THE GODFATHER
By Mario Puzo
Letlingtu :Lallawmawma (Loma Hmar)
Bu I
Then 4
takzet a. “In chhungkuain Johnny Fontane in hria tih min hrilh ngai miah lo.” a ti a. “Tunah
chuan nei tur chein duh ka thlang fel ta e.”
“Va biak i duh em?” tiin Michaela chuan a lo zawt a.
“Tunah chuan ni lo ve.” Kay chu a thaw hak a. “Kum thum chhung zet a zunah ka uai a.
Capitola a zai apiangin New York-ah ka kal ziah thin. Mi ropui tak a ni.”
“Nakinah kan va hmu dawn a nia.” Michaela chuan a ti a.
Johnny Fontane a zai zawha Don Corleone-a nena in chhunga an luh bo hnu chuan, Kay
chuan mak ti zetin, “Film Star lian leh lar Johnny Fontane-te angin i pa hnenah thil dil tur a nei
tih chu min hrilh tum miah suh aw.”
“Ka pa Godson a ni alawm.” Michael chuan a ti a. “Chubakah ka pa chu awm lo se
vawiinah hian Film Star lar tak a ni lo maithei.”
Kay Adams chu phur zetin a han nui a. “Thawnthu ropui tak a nih leh ngei dawn chu.”
Michaela chuan lu thing chungin, “Chu erawh ka hrilh thei lo ang che.”
“Min ring rawh.” Kay chuan a lo ti a.
An inhrilh ta nge nge a. Phurna leh hlimna tel hlek lovin a hrilh a. Kum riat hma lamah
kha chuan a pa pawh rilru hmanhmawh chi tak a ni tih leh chu thil chu a Godson kaihhnawih a ni
a, ama buaina angah a ngai hmiah a ni tih loh chu a sawifiah vak lem lo.
A thawnthu chu a tawi hle. Kum riat kaltaah khan Johnny Fontane chuan Dance band lar
tak nen zai lama hlawhtlinna nasa tak a nei chho a. Radio-a mite duh ber a ni chho a.
Vanduaithlak takin an band Leader, sumdawng lar tak a hming Les Halley chuan Johnny
chu ama hnena thawk turin Contract a lo sign pui ta tlat a. Chu chu chutiang lam hna thila hman
lar tak a ni. Les Halley chuan Johnny chu hawh kual tirin pawisa tam zawk chu a hui ta zel a ni.
Chu mi chungchanga indawrnaah chuan Don Corleone ngei chu a a hriang a hranin a
inrawlh a. Chu Contract atanga chhuah zalen tur chuan Les Halley chu Dollar singhnihin a dawn
a. Halley ve thung chuan Johnny-a thawh chhuah zaa sawmnga a lo phut thung. Don chu a nuih a
za hle. A dawnna zat Dolar singhnih chu singkhatah a ti tlahniam nghal a. Chu Band hruaitu, a
show business chhung bak khawvel pawn lam hre vak lo chuan, a man a tihhniamna chhan dik
tak chu a hre thelh ta duaih a. A lo hnial ta a ni.
A tukah chuan Don Corleone chuan Halley chu amah ngeiin a va hmu ta a. Ama rual
chuan Genco Abbandando leh Luca Brasi a hruai bawk a.
Thu hretu dang awm miah lovin Don chuan Les Halley chu a hmin a, Johnny Fontane-a
chunga a thuneihna chu a thlah ta tih lan tirna lehkhaah chuan a hming a ziak ta a ni. Dollar sing
khat lak theihna cheque a dawng ve thung a. Don Corleone-an a hmin theih dan chu, band leader
chal-ah Pistol chuktuahin minute khat hnuah chu lehkhaah chuan a hming ziak emaw a thluak
them emaw a kai dawn a ni tih a hrilh hmak a. Halley chuan a sign ta a ni. Don chuan a pistol
chu ak thain Cheque chu a pe ta bawk a.
A bak zawng chu thawnthu hlui a ni tawh a. Johnny chu ram chhunga zai thiam hriat
hlawh ber a rawn ni chho a. Holywood-ah rimawi lam khawihin chu chuan a studio tan
vanneihna a thlen a. A record chuan dollar maktaduaih chuang a siam chhuak bawk a. Chutah
Film Star nalh chungchuang zet mai nupuia neih a duh vangin a nupui a then a, a fate a
chhuahsan ta bawk. Chu nu chu ‘lepchiah’ zet a ni tih a hre thuai a. Zu a in nghek nghek a,
pawisa khelh a chingin hmeichhe dang a um thul. A zai theihna awrawl a hloh ta bawk. A record
te chu hralh a tla tawh lo a. Studio lahin a contract an pawtsei hek lo.
Tunah chuan a godfather hnenah a rawn kir leh ta a ni.
Kay chuan ngaihtuah muk zetin, “I pa hi i thik ve thin lo maw? A chungchang min hrilh
hoah reng reng hian midangte tana thil a tih thu a lang vek a. Rilru tha tak a ni ngei ang.” a han
nui saih a. “A thil tih danin tih dan phung pangngai a zui lo mai pawh a.”
