Mizoram Presbyterian hnuaia Kristian Thalai Pawl rorel inkhawm vawi
10-na, Zemabawk Kohhran Biak Inah neih chuan ruihhlo ngaite chhanchhuahna
kawngah nasa zawka hmalak an rel.
KTP rorel inkhawm neih zawh taka agenda zingah 'Central KTP-in ruihhlo
ngaite chhanchhuahna kawngah nasa zawkin hma la rawh se' tih chu pawm a ni a,
bial hrang hrang atanga kumin-a MLA inthlanpui neih tur puala tawngtai rual
rawtna pawh pawm a ni.
Kum 2025-a KTP rorel inkhawm thleng turin Chawnpui Kohhran an thlang a,
Youth Recreation Centre dinna atana hmalak zelnaah, YRC pualin KTP inkhawm vawi
khat thawhlawm pek leh, Synod hospital charity fund atan vawi khat KTP inkhawm
thawhlawm lak khawm te an rel a, kum 2024-25 chhunga thupui atan 'Tih takzet a
Lalpa rawngbawl' (I Kor. 15:58) tih an thlang a; kum 2023-24 chhung budget atan
nuai 84 sing 7 (84,70,000) pawm a ni bawk.
Report inkhawma an tarlan danin, KTP ah pastor bial 217 ah branch 898
an awm a, member Nuai 16 sang 5,89 awmin, mipa Nuai 110,742 leh hmeichhia
63,347 an ni a, branch 898 zinga 44 chu Mizoram pawna mi a ni. Kum 2022 chhung
khan KTP member boral 643 an awm a, an zinga 567 chu mipa niin mi 76 chu
hmeichhia an ni a, kum 2021 aiin 2022-ah KTP member boral 187 in an tam zawk.
Kum 2022 chhung vek khan KTP member nupui pasal nei 3893 an awm a,
chung zinga 1820 (46.75%) chu Biak ina innei niin mi 2073 (53.25%) chu
hmundanga innei an ni.