Then 3
Amerigo Bonasera chuan Hagen chu in chhung pindanah chuan a zui lut a, Don chu
dawhkan lian zet bulah a lo thu a. Sonny Corleone chu tukverh bulah dingin huan lam chu a lo
thlir mek bawk. Chumi nia a vawikhat nan Don hmel chu a muk ruih a. A inlengpa chu a lo kuah
lo a, kut thinga chibai takngial pawh a ti lo a ni. He ruang sawngbawltu hmel dawldang dalin
sawmna a dawnna chhan pawh a nupui leh Don nupui hi inthiantha tak an nih avang chauh a ni.
Amerigo Bonasera ngei pawh chuan Don chu a ngaina tehchiam lem lo.
Bonasera chuan a ngen duh chu pehhel deuh, fing tak siin a sawi ta a. “Ka fanu, i nupui
Goddaughter chu vawiin ang hun ropuia in chhungkaw zahna a rawn lantir theih loh avangin i
ngaihdam a ngai a ni. Damdawinah a la awm reng a.” a han ti a. An hmaa a sawi tur sawi hreh
tih hriat takin Sonny leh Hagen chu a han melh zauh zauh a. Don chuan a dawhthei lo sawt hle.
“I fanu vanduaina kha kan hre vek a ni.” Don Corleone chuan a ti a. “Ka tanpui theihna
tur kawng a awm a nih chuan. I sawi chauh a ni ngai ni. Chubakah ka nupui chu a Godmother a
ni a, chutiang chawimawina sang chu ka theihnghilh ngai lo.” Chu chu inchhuahchhalhna a ni a,
ruang sawngbawltu pa hian Don Corleone chu, “Godfather” tiin a ko ve ngai miah lo a ni.
Bonasera, hmel dang dal mai chuan a sawi tum chu sawi tlangin, “A falin ka hmu thei
che ang em?”
Don Corleone chuan a lu a thing a, “Heng mi pahnihte hi ka mi rin em emte an ni a, ka
kut dinglam ang an nih hi. Anmahni chhuah tirin ka timualpho thei lo ang.”
Ruang sawngbawltu pa chu a maimitchhing vang vang a, chutah a rawn tawng chhuak a,
a aw chu a zawi hle a, lusun chhungte a hnemna thin aw ngei chuan, “Ka fanu hi American
tihdan dungzuiin ka enkawl a. America-ah hian rinna ka nghat a. America hian vanneihna min
siam a ni. Ka fanu chu zalenna ka pe a, mahse chhungkaw timualpho lo turin ka zirtir tho a ni.
Italian ni lo ‘bialpa’ a tawng a. Movie en turin an chhuak a, zan rei tak tak an meng fo. Mahse
chu pa chu keini a nu lehpate hmu turin a lo kal ngai lo. Chung zawng zawng chu hnial lovin ka
lo pawm zel a. Keima thiam loh liau liau a ni.
Thlahnih liam taah khan leng turin an chhuak a. A bialpa chuan thian mipa a hruai bawk
a. Ka fanu chu Whiskey an in luih tir a, chu chu remchanga hman an tum ta a ni. Mahse ani chu a
lo tang tlat a, a zahawmna a humhim tlat a. Chu tah an vaw ta a ni, ramsa ang maiin. Hospitala
ka va hmuh chuan a mit pahnih chu a duk chur a, a hnar ruh a tliakin a khabe ruh a sawp vek
bawk. An phuar khawm a ngai hial. Na ti tak chungin a tap a, “Ka pa, ka pa, engvanga ti nge an
nih? Eng vangin nge hetiang hi ka chungah an tih?” a ti a, Ka tap ve ta a ni.”
Bonasera chuan a sawi zawm thei ta lo a, a tap zawih zawih a.