Michaela chu a thaw hak a. “Chutiang vel chu a lan dan a nih ka ring. Mahse ka han hrilh
ang che aw. Ram daidartu ten hmar tawp an panna kawngah eitur dahthat theih chi lam an
hnutchhiah kual duah thin an tih kha i hre ve tawh em? Eng tik niah emaw an la mamawh palh
hlauh ang tiin. Chu chu ka pa duh dan hmang a ni. Eng tik niah emaw chuan sawng mite theuh
saw a la mamawh thei a, chutah chuan an puih ngei a ngai ve ang chu.” a ti a.
****
Wedding cake pho chhuah a nih chuan ni a tla ruai tawh a. Hlim taka au chungin an ei ta
hlawm a. Nazorine-an a bik taka a siam a ni a, creama chulh chhuah vek a ni a, a tui em avangin
Honeymoon hmang tura an chhuah dawnin mo chuan chu cake an kil mekna atang chuan a pawt
sawn hlawm hial a ni. FBI lam mite pawh hmuh tur an awm tak loh avangin Don chuan
hawihhawm takin a mi sawmte chu a tur hmanhmawh deuh ta bawk a.
A tawpah chuan kawtzawlah chuan Cardillac dum, seat hma lama Freddie-a awmna car
chauh chu a awm ta a. A pianhmang lian leh a upat hu ai daiha rangin Don chu a hma lamah
chuan a thu lut vut a. Sonny, Michaela leh Johnny chu a hnung lamah chuan an lut bawk a. Don
Corleone chuan a fapa Michaela hnenah chuan, “I thian nu chu amah chauha khawpuiah lama a
kal chu a ngaihtuahawm loh maw?” tiin a zawt a.
Michaela chu a bu nghat a, “Tom-an ka lo ngaihtuah ang a ti alawm.” Hagen-an a hna a
tlin avanga lungawi takin Don chu a bu nghat a.
Gas semrual hna thawhlai a nihna avanga harsatna tlem awmin Belt Parkway leh
Mahattan inkar traffic lamah nghawng a la nei deuh a. Darkar khat pawh tling lovah chuan
Cardilac dum chu French Hospital panna kawtthler lamah chuan a her lut ta a.
An tlan mek lai chuan Don Corleone chuan a fapa naupang ber chu School lamah a ti tha
em tih a zawt a. Michaela chu a bu nghat a. Chutah a seat hnung lama thu Sonny chuan a pa
hnenah, “Johnny an Hollywood lama a hna thilah i buaipui dawn tih a sawi a. Chuta va kala pui
turin min duh em?”
Don chuan chhum hmakin, “Toma zaninah a kal dawn a ni. Puih a ngai lo vang. Thil
awlsam tak a ni.”
Sonny Corleone chu a lo nui hawk a. “Johnny Fontane hian i siamthat theih a ring lo va.
Chuvang chuan chuta kal tura min duh ka ring a.”
Don Corleone chuan hnung lam a hawi a, “Engvanga ringhlel nge i nih?” Tiin Johnny
chu a zawt a. “I Godfather hian a ti ang a tih chu a ti zel a ni lo’mni? ka bum tawh reng reng che
em?”
Johnny chuan hlauthawng deuh takin ngaihdam a dil a. “Godfather, he thil buapuitu hi mi
lian pawimawh elkhen a ni asin. A duh dan i thlak tir thei lo vang, pawisa nen takngial pawhin.
Zawmpui lian tak tak a nei a. Bakah min haw bawk. Engtinnge i tih dawn tih ka hre lo a ni.”
Don chuan ngainatna avanga nuihza deuh chungin, “Ka sawi kha, i nei ngei ngei ang.”
Michaela nghawk zauh pahin, “Ka Godson hi kan tihrilhhai duh lo ang, a ni lo’mni, Michael?”
Michaela, a pa theihna la ringhlel ngai reng reng lo chuan, a lu a lo bu nghat a.
Hospital luhna lam an pan lai chuan Don chuan Michaela chu a banah a vuan a, midangte
chu an lo kal hmasa a. “College i zawh veleh, lo kalin min rawn hmu ang che.’ Don chuan a ti a.
“I duh zawng tak tur ruahmanna ka nei a ni.”
Michaela chuan eng mah a sawi lo. Don chu lungni lovin a nguk hruih a. “I nihna chu ka
hria alawm. I pawm loh tur thil ti turin ka ti lo vang che. Hei hi chu a bik thil deuh a ni. I duhna
kawngah chuan kal rawh, mipa i ni tawh alawm. Mahse school i zawh veleh ka fapa i nih angin
min rawn pan ang che.”
****
Genco Abbandando-a chhungkuate, a nupui leh a fate pathum chu a dum vek a incheiin,
choak rual khat ang maiin Hospital Corridor chhuat var tha takah chuan an lo awm khawm a.
