Khawvel hi a khirhkhan em
avangin mihring chuan amah enkawl tur pa pahnih a neih a ngai a ni, an ti. Chuvang chuan
Godfather an nei thin a ni.
Johnny-a pa boral atang kha chuan, Mr.Corleone chuan mawhphurhna chu thuk zawkin a
la ta a. Mr.Corleone hi rilru na hma tak a ni a, a thil dil hmasak hnawl a nih tawh chuan a
pahnihna a awm tawh lo ang.”
Woltz chuan a dar a chhin ak a, “Pawi ka ti khawp mai. A chhanna chu aih a la ni reng.
Mahse heta i awm tak rau rauah chuan, Hnathawktu te buaina ching fel tur khan engzat nge ka
hman ngai ang? a pawisain, tunah min han hrilh teh.”
Chu chuan Hagena harsatna pakhat chu a tikiang ta phawt a ni. Movie-a Johnny-a chang
lo tura thu a tih tluk vek tawh hnuah engvanga inhmuh nana heti chen hun la pe tlat nge a nih
ang? Tuna an inbiakna hian a ti danglam tawh awm chuang si lo a. Woltz chuan him hlein a
inhria a; Don Corleone-a thiltihtheihna a hlau lem lo a ni. Politic lama zawmpui a neihna te, FBI
chief nena an inthian thatna avangte, a vanneihna leh Film Industry lama thiltithei tak a nih
avang te chuan Woltz chuan Don lakah derthawng niin a inngai lo a ni. Mi thil thlir zau tak tan
chuan, Hagen takngial tan pawh, Woltz dinhmun chu nghet tak niin a lang tlat a ni.
Hnathawktute buaina-a a sum senral tur zawng zawng chu hloh a inhuam a nih chuan Don tan
chuan tihchhiat theih loh niin a lang tlat. Mahse chu thil chhutnaah chuan dik lo pakhat a awm
tlat. Don Corleone chuan a Godson hnenah chu filmah chuan a chang ngei ang tih a tiam tawh a,
Don chuan, Hagen-a hriat theih chinah, chutiang thilah chuan a thutiam a bawhchhe ngai lo tlat a
ni.
“Min ngai sual der a ni.” Hagen chuan a ti a. “Thil inhnehchhuha thil dik lo tihpuitu
angah min siam i tum a. Mr.Corleone chuan a mah dawrtu tana i thil tihsak chu thiantha anga
rulh let nan che he hnathawktute buaina chinfel hi a tum mai chauh a ni. Thian tha
induhsaktawnna angin, a dang a awm lo. Min ngai thutak lo riau a ni. Ka ngaihdan chuan chu
chu i tihsual niin ka hria.”
Woltz chu, chutiang hun remchang chu a lo nghak reng ni awm takin, a thin tiur ta a, “Ka
hrethiam takzet a ni.” a ti a. “Chu chu Mafia tih dan a ni lo’mni? Nem tak leh no taka tawng
chunga invau hi a ni lo’mni? Chiang fakin ka han sawi ang e. Johhny Fontane chu he partah hian
a chang lo vang, hemi atan hian tha viau ni mah se. Star ropui takah a siam ngei tur chu a ni.
Mahse a ni dawn lo, a chhan chu kha naupang chimawma kha ka hua a ni. Film siamna atan hian
ka theh chhuak dawn a ni. A chhan ka hrilh ang che aw, ka thlazar hnuaia awm hmeichhe hlu tak
a tichhia asin. Kum nga chhung teh meuh he nula hi ka enkawlin zai te, lam te, lemchante a zir a.
Dollar nuaih chuang lai ka seng a ni. Star ropui taka siam tum ka ni a. Tlang takin ka han sawi
ange, mi khirh tak ka nih loh zia leh pawisa ringawt a nih loh zia i hriat nan. Kha nula kha a
hmelthain, he khawvela ka neih leh ka neih tawh zinga ropui ber a ni.
Tui Pump chhuahna ang tur turin a hip chhuak thei ngei ang che. Chutah Johnny chu a aw
nem tak leh mi hip theihna thing zet nen a lo lang a, nula chu a tlan bo ta a ni. Nuihzatbura min
siam tur ringawtin thil engkim kha a tithlawn zo ta vek a. Ka dinhmun anga ding tan chuan e,
Mr.Hagen, nuihzatbura awm chu a theih loh a ni. Chuvangin Johnny chu ka ban ngei a ngai ta a
ni.”