Don corleone chuan, a tum lohpui ni awm takin, khawngaih hmel taka zaizirin a lo hnem
a. Bonasera chuan a awrawla tawrhna nasa tak lang chungin a sawi zawm leh ta a. “Eng vanga
tap nge ka ni? Amah chu ka nunna eng a ni a, ka fanu ngainat em em a ni. Hmeichhe hmeltha tak
a ni a. Midang a ring em em thin a, tunah erawh chuan tumah a ring leh thei ngai dawn tawh lo a
ni. A hmeltha tak chuan ngai a awh leh ngai tawh lo bawk ang.” A khur hlawk hlawk a, a hmel
dang dai thin chu hmuh nuam lo khawpin a duk khuih mai bawk.
“American tha takin an tih dan angin police hnenah ka kal a. Naupang pahnihte chu an
man a. Thubuai sawi tura hruai an ni ta a ni. Finfiahna chu a awm ngek nguk, mahse tisual lo
angin an tang tlat a ni. Roreltu chuan kum thum tang turin a ti a, mahse chu hremna chu sût a ni.
Nitinin zalen takin an leng vel a. Mi a ang maiin rorelna Inah chuan ka ding a, chung sawn chhe
ho chuan min nuihzat a nih chu. Chutah ka nupui bulah chuan, “Dikna hlen chhuak turin Don
Corleone hnena kan kal a ngai a ni.” tiin ka sawi ta a ni.”
Don chuan a lungngaihna a tawrhpuizia tihlan nan chuan a lu a kun a, mahse a tawng
chhuah chuan a aw chu thinurna avangin a vawt raih a ni. “Eng vanga Police hnena kal nge i nih?
He thil a thlen tirh khan eng vanga ka hnen lam rawn pan lo nge i nih?”
Bonasera chuan hriat theih chang chang hian, “Ka lakah eng nge duh i neih? I duh ang
chu min hrilh ta che. Mahse ti tura ka ngen che kha ti rawh.” a awah chuan chaltlaina tak a lang
thei a.
Don chuan muk ruihin, “Chu chu eng nge ni?” a ti a.
Bonasera chuan Hagen leh Sonny chu melh pahin a lu a thing a. Hagen-a dawhkana la
thu reng chung chuan Don chu ruang sawngbawltu lamah chuan a thle phei a. Bonasera chu a
han tawi deuh hrat a, chutah Don beng bul setah chuan a va kun hnai a, a hmui chuan Don beng
chu a si thei hial a ni. Puithiamin sual puanna an ngaihthlak ang mai hian muk tak leh hmun hla
tak thlir vang vang chungin Don chuan a lo ngaithla a. Bonasera-an a sawi zawh hma loh chuan
chutiang chuan an han awm ren rawn a. Bonasera’n a sawi zawha a din ngil leh hnu chuan thutak
zetin Don chuan a en a. Bonasera chu a sen awp awp a, mit khap miah lovin a lo en let ve a.
Don chu a tawng chhuak ta hram a. “Chu chu ka thei lo a ni. i inthunun zo lo tlat a ni.”
Bonasera chuan ring leh chiang takin, “I dil ang apiang ka pe ang che.” a ti a. Chu mi a
han hriat chuan Tom Hagen chu a tim sawk a, a hlauthawng hle. Sonny Corleone ve thung chu a
vawi khat nan tukverh lam atang chuan a rawn inher a. Kut kuangkuahin za lo zetin a nui a.
Don chu a lo tho chhuak a. A aw chu a muk ruihin thihna rim a nam vang vangin a hriat.
“Nang leh kei hi kum tam tak chhung kan lo inhre tawh a.” a ti a. “Mahse vawiin tih lohah chuan
min rawn tur emaw tanpui dil tur emawin i lo kal ngai lo. Ka nupui hi i fanu neih chhun
Godmother a ni chungin i ina Coffee takngial in tur pawha min sawm hnuhnung ber kha ka hre
phak tawh lo. Tlang takin i sawi teh ang. Kan inthianna i hnawl a ni. Ka laka ba