Elevator atanga Don lo chhuak an hmuh chuan a venhimna ngai ni awm takin an rawn bawr
nghal a. Mrs.Abbandando chuan Don biangah chuan a fawp a, lungngai taka tap chungin, “Oh,
mi tha tak i va ni em! I fanu pasal neih ni a ni chungin i lo kal thei a nia.” a ti a.
Don Corleone chuan lawmthu sawi a ngai lo tih nan a kutin a han zap a, “Kum 20 chhung
zet ka inghahna lo ni tawh ka thian tan hian zahna ka lan tir lo ang em ni?” a ti a. Chu hmeithaini-mai-tur-i chuan a pasal chu zaninah a thi dawn tih a hrethiam miah lo tih a hre thei nghal mai
a. Genco Abbandando chu kum khat dawn lai he Hospitalah hian Cancer avangin a awm tawh a,
a nupui chuan chu natna runthlak tak chu nun phung pangngai angah a ngai lek lek hial tawh a
ni. Zanin pawh hi hun khirh deuh lai a ni a, a liam leh mai dawn niin a ngai a. “Lutin ka pasal
khawngaihthlak tak chu va hmu ta che u.” a ti a.
“A lam reng che a ni, a zahna lan tir nan inneihnaa lo kal a duh viau nangin Doctor-in a
phal tlat lo a ni. Chutah hetiang hun pawimawhah hian amah hmu tura i lo kal tur thu a sawi a,
mahse ka ring lo a. Ah, mipa hi chuan inthianthatna hi hmeichhia ai daihin in hrethiam zawk a
ni. Va lut rawh u, a lo lawm ngawt ang.”
Genco Abbandando Private room atang chuan Nurse leh Doctor an lo chhuak a. Doctor
chu la naupang tak, hmel khunkhan tak, thupe thang hmelpu zet, neinung tawk tak tih hriat tak a
ni a. Genco-a fanu pakhat chuan zak deuh tak chungin, “Dr.Kennedy, kan hmu thei ang em?” tiin
a lo zawt a.
Dr.Kennedy chuan chutiang zat lai an lo awm chu lungawi lo zetin a en hlawm a. Heng
mite hian room chhunga awm chu a thi mekin, na tuarin a thi lek lek tih an hre lo em ni le?
thlamuang takin thih tir se a tha zawk daih si a. “A chhungte tak tak tan chauh aw ni ang.”
Hawihawm deuh maiin a han ti a. Genco nupui leh a faten Pa tawi thau lam, tlai lam suit nalh lo
zeta inthuam thu tlukna ngaichanga a lam an hawi thap a hmuh chuan mak a ti hle.
Pa thaua chu a rawn tawng chhuak a, a aw-ah chuan Italian awphawi tlemte chauh a hriat
theih a. “My Dear doctor, a thi lek lek tih hi a dik em?”
“Aw” Dr.kennedy chuan a ti a.
“Chutia nih chuan tih theih i nei ta lo tihna a nih chu.” Don Corleone chuan a ti a. “A
mawh kan phur ang e. Kan thlamuan ang a, a mit pawh kan chhin tir ang. Kan phumin a vuinaah
kan tap ang a, chutah a nupui leh fanute hi kan enkawl bawk ang.” Chutiang teh tawla a’n hriat
chuan, Mrs.Abbandando chu a tap ta a.
Dr.Kennedy chuan a dar a chhin ak a. Heng thintlangmi ho laka thil sawifiah tum chu thil
harsa tak a ni. Chutih rualin chupa thil sawi dik mawlmang tak chu a hrethiam tho. A
mawhphurhna chu a tawp ta a ni. Mahse hawihhawm em em tho chung chuan, “Khawngaihin
Nurse in lo ngaichang dawn a nia, damlo laka engemaw tih tur a nei nual a.” a ti a, Corridorah
chuan a kalsan ta a, a Coat chu a phe ri hlap hlap a.
Nurse rooma lut leh chu an lo nghak ta a. Nakinah chuan lo chhuakin, an luhna turin
kawngka chu a lo hawnsak ta a. “A khawsik leh a na avangin a rilru a buai deuh a, tih phawklek
loh in tum dawn a nia. Chubakah a nupui tih loh kha chu reilote chauh awm in tum dawn a nia
aw.” tiin a lo hrilh sap sap a. Johnny Fontane-an a rawn kalpelh chuan a meng zau kawk a. A
hria tih lantir nan a lo nuih a, engkima inphal at niawm takin a a lo melh a. Johnny chuan nakin
lama la buaipui zui atan a rilruah a dahtha nghal hmak a, chutah midang chu a zui ve ta a.
Genco Abbandando chu thihna nen rei fe an intlansiak tawh a. Tunah chuan hnehin a
awm ta a, chau takin khumah chuan a lo mu a. Ruh hlang ni mai awm hi a ni tawh a, a sam hrisel
taka dum hlap thin pawh chu lazai hnawk niaih ang chauh a ni tawh. Don Corleone chuan phur
takin, “Genco, ka thian, nangmah an zahzia che lantir turin ka fate ho ka rawn hruai asin, en teh
hei, Johnny pawh hi, Hollywood atangin a lo kal vang vang a ni.”