A vawikhatna atan Woltz chuan Hagen chu makti takin a siam a ni. Chutiang thil tethama
puitling than kin tawhin hna thila nghawng a neih tir chu a awihawm loh hial zawk. Hagen-a
khawvel, Don corleone-a khawvelah chuan Hmeichhe hmel mawinate, mipat hmeichhiatna
kawnga an zei leh zei lohte chuan hmun tereuhte pawh an chang phak lo. Chutiang chu mimal
thil a ni a, Chutiang anih loh chuan inneihna leh chhungkaw mualphona a ni mai. Hagen chuan
vawikhat beih leh hram a tum ta a.
“I dik chiah lawm Mr.Woltz,” Hagen chuan a ti a. “Mahse he thil tereuhte hi ka client,
Mr.Corleone tana a pawimawh zia i hrethiam lo ang. Nausen Johnny-an baptisma a chan laiin
Mr.Corleone hian a kutin a kuangkuah asin. Johnny-a pa a boral hian, Mr.Corleone chuan nu leh
pa nihna chu a koa innghat riakah a ngai nghal hmiah a ni. Ni e, mi tam takin an chunga a thil lo
tih tawhte avanga an lawm zia entir nan leh an zah zia lan tir nan ‘Godfather’ tiin an ko asin.
Mr.Corleone chuan a thiante chu a tithlawn ngai lo.”
Woltz chu a ding thut a. “Ka hre tam tawk tawh e. Misualin thu min pe ngai lo va, thupek
ka pe zawk thin. he phone hi ka la kang a nih chuan Jailah zanin hun hi i hman mai ang. Chu
Mafia misual hotu chuan chet rum a tum viau a nih chuan, Band leader ang mai mai kha ka ni lo
tih a hre mai ang. Ni e, kha chanchin kha ka hre ve asin. ngaithla teh, i pu Corleone-a chuan
engin nge deng tih pawh a hre hman lo palh ang e. White house lama ka tlaktlumna ka hmang a
nih phei chuan.” a ti a.
Mi mawl, zawngsen mawla leh, tiin Hagen chuan a ngaihtuah a. Engtin nge mipawimawh
tak, President thurawn petu, khawvela Studio lian ber hotu a nih theih le? tiin Hagen chuan mak
a ti hle. Film siamna lamah Don chu a inrawlh ve ngei tur a ni ang. Ha pa hian thuchah chu a
hrethiam tlat lo.
“Zanriah tui tak avang leh tlai hun nuam tak avang hian ka lawm e,” Hagen chuan a ti a.
“Airport panna tur lirthei min ngaihtuahsak thei ang em? Zan riah kher a ngaiin ka hre ta lo.”
vawt raihin a nui a, “Mr.Corleone chuan chanchin tha lo hi hriat vat a duh thin a.”
Pawn light eng hnuaia a chuanna tur nghaka a din lai chuan, Hagen chuan hmeichhe
pahnih, chhuahna kawnga limousine lo ding pan mek hi a hmu a. Woltz-a office-a a hmuh
hmeichhe naupang kum sawmpahnih mi hmeltha tak leh a nu kha an lo ni a. Mahse chu naupang
hmui nalh zet kha tunah chuan hnwihsen sennoa chhah taka hnawih a lo ni tawh a. A mit pawl
riai chu a dava riai a. Car khawngkhar inhawng sa lam pana a kal chuan a ke zen thlarh chuan a
zo lo ni awm takin, sakawr no nei zo hlim angin a kal tawi tawi a, a nu chuan lo puiin car-a a lut
tur chu a pui a, chumi pah chuan a beng bulah thupek a chhakchhuak zauh bawk. A nu chu rawn
inherin Hagen chu a rawn en zawk a, a mitmeng sa zetah chuan mupui ang maia hnehtu intihna a
lang thei. Amah pawh chu limousine chhung-ah chuan a pil bo ta daih a.
Kha vang kha a nih chiah kha, Los Angeles atanga thlawhnaa a kal ve loh nachhan, tiin
Hagen chuan a ngaihtuah a. Hmeichhe naupang leh a nu kha Movie Producer pa nen khan an zin
ho a ni a. Chu chuan Woltz chu zanriah kil hmaa chawlh hahdamna a pe a, kha naupang chungah
khan mipa hna a thawk ngei a ni. Chu khawvelah chuan Johnny chu chen a duh a maw?
Vanneihna chang mawlh teh se, Woltz pawh chuan.
