Dr.
R.K.Lallianthanga
Mizoram State Election Commission chuanLunglei MunicipalCouncil (LMC)
inthlan hun atan March ni 29, 2023 a ruat ta a . Inthlan hmachhawn turin
political party hrang hrang leh Lunglei mipuite an inbuatsaih ta .
Vai len vawikhatna hmain Lungleiah hian Sailo Lal, Vansanga a lo lal
tawh a . A hun lai hi 1830-1860 vel a ni awm e . Vansanga chu a khua leh tuite
nen Chhipphirah an insawn tak avangin Lunglei khua chu luahtu awm lovin hun eng
emaw chen a awm ta a. Vai len vawihnihna hnu kum 1889 -a British sorkarin Fort
Lunglei a din ațang khan Lunglei khawpui chu din thar leh niin, tun thlengin
mei mit lovin a lo awm ta a ni .
Lunglei hi Mizoram chhim lama mizote khaw hlun tak a ni a . British hun
lai khan , April ni 1, 1891-ah Lunglei hi South Lushai Hills hmunpui-ah hman
țan a ni a; Bengal sorkar awpna hnuaia dah a ni . Hetih lai hian Aizawl chu
June ni 3, 1890-ah North Lushai Hills hmunpui a ni a, Assam sorkar hnuaia dah a
ni thung .
Kum sarih hnu, April ni 1, 1898 ațangin North Lushai Hills leh South
Lushai Hills chu district pakhatah siamin , Assam sorkar hnuaiah dah a lo ni ta
a, hmunpui atan Aizawl hman a ni ta a , Lunglei chu Sub Division hmunpui a lo
ni ta a ni . Heta țang hian Lunglei dinhmun chu a hniam ta hle a , hmasawnna
awm ve bawk mahse , a chak lovin Aizawl nen tehkhin theih pawh a ni ta lo.
Kum 1952, April ni 26-ah Lushai Hills Autonomous District Council a lo
piang ta a, January ni 21, 1972-ah Union Territory-ah hlankai a lo ni a, kum
1987 February ni 20-ah State ah hlankai a lo ni ta a . Mizoramah
sorkar/ministry eng emawzat kan lo nei tawh a , kan sorkar hruaitute zingah
Lunglei pawimawhna hria leh a hmasawnna tura theihtawpa țan la awm țhin bawk
mahse, Lunglei khawpui hmasawnna hian beisei a phak lo hle.
Zofate tana chhim lam khawpui hlun , ram leh hnam hmasawnna atana kawng
tam taka sultutu , Mizoram tana mi ropui leh hlu tam tak chherchhuaktu ; chhim
lamah chuan zirna hmunpui, Kohhran hmunpui , sorkar department hrang hrang
inbunna, hmun hrang hrang ațanga mi fel tak takte pem khawmna a ni nachungin
tun dinhmunah phei chuan ngaihsak a hlawh țha tawk lo hle, tih hi mi tam tak
ngaihdan niin a lang . Mi țhenkhat rilruah , tun ang dinhmunah chuan Municipal
Council han neih pawh hi kan tlin ngut dawn em ni, tih ngaihdan a awm tho laiin
sawrkar chuan Municipal Council neih a lo rel thlu ta chu a ni a .
Kan ti ta rau rau a nih chuan tuna Lunglei Municipal Council lo ding
tur hi a hming chauha ding ni loin, a tak taka hma la thei turin sawrkar hian
ruahman se, a lawmawm ngawt ang . Tun dinhmunah hian Lungleiah hian mihring
cheng kan la tam loa, sorkar hruaitute leh mipuiah tumna tak tak a awma, ngun
taka ruahmanna siam a nih chuan khaw nuam tak , felfai taka inrelbawl thei
khawpui a ni thei ang .
Ward sawm leh pakhat(11)-ah țhenin, ward tin aiawh pakhat țheuh kan
thlang dawn a ni a . Hmeichhe tan ward pali(4) reserve a ni a. Kan aiawh thlan
chhuahte kovah hian Lunglei khawpui kal zel dan tur chu thui tak a innghat dawn
a . Chuvangin, tun țum LMC inthlan hi a pawimawh a. Lunglei mipuite’n ngun taka
kan ngaihtuaha, thlan tur awm takte kan thlan chhuah a pawimawh hle ang.