Chu damlo na tak chuan hlim hmel taka a mit rawn mengin Don chu a rawn en a.
Tlangval ho chu a kut cher thiak chuan a chibai hlawm bawk a. A nupui leh a fate chu a khum sir
lehlamah chuan kalin a a biangah an fawp a, kut an vawn sak nghal bawk a.
Don chuan a thianpa kut chu a vuan a. Ngaihthlak nuam takin, “Tha chhuak vat vat la,
Italy-a kan khaw hluiah khan kan zin ang a, kan pate hovin an tih thin dan ang khan zu dawr
kawtah Boccie te kan khel ho leh dawn a nia.” a ti a.
Damlo chuan a lu a thing a. Midang zawng chu khum bul atanga kalsawn turin a zaizir a,
chutah Don chu a kut cher thiaka vuanin, tawng a han tum a. Don chu a kun hniam vat a, khum
bula chair-ah chuan a thu nghal a. Genco chuan an naupan lai chanchin sawiin a riat nawk nawk
a. Lungalhthei ang maia dum a mit chuan a ruka sawi duh a nei tih a rawn tilang a, a phun sep
sep a.
Don chu a han kun hniam lehzual a. A lo hmutu te chuan lu thing nar nar paha Don
Corleone mittui tla zawih zawih an hmuh chuan mak an ti kher mai. Phun sep sep aw chu a rawn
ring sauh a. Na tak tuar tih hriat tak, tumna nasa takin Genco chuan a lu a han kan a, a mita hmu
thei si lovin, a kutzungchal cher thiak chuan Don chu a kawk a, “Godfather, Godfather” tiin a au
chhuak a. “Thihna ata hi min chhanhim rawh, ka ngen a che. ka tisa hi ka ruh atangte hian an til
zo a, tisa lungin ka thluak an ei mek chu ka hre thei a ni. Godfather, min tidam rawh.
Thiltihtheihna i nei a ni. Ka nupui mittui hi hruk hul sak ta che. Corleone-ah khan kan infiam dun
thin a, tunah ka sualna avanga hremhmun ka hlauh em em laiin thi turin min hnutchhiah anga
maw?”
Don chu a tawng lo. Genco chuan, “I fanu pasal neih ni a nih hi, min hnial thei i ni lo.” a
tih chhunzawm a.
Don chuan zawi sup, thutak zet leh Pathian sawichhiatna rawngkai lo lang chu titawp
turin, “Ka thian.” a han ti a. “Chutiang thiltihtheihna chu ka nei tlat lo a ni. Min ring rawh, nei ni
ilang chuan Pathian aiin zahngaihna ka ngah zawk ngei ang. Mahse thihna te, hremhmun te chu
hlau suh. Tuk leh zanin i thlarau tan Mass ka nei thin dawn a ni. I nupui leh i fate pawhin
theihtawpin an tawngtaisak che alawm. Chutianga Pathian zahngaihna dil nasat a nih te chuan
engtin tehlul nge Pathian chuan a hrem duh ang che?”
Ruh hlang ni mai awm hmela vertherna hmelhmang rawn lang chu a awihawm loh zawk
hial.
Abbandanda chuan, “Chuti a nih chuan ruahman fel vek a ni tawh a ni maw”
Don-in a chhan chuan a aw chu a vawt ruih a, ngaihthlak hrehawm takin, “Nang Pathian
zah lo pa, duh tawk tawh rawh.” a ti hrawk a.
Abbandando chuan lukhamah chuan a lu chu a nghat chawrh a. A mit beiseina tlemte
avanga de sawr pawh chu a chuai zo ta. Nurse chu roomah chuan rawn lut lehin midang ho chu a
hawl chhuak ta hlawm a. Don pawh chuan thawh a han tuma mahse Abbandando chuan a kut
rawn phar chhuakin, “Godfather” tiin a ko a, “Hetah awm la thihna chu min hmachhawn pui teh.
A hmuh che chuan a hlau anga thlamuang takin min awm tir maithei asin. Emaw, Thu i lo
sawiin, i lo hmin thei mial maithei asin, ni lo’mni?” Don chu nuih sawh niawm takin a mit a han
siai khum a, a thutak lutuk tawh bik lo a. “Chubakah thisena ka unau i ni miau a.” Don chuan a
lo hnial mai ang tih hlau niawm takin a kut chu a han hmer salh a.
“Ka kiangah awm tlat rawh aw, i kut ka lo vuan teh ang. Midang kan lehkhalh thin ang
khan he sawnchhepa pawh hi kan lehkhalh thei ngei ang. Godfather, min phatsan suh aw.”
Don chuan midang ho chu room atanga chhuak turin a ti a, an chhuak ta vek a. Don
chuan Abbandando kut pahnih chu lain a kut nen a suih zawm a. Nem tak leh thlamuan reng
chungin thihna chu an nghak dun ta a ni. Mihringte tana hmelma huatthlala ber, thihna lak
atanga Genco Abbandando nunna chu Don chuan chhuhsak thei tak tak tur ni awm takin a lang a.