****
Paulie Gatto chuan hna hmanhmawh thlak hi a haw hle, a bikin tharum thawhna a tel
dawn phei chuan. Ruahmanna siam lawk duh mi a ni. Zanina mi ang te hi, tlangval hawklak thu
mai mai mah ni se, tu emawin tihsual a neih vaih chuan thil serious takah a chang thei tlat. Tunah
chuan beer in chungin a hawi kual a, chung tlangval hawklak pahnihte hmeichhe vakvai pahnihte
nena Bar atanga chhuak mek te chu a mitmei reng a.
Paulie Gatto chuan chung tlangval pahnihte chanchin a hriat tur ang chu a hre vek tawh a.
An hming chu Jerry Wagner leh Kevin Moonan an ni a, kum 20 mi vel an niin, hmeltha tak, sam
buang thang leh dung sang, pian tha tak an ni. An pahnih chuan kar hnih hnu maia khawpawn
lama awm College zawm tur an ni a. An pate ve ve chu politics lama thiltithei tak an nih avangin
leh College zirlai an nihna avang chuan Sipaia luh pawh an pumpelh thei a ni. An pahnih chuan
Amerigo Bonasera fanu pawngsual thubuai avanga chhuah lailawk mek an ni a. Sawn chhe ho
chu, tiin Paulie Gatto chuan a ngaihtuah a, Sipai tan pumpelhin, an chhuah lailawkna chu
bawhchhiain zan lai thleng thlengin barah zu inin, mihur an um a. Tlangval hawklak tak hi chu.
Paulie Gatto pawh chu a sipai tanna tur tih khawtlai a ni a, a chhan chu Draft committee
hnenah doctor-in amah chu mi ngo kum 26, nupui la nei lo, rilru lam harsatna a tawh avanga
electric hmanga shock tawh, tia a report vang a ni. Chung zawng zawng chu a dik lo vek a,
Mahse Paulie chuan chu ngaihhnathiamna chu hlawh zo hlein a inhria. Paulie-an chhungkaw
sumdawnna-a, “thil tih that” a neih hnuah Clemenza-in chutiang chuan ruahmanna a siam a ni.
Tuna a hna tur hi chung naupangte college an luh hma ngeia tih zawh vat tur a ni tia hrilh
tu chu Clemenza hi a ni a. Eng vang teh hrepa New Yorkah kher tih ngai nge maw a nih le? tiin
Gatto chuan a ngaihtuah a.
Clemenza hian a hna tur chauh pe loin thupek dang belh a ching hle a, Heng hmeichhe
vakvai pahnihte hi an ruala an kal ve zel chuan zanin chu a thlawnin a luangral mai dawn a ni.
Hmeichhe pakhatin nui hawk hawk chunga ring taka, “I a ta em ni Jerry? Khawi carah
mah ka zui lut lo ang che. Kha hmeichhe khawngaihthlak tak ang khan Hospitala hun hman ka
duh chai hleinem.” a tih chu a hre thei a, a awah chuan lungawi hmel hliah hliahin a lang. Chu
chu Gatto tan chuan a tawk chauh, beer chu a in zo a, kawtthler thim takah chuan a chhuak ta a.
kawtthlera eng awmchhun chu Bar dang atanga eng lo chhuak chauh chu a ni. Dawr dang zawng
zawng chu an inkhar tawh a. Chulai vela police car vak vel thin chu Clemenza an a lo buaipui
daih tawh a, Radio atanga kohna an dawn hma chuan an lo kal lo ang a, chutah pawh
muangchangin an lo kal dawn a ni.
Car kawngkhar pali nei, Chevy Sedan ngheng chuan a ding a. A seat hnng lamah chuan
mi pahnih, palian zet zet mai chu hmuhtheih mang lohin an thu a, Paulie chuan, “An lo chhuah
hunah lo bei ang che u.” a ti a.
A thleng rang teh thut lutuk niin a la ngai fan a. Chung tlangvalte chanchin Police copy
chu Clemenza’n a pe a, chung tlangval pahnih chuan zantin zuin tur leh bar-a nula awmte
fawrpui turin an chhuak thin. Paulie chuan Chhungkaw zinga mi chak tak tak pahnih a thlang
chhuak a, chung tlangvalte chu a kawhhmuh a. Tih dan tur a hrilh bawk a ni. An lu chhipah leh
tukkhumah chuan khawih loh tur a ni a, Tihpalha thihna thlen thei a ni tlat. Chutiang bak chu an
duh dan hawi zawng apiangin a ni mai. tawngkam khat chiahin a vau lawk a, “Chung tlangval
pahnihte chu thlakhat ral hmaa Hospital atanga an chhuah chuan, Truck khalh hna thawk turin in
kir leh ang.”
