~David Sailo
Kan pawm emaw
pawm lo emaw, an zinga tel ve ngei, tu puh mah nilo, Dr.Maj.J.Thanruma
(Salvation Army) in a sawi a ni. Hetiangin ;
"Mizoram
ti chhetu chu Kohhran hruaitu ho, Pastor ho, Salvation Officer ho te, Pastor ho
leh Politician ho te hi kan ni!! Na inti deuh maithei. Kan nihna dik tak a nih
avangin Pastor ho in Kohhran pawl ram hi kan khêl nasa em em mai a, kan ṭhen
hrang vek a ni. Kohhran ang hian tumah kan in lungrual lo.
Kan Doctrine kan insual tir a, kan in Debate thul a, kan in sual lo chauh a ni. Kan ramthim Area ni selangin dik tak chuan Mission Field pakhat, Damparengpui ah ringawt pawh English Medium pathum a awm !! Kohhran hi a dik tak chuan pawl Feeling, Kohhran Feeling hian min ti chhe em em mai a, in khel kan thiam khawp mai. Hei hi kan sim loh chuan kan chhe dawn.
Politic pawh khelh kan tum zel. Kohhran kalsual hian Politics, Party zawng zawng hi fan loh reng reng a nei lo. Chutiang ang chiah chuan Politician te pawh hian Politics in khêl a, Political Party in ruihchilh a, in ENNAWM loh a ni!! Chuvang chuan kan ram hruaitu kan Politician te leh Pastor Level ah hian Revival, Turning back a thlen loh chuan kan ram hi a chhe vek dawn tih hi ka tlangau pui ve lai mek a ni"
A ROPUI A SIN :
Kohhran hruaitu zinga mi ngeiin mahni inhmer tel ngama hetiang a sawi
ngam hi faktlak a ni. Hetianga ram chhiatnaa mahni inbel ngam, tute emaw mitmei
veng lo, Post ṭha zawnga Kohhran chhungah pawh ram Politics tenawm aia duh
chhia, mahni hamṭhatna zawng lo Sakhaw hruaitu hi kan mamawhna a sang khawp
mai!!
KOHHRANAH CHUAN :
SUM kan pathian mek a, Pastor bial fang thupui ber chu Finance a ni a,
Pastor in a Control theih Bial Upa an tam chuan kan thupui chu CHANCHINṬHA aiin
THILPEK a ni !! Heng ho vang hian kan biak Pathian chu SUM mamawh em em, rethei
pachhe tak, suma in nghat tlat, sum tel lova rorel thiam lo Pathiana kan chhuah
mek tak ni. Hei hian Kohhran chu SUM nei te vanneihna leh zahawmna hmun,
lemchanna, khawvel hausakna chhawm luhtirna a thlen mek a, heng ho hi chu
Pathian engkimtithei, engkim siamtu betu ni lovin, Pathian rethei, pachhia,
suma innghata chhuaha, mahni nawmsakna zawn nan maia kan Pathian hmang ṭangkaitute
mai an ni. Kan Pathian biak hi heti teh chiama sum mamawh rûai, thilpeka tlawn
ngai a ni love!!
Kohhran hnuaia thawk tura lak ṭheuh ṭheuh zingah Pastor te chu an sang
fal nalh a, rawngbawlna aia eizawnna (Professionalism) in a chiahpiah mah tawh
zawk, thilpek pe thur thur tura Kohhran ho tur taima zet zet Pastor hi kan thar
hnem ta fu mai. Anmahni anga Kohhran chhawr tho, Missionary te chu dah hniam
leh nep thiam em em, Pastor chu Contract a lak an awm loh laia Missionary
(Chhuak tura mipui sawma a hminga mawia an auhpui fote) chu Contract/Temporary/Volunteer/Substansive etc.
mak tak taka lak thliah thluah awm bawk si. Pastor Volunteer a chhawr, bial
vawng, Contract a lak an awm hun hunah an inpekna kan hmu fiah chauh ang!!
KHAWVELNA :
Mahni fate Kohhran hnuaia thawk tura duhsakna ti lang hreh lo, chanvo ṭha pe hreh lo, mi sawi sep pawh hre pha lo khawpa tlangsang, Politics ai pawha hri chhe fahran Kohhrana senglut hreh lo, khawvel milian tlawn lama Number One kan ngah telh telh chuan Dr.Maj.J.Thanruma sawi ang hian Politics a kan harhchhuah tikah Kohhranah hian hetiang lam harhna hi Zoramah a la thleng ngei ang. Tunah chuan Mizoram in TUINU pahnih kan hâk mek a nih hi!!
Dawt pawh
sawimawia thiamchan tumin Politician ten therhlo chhe lutuk hmangin ram
Politics an kalpui mek a, Kohhranah Pastor ten thilpek (SUM) tlakhniam hlauin
mipui chu nihna chanvo hmangin min bual â mek bawk a, chumi karah chuan
Thlaraubo te bo leh zualna ram kan chang zo ta a nih hi. Bible chuan
"Tangka sum ngainat hi sual tinreng bul a ni" a tih mekah hian
Politics leh Kohhran hi a LUANGLIAM mek a nih hi.
TLIPNA :
Kan ram hian Sum tel lo harhna kan mamawh a, Thawhlawmin hmun sang ber
a chanlohna hmun rawngbawlna a mamawh
bawk, nunna neilo phul lem aiin nunna nei infiammite zawk hlutna kan man hunah
khua a var mahna!!