*****
Connie-te inneih ni tawp dan chu ama tan chuan a duhawm hle a ni. Carlo Rizzi chuan
moneitu a nihna anga a tih tur chu tha tak leh thiam takin a hlen chhuak a. Mo pawisa ip chhunga
thilpek tling khawm, dollar singhnih zet chuan a tihphur vang a ni tel bawk. Monu chuan a
pawisa ip a pek ai maha ropui zawkin a thianghlimna chu a hlan ta bawk a. Pawisa ip
chungchangah hian Carlo chuan a mit a hnek duk sak a ngai tih mai loh chu.
Luci Mancini chuan ama inah Sonny Corleone-an a rawn call ngaichangin a awm deuh
reng a, chhuah puiah a rawn sawm a beisei viau a ni. A tawpah chuan a va call ta zawk a, mahse
hmeichhe awin a lo chhan takah chuan a dah leh daih a. Inneihnaah khan darkar chanve lai mai
amah leh Sonny chu a rualin an bo dun tih kha mi zawng zawng deuhthawin an hria tih te,
Santino Corleone chuan sa seh tur dang a hmu leh ta tih te, a farnu ‘mo thian’ chungah ngei ‘a
hna a thawk’ tia thang chhuak mek te chu a hre ve lo reng reng a ni.
Amerigo Bonasera chuan mang chhe pui mai a mang a. A mumangah chuan Don
Corleone, lukhum zum varh khum a, kutkawr bun chungin silai kah chik nuk mai ruang hi a
ruang sawngbawlna hmun kawtah chuan a lo hlangthla mek a, “Hre reng rawh Amerigo, tuma
hnenah sawi loh tur. Rang rakin phum nghal rawh” tiin a lo au a. Ring takin rei tawk fang a rum
chhuak a, a nupui chuan kaithovin, “Eh, mipa tak hi chu aw.” tiin a phun niah niah a, “Inneihnaa
kal zawh hlima mang chhia han man mai chuh.”
Kay Adams chu New York City Hotelah Paulie Gatto leh Clemenza chuan an thlah a. Car
lian leh changkang zet chu Gatto chuan a khalh a. Clemenza chu a seat hnungah thuin, Kay chu
Driver bul seat hma lamah chuan a thut tir bawk a. Ram dang mi an ni tih a hriat hlein a hria a,
an awphawi chuan Brooklyn lam awphawi ang hlein a hre bawk. An pahnih chuan an ngaihsakin
an hawihhawm dun kher mai.
An tlan chhung chuan engemaw mai mai sawiin a titi pui a, Michaela chungchang an
sawi laia an ngaihsan zia leh an zah zia lo lang thin chu mak a ti hle. Michaela chuan a pa
khawvelah chuan khawvel dang mi ang mai niin a ngaihtir thin a. Tunah Clemenza chuan
‘putara’ chuan Michaela chu a fate zinga tha ber niin a ngai a, chhungkaw sumdawnna rochungtu
tur a ni tih a hrilh a ni.
“Eng ang sumdawnna nge ni a?” Kay chuan pangngai thei ang berin a zawt a.
Paulie chuan wheel a herh pah chuan a rawn melh zawk a. A hnunga Clemenza chuan
mak tih hmel takin, “Mike an a hrilh miah lo che em ni? Mr.Corleone chu US-a Italian Olive Oil
la luttu lian ber a ni alawm. Tunah chuan indona a lo tawp ta lehnghal a, sumdawnna chuan
hausakna tak tak a thlen dawn a ni. Mike te ang naupang vengva deuh a mamawh a ni.”
Hotelah chuan Clemenza chuan clerk dawhkan thleng kal ve a tum tlat a. A lo hnial deuh
chuan ani lah chaun, “Boss-in him takin i thleng ngei tih hriat a duh tlat alawm, ka tih a ngai tlat
a ni.” a ti liam mai a.
A room chabi a lak hnu chuan Clemenza chuan Elevator thlengin a va thlah leh a, a luh
thleng chu a nghak a. Ban a vaiin a nuih a, Clemenza-an hlim hmel taka a lo nuih sang avang
chuan mak a ti deuh hle. Nulain a hmu thei lo ta maw tih veleh clerk thutna lamah chuan a kal
vat a, “Tu hmingin nge a inziah luh?”
Hotel Clerk chuan a lo melh rum al a, Clemenza chuan pawisa tel tereuhte hi Clerk lamah
chuan a han theh phei a, a ni chuan lo chharin, “Mr. and Mrs. Michael Corleone” a tit a thuai a.
Car-ah chuan Paulie Gatto chuan, “Nu tha tak a nih kha a.”
Clemenza chuan, “Mike chuan a khuaikhem tawh a ni chiang mai.” Chu ti a nih loh
chuan, tiin a ngaihtuah zui a, an innei tak tak a ni ngei ang. “Zingah hma takah min kaitho ang
che.” Gatto hnenah chuan a ti a. “Hagen-an kan tih nghal tur thil a nei a ni.”