Chung pa chak pahnihte chu car atang chuan an chhuak a. An pahnih chuan Boxer chawl
tawh, club tenau bak pel thei lo an ni a, sum inpuk tawn kual velna hmangin Sonny Corleone
chuan a la chhuak thei hlauh a, ei hmuhna tur an neih phah ta a ni. Dik tak chuan tunah pawh
hian an lawmzia han tih lan chu an chak zek zek a ni.
Jerry Wagner leh Kevin Moonan te lo chhuah hun chu a remchang takzet a ni. Bar-a
nulate chhaih fiamna khan an tleirawl chapona rilru a tinat lai tak a ni a. A car ngheng ar ar
chung chuan Paulie Gatto chuan nuihzat tih hriat deuh hian a lo au a, “Hey, Casanova, khang
nulate khan an va thingthla chiang che u ve.”
Tlangval pahnihte chu phur takin an rawn inher a. An thinrim hrikthlakna atan chuan
Paulie chu a tha zet mai, hmai tung rat mai, dungtawi leh sa pan lam deuh, indawrna lama fing
zet si chu. Phur zetin an bawh phei a, mahse hnung lam atangin an ban te chu mi pahnihin an
rawn vuan ta tlat a. Chu tih lai chuan Gatto chuan a kut dinglamah a bik taka siam Brass knucle,
thil zum 1/6 inch-a sei invuah fur chu a lo vuah mek a. Karkhata vawithum Gym-a kal thin a ni
bawk a, A chet hun chu a dik hle. Wagnera hnarah tak chuan a kuttum chuan a va deng dawt a.
Wagner-a vuantupa chuan chawikangin, Paulie chuan a han chho dawm leh siah a. Wagner chu a
zawi hnawk a, a vuantu chuan a thlah ta a. Chu mi hun chhung chu second ruk vel chauh a ni.
An pahnih chuan Kevin Moonan, au chhuah tum mek chu an hmachhawn leh ta a. A
hnung lama vuantu chuan awlsam takin a kut khat chauhin a vuan a, a kut dangin a au chhuah
theih loh nan a hrawkah a rek bawk a.
Paulie Gatto chu rang takin Carah chuan a lut ta vat a. Midang pahnih chuan Moonan chu
an sawi sa ta a, inngaihtuah harh hlau ni awm fahranin, he khawvela an hun neihchhun hmang ni
awm fahrana thahnemngaiin an tuk ta chawrh chawrh a. An kuttum chu a lo thlawnin an hmang
lo kher mai, chiai miah lovin, a hun dik chat chatah an hnek a, an taksa rihna zawng zawng nena
an hnek apiang chuan tisa a tithler hawk hawk zel a ni. Gatto chuan Moonan-a hmai chu a va
hmu zawr a, hriat hleitheih a ni tawh lo. Mi pahnihte chuan Moonan chu kawngsirah
hnutchhiahin Wagner lam chu an pan leh ta a.
Wagner chu din a lo tum mek a, tanpuitu kohin a au chhuak ta a, Bar atang chuan
thenkhat an rawn chhuak a, mi pahnihte pawh chu an hmanhmawh deuh a ngai ta a ni. Wagner
chu an thingthit tir a, pakhat zawk chuan a kut lain hnung lamah a herhsak a, chutah a hnungzang
thlurah chuan a tlawh ta chawrh a, ruh tliak ri rawp chu a hriat theih a. Wagner na ti lutuk a te tak
rawng rawng avangin tukverhte chu a rawn inhawng ta sup sup a. Mi pahnihte chu hmanhmawh
takin an che sawk sawk a. Pakhat zawk chuan Wagner chu kaithovin a luah nghet takin a vuan a.
Pakhat zawk chuan a kuttum hrawl zet chuan chu targetah tak chuan a lawk ta bur a. Bar atang
chuan mi an rawn chhuak tam ta deuh a, mahse tumahin rawn tihbuai an tum lo. Paulie Gatto
chuan, “Lo kal rawh u, a tawk tawh.” tiin a au a, pa lian pahnihte chu carah rang taka zuang
lutin, Paulie chu a dawk chhuak nghal zawk a. Tu emaw chuan car pianhmang chu chhinchhiahin
a liscence numberte pawh a lo hre maithei, mahse chu chuan thil pawi a thlen lo vang. California
Liscence plate hman a niin chu pawh chu ruk a ni a, chubakah New Yorkah hian Chevy Sedan
car dum nuaih chuang lai a awm bawk.