Lka Chawngthu
1. THU HMA:
Ram chhung sum leh pai inrelbawlna (economy) leh chhungkaw sum leh pai
inrelbawlna (family economy) a chhiat miau chuan, Ram chhungah sualna hrang
hrang- Rukrukna, inrawkna, tualthahna, midang chanai eiruksakna, smuggling etc.
a thleng tam tial tial dawn a ni..
Ram inrelbawl dan a fel lohva, rorelna dik leh fel a awm loh chinah
chuan, tute pawh hi an beidawng a, thih an hlau lova, tharum thawhna a thleng
fo ṭhin a ni.
2. SORKAR LEH KOHHRAN TAX:
1) Sorkar lakah:
Sorkar chuan kan ram neih leh kan sum lak luh dan a zirin revenue leh
income tax te, ellectric bill, tui bill etc.te min chawitir ṭhin a.
Chutiang hunah chuan Mipui (Kristian, Kohhran member ni vek si) te
chuan, Sorkar laka pawisa chhiah kan chawi tur a tlem theih nan, a tlem thei
ang bera kan ram leh kan sum lak luhte sorkar hnenah report kan tum ṭhin a,
sorkar laka tax chawi tlem kan beisei vang a ni.
2) Kohhran lakah:
Kohhran lakah erawh chuan, sorkar laka kan chet dan letling chiah khian
chet kan tum a.
A tam thei ang ber sum la lut anga in ngaih a, a tam thei ang ber
"Sawma pakhat" pek theih kan tum thung!!
Kum tawp lamah Kohhranin kan sawma pakhat pek dan list a tihchhuah fo
avangin, pe tlem bik nih kan hreh a, kan theih ang anga SUM lak luh duhna
thlarau chuan min pawl a, mawi leh maawi lo, dik leh dik lo ngaihtuah lovin,
Kohhrana Sawma pakhat a tam thei ang ber chhun luh dan tur kan ngaihtuah ta a,
chu chuan "Thianghlim lem lova sum lak lih tumna kawngah" min hruai
ta vek a ni.
3. A NGHAWNG CHHUAH:
Kan ram hruaitu lu berin 'A unaute pawisa a kawl hawh aṭanga Sawma
pakhat tam tak" a pek theih a, a lawina Kohhranin lawm taka an lo pawm
thei zel a nih chuan, a kaihhruai mipuite tan chuan midangte pawisa kawl
hawhsak aṭanga Sawma pakhat bakah, Tual chhung leh Ramthar tana pawisa tam tak
thawh theih kha an 'dream' ve tur a ni tlat!!
Sorkar lakah a tlem thei ang ber "Tax" chawi kan duh laiin,
Kohhran lakah erawh "A tam thei ang ber TAX (Sawma pakhat leh a behbawm,
Tualchhung, Ramthar, thawktu chawmna..etc) pek vek kan duh si a.
Hei hian a nghawng chhuah chu- Ruk rukna, kut tling lova sum lak luh
hreh lohna, Kuhva ro tawlh ruk, drug hralh ruk, Zu zawrh ruk bakah, mahni thawh
phu lohva EIRUKNA te a rawn hring chhuak ta zel a ni.
4. TLIPNA:
Kan ram hruaitu lu ber, kan CM meuh pawh in-a kut tling lova sum a lak
thup mawi nan, "Ka unaute ta ka kawl hawh," a tih duh miau si chuan,
A enkawl Zoram leh Mipui tam zawkte tan chuan "In rawk, Ei ruk, Tualthah,
Smuggling etc." te hi hrehna chhan tur a lo awm miah lo a ni.
Ram mipuite suala an tlukna chhanah hian, Politician leh kohhran hruai
tute'n a mawh la ngam hram tawh teh u.
Revolution a lo thleng mek a, Mipui beidawngte hian "Hello
China" tih pahin pawisak an nei lo tial tial tawh e.
Heti ang zela kan ram a kal chuan, ATM booth mai ni lovin, CM leh
Minister te chenna bakah, Sorkar hna thawk lian (bereaucrats) te chenna In,
Chatuan lungpui ang tluk zeta rinawm tlut te hi kan la bomb darh vek duh lovang
tih a sawi theih ta miah lo a ni.
Mipui beidawngte hi khawvela mi hlauhawm ber berte an ni zawk e.