*****
Chawlhni zana Tom Hagen-an a nupui inthlah nana a fawh a, Airport lama a inkhalh
chuan a tlai tawh hle a. Thlawhnaa duhsak bikna (Pentagona Staff general Officer-in lawm taka a
pek) a neih avangin Los Angelese lam a panna tur thlawhna lamah harsatna a nei lem lo.
Chumi ni chu a buai ni tak ni mahse ni lungawithlak tak a ni tho a ni. Genco Abbandando
chu zing dar thumah a thi a. Hospital atanga Don Corleone a lo kir chuan Hagena hnenah chuan
chhungkaw tan official takin Consigliere thar a ni ta tih a rawn hrilh a ni. Chu mi awmzia chu
Hagen chuan thiltihtheihna a nei chauh a ni dawn lo a, a hausa hle dawn bawk a ni.
Don chuan hnam tihdan phung rei tak lo ni tawh chu a bawh chhe ta a ni. Consigliere chu
Sicilian thisen hlang atanga chhuak a ni fo thin a, Hagen chu Don chhungkaw zinga chhiar tel a
nihna vang ringawt chuan chu dan chuan a huam tel ngawt chuang lo. Thisen lam a ni tlat.
Omerta dan, thuneitu-te hnena tawng chhuah lohna dan hmanga seilian Sicilian mite chauh he
Consigliere hna pawimawh tak chelh tura rinhlawh an ni thin. Chhungkaw hotu ber, Don
Corleone, roreltu ber leh Don thupek tihlawhtlingtute inkarah chuan thil inchherchhuan pathum a
awm a. Chumi avang chuan a chung ber thlenga chhui theih a ni ngai lo. Consigliere chu a
rinawmlo a nih ngawt loh chuan. Chawlhni tukah khan Don Corleone chuan Amerigo Bonasera
fanute kut thlaktu rawltharte chunga thil tih dan tur chu chiang takin a sawi a. Mahse a falin Tom
Hagen hnenah chu thupek chu a hrilh a ni. Chhun lamah Tom Hagen chuan hretu dang awm
miah lohnaah, Clemenza a hriattir chhawng leh a. Chu thupek tihlawhtling turin Clemenza chuan
Paulie Gatto hnenah a hrilh ve leh a ni. Paulie leh a hote chuan he thil hi engvanga ti nge an nih
tih leh tunge thu petu ber tih an hre miah lo a ni. Chu inkhaidiat inzawmnaa a tu emaw ber chu
phatsantu a ni thei a, ani chuan Don a inrawlh tih a a hre thei mai ang; mahse, chutiang chu a la
thleng lo nangin, theih loh chu a ni lo a ni. Chu thil sutkianna chu hriat a ni bawk a, inzawmna
pakhat chu a bo hmak a ngai ta a ni.
Consigliere hna chu a hming ang chiah chu a ni bawk a. Don thurawn petu a ni a, a kut
ding lam, a thluak bur a ni. A kawppui ber leh a thiantha ber a ni bawk. Zin chhuahna tur
pawimawh tak a awmin Don Car a khalh sak a, Conference a awmin Don ei tur te, Coffee leh
sandwitch leh Sikret thar lam tak te a ngaihtuah sak thin. Don-in a hriat ang zawng zawng
emaw, a hriat ang zawng zawng deuh thaw, a thiltihtheihna bulpui zawng zawng chu a hriat ve a
ngai a ni. Don chhiat vekna tura thil ti theitu a ni bawk. Mahse, Sicilian chhungkuate America-a
an inbun ngheh hnua an hriat theih chinah Consigliere tumahin Don an la phatsan ngai lo a ni.
Chutah chuan hma lam hun a awm tlat lo a ni. Consigliere zawng zawng chuan an rinawm tlat
chuan, an lo hausain thiltihtheihna neiin mi zah an hlawh dawn tih an hria a. Vanduaina lo tawk
palh ta se, an nupui leh fanaute chu chenna In pek an ni ang a, a dam lai emaw, a zalen lai ang
thovin ngaihsak an hlawh dawn a ni. A rinawmna a vawng tlat a nih chuan.
Thil thenkhatah chuan Consigliere chuan Don aiawhin, Don inrawlh si loa langtlang takin
hna a thawk fo a. Chutiang thil ti tur chuan Hagen chu California lamah a thlawk mek a ni. He a
thil tih tura hlawhtlin leh hlawhchham chungchangah chuan Consigliere hna a thawhna chu
nghawng thui hle dawn tih a hria a. Chhungkaw sumdawnnaah chuan Johnny Fontane chuan
indo filma a chanvo awh tak chu a chang emaw chang lo emaw, a pawimawh vak lo. A
pawimawh zawk chu tun zirtawpnia Virgil Sollozzo nena inhmuh hun tur Hagen-an a ruat chu a
ni. Mahse Hagen chuan Don ngaihah chuan chung thil pahnihte pawimawh dan chu a intluk
chiah tih a hria a. Consigliere tha tak tan chuan chu thil chu a tihfel ngei tur a ni.
Thlawhna innghawr vel chuan Hagen chu a tihlauthawng ru tan der a. chumi ti reh tur
chuan Hostess chu kovin Martini a order a. Movie Producer, Jack Woltz mizia chu Don leh
Johnny chuan chiang takin an hrilh tawh a. Johnny-an a sawi zawng zawng atang chuan Jack
Woltz chu a hmin thei dawn lo tih a hre mai a. Mahse eng thil pawh ni se Don chuan Johnny laka
a thutiam chu a tihlawhtling ngei ang tih a hria a ni. A tih tur chu va biak pawh leh inremsiamna
neihpui chauh a ni.
Seat hnung lam ngheng ar ar pah chuan vawiin lama thupawimawh a dawnte chu a han en
let thuak thuak a. Jack Woltz chu Hollywood-a Movie Producer lian tak tak pathum zinga
pakhat a ni a. Studio a nei a, a hnuaiah star rual dawrzawn khat chuang zetin Contract an nei
bawk. War Information, Cinematic Division-a US president Advisory Council-ah a tel a, chumi
awmzia chu indona chungchang Movie hmanga thehlarna kawngah a pui a ni. White house-ah
zanriah a kil tawh a. Edgar J.Hoover pawh Hollywood-a a inah intihlim turin a sawm tawh bawk.
Mahse chu chu a lan dan anga rilru dek tak chu a ni lem lo. Chungte chu Sorkar hna avanga
inlaichinna mai a ni a. Woltz chuan Politics lamah thiltih theihna a nei lem lo a, a chhan chu mi
kalh zawnga chet nuam ti mi a nihna te, hmelma tam tak a insiam thei a ni tih ngaihtuah miah
lova chapo uchuak taka a thuneihna kenkawh nuam timi a ni vangte pawh chu a ni maithei e.
Hagen chu a thaw hak a. Jack Woltz ‘enkawl’ dan tur chu a awm lo a ni. A briefcase chu
hawngin hna han thawh a tum a, mahse a chau viau mai a. Martini chu order lehin a nun chu a
chhui kir ta zawk a. Inchhirna a nei lo va, chu ai chuan vannei takzet niin a inhre zawk a ni. a
chhan chu engpawh ni se, kum 10 kal taa a duhthlanna chu a tan a that zia a la lang zel a ni. A
hlawhtling a, puitlingin an beisei ang hlimna a neiin, nun hlawkna a chhar a ni.
Tom Hagen chu kum 35 mi, mi pangngai ai maha sang a ni a. Ria thal mai, hmel
pangngai tak a ni. Dan hremi a ni a, kum thum chhung zet Bar a pass hnuah a practice tho
nachungin Don Corleone tan hian dan lam chungchang chipchiar chu a khawih lo a ni.
Kum 11 mi a nih chuan kum 11 mi ve tho Sonny Corleone-a infiam pui thin a ni a.
Hagen-a nu chu a mit delin Hagena kum 11 a nih kum chuan a boral a. A pa ve thung chu
zu in nasa tak niin, zungawlvei beiseibo mai a ni ta thuai a. Mistiri taima tak a ni a, a nunah thil
dik lo engmah a la ti ngai lo. Mahse a zu in chuan a chhungkua a ti darh zo a, amah pawh chu zu
chuan a tihlum ta nge nge a. Tom Hagen chu fahraha hnutchhiah a niin kawtthlerah chuan a
vakvai a, hulhliap velah te a mu mai thin. A farnu chu hnuchham Inah dah a ni a, kum 1920-a
Social Agency te chuan an thlazar hnuaia awm chak lo tak mipa naupang kum 11 mi han chhui
zui kha an chak tehchiam lo a ni. Hagen pawh chuan mit natna a vei ve a. Thenawm khawvengte
chuan chu chu a nu hnen atanga a kai emaw inthlahchhawn thila a kai emaw a ni a, inkai chhawn
theih a ni tiin an sawi ru sep sep a ni.
Hawisan leh kawmserh a ni ta a. Sonny Corleone, kum 11 mi rilru tha tak leh ngeng
ngalh mai chuan a thian chu an inah hruai haw hmiah a. Tom Hagen chu Spagheti sa tha tak leh
Tomato Sauce mawm tha tak ei tir a ni a, a tui dan chu a theihnghilh leh ngai tawh lo. Chutah a
mutna tur khum thleh theih chi hi pek a ni ta bawk a.
Don Corleone chuan engmah sawi lo leh chumi chungchang sawihona engmah awm lo
chuan an inah chuan a chen tir hmiah a. Amah Don Corleone ngei chuan Specialist Doctor
hnenah hruaiin a mitna pawh chu tihdam a ni ta a ni. Don chuan College leh law School-ah a kal
tir a. Heng chhung zawng hian Don chu pa angin a khawsa lo a, mahse amah enkawltu, Gaurdian
angin a khawsa zawk a ni.
Pain fate a ngainatna ang chu awm lo mahse Don chuan a fate chunga a lantir aia nasa
hawihhawmnain a enkawl a, pa angin a chungah chuan a awm ngai lo. College a zawh hnua Law
College-a kal pawh chu Hagen duhthlanna a ni. “Briefcase khai Lawyer chuan silai keng mi za
aiin thil a ru tam thei zawk” tia Donin vawikhat a sawi a lo hre fuh a ni. Chutih lai chuan Sonny
leh Freddie chuan high School an zawh hunah chhungkaw sumdawnna lama thawh duhin a pa an
lo zar buai ve sek bawk a. Michaela chauh chu College kalin, Pearl harbour beih a nih hnu
lawkah Marine-ah a inziak lut daih bawk si a ni.
Bar exam a zawh hnu chuan, Hagen chuan chhungkaw din turin nupui a nei ta a. A nupui
chu New Jersey a mi Italian nula naupangte a ni a. Inneih zawh hnu chuan, ni e, inneihna chu
Don Corleone-a inah neih a ni a. Don chuan Hagen hnenah chuan a thawh duh zawnga puih a
inhuam thu, Clients pek te, a Office chei sak te, sumdawnna bul tansak te chu a hrilh a.
Hagen chuan a lu kunin, “I tana thawh ka duh a ni.” Don hnenah chuan a ti a.
Don chuan mak a ti hle, a hlim bawk. “Tunge ka nih i hria maw?” tiin a zawt a.
Hagen chu a bu nghat a. Don thuneihna zauh dan tawk chu a hre tak tak hauh lo a. Genco
Abbandando a dam loh hnua Consigliere a nih lailawk hma zawnga kum sawm chhung zet a zui
chhung pawh khan a hre tak tak chuang lo a ni. Mahse bu nghat chungin Don mitah tak chuan a
en a, “I fate ho anga i hnena thawh ka duh a ni.” Hagen chuan a ti a. Chu mi awmzia chu a lakah
chuan a rinawm a, pa ang chiahin a en tihna a ni. Don chuan, chu chu a ropuina siam belh zeltu a
ni tih hre chungin, a in chhunga Toma a lo luh atanga a vawikhatna atan pa angin a lainatna a
lantir ve ta a ni. A kutin Hagena chu a kuangkuah a. Chuta tang chuan fa ang takin a en chho ta a
ni. A chang erawh chuan, Hagena hriattir nawn ai maha amah inhrilh hre nawn ni awm takin, “I
nu leh pa dik takte theihnghilh ngai suh,” a ti leh bawk thin a ni.
Hagen chuan a theihnghilh ngai lo reng reng a ni. Hagena nu chu phutkhat deuh leh che
tawp zet a ni a. Thisen tlakchham natna nei zuiin a fate hmangaihna chang a hre lo a, emaw a
tilang duh lo pawh a ni ang e. A pa lah chu Hagena chuan a haw hle mai bawk. A thih hmaa a nu
mitdelna chuan a tibuai hlein, ama mit rawn na leh kha chu hremhmun tenau a ni ber mai. A mit
chu del ve ngei tur niin a ngai a. A pa thih hnuah chuan Tom Hagena ngaihtuahna chu a tawi tak
a. Kawtthlerah a thih hun nghakin, Sonny an hulhliapa a muhil lai a rawn hmuh a, a hruai haw
hma loh kha chuan a vak vel tawp mai a ni. Chu mi hnua thil thleng chu thil mak a ni hrim mai.
Mahse kum eng emaw zat chhung chu Hagen chuan mangchhia a mang fo a, a mumangah chuan
mitdel niin a lo thang lian a, tiang hawlin kawtthlerah kut a dawh a, a hnungah chuan a fate
mitdel ve bawk chuan an tiang tereuhte hawl chungin an lo zui dat dat thin. Zinga a han than
harha a harh chian chiah chuan Don Corleone-a hmel chu a thluakah a nem kai a. Him ta riauin a
inhre thin a ni.
Mahse Don chuan chhungkaw sumdawnnaa a tangkaina belhchhah tur tiin kum thum
chhung lai dan lam chu Practice turin a ti tlat a. He a tawn hriatna hi nakinah chuan a la
pawimawh hle dawn a ni, chubakah chu thil chuan Don tana thawh loh a hlauh thinna rilru a paih
bo ta bawk a. Don Corleone an a thunun law firm lar leh lian zet pakhatah chuan kum hnih
chhung zet training chu a nei ta a. A ti thain chhungkaw sumdawnnaa hun puma a thawh hnuah
pawh a hnu kum ruk a liam hnu thleng pawh chuan Don Corleone chuan sawiselna tur a hre miah
lo a ni.
Consigliere dinhmun chelh lailawk tura tih a nih khan, Sicilian chhungkaw thiltithei tak
tak dangte chuan hmusit takin Corleone chhungkua chu ‘Irish Gang’ tiin hming an vuah sak a.
Chu chuan Hagen-a nuih a tiza hle. Chu chuan Don chu thlakin Chhungkaw lu ber a ni thei dawn
lo tih a zirtir nghal bawk. Mahse a dinhmunah chuan a lungawi a, chu chu a tum a ni ngai lo.
Chutiang tumna chu a chunga thil tha titu leh chu thiltha ti tu thisen zawmpui te ‘zah lohna’ a ni
dawn tlat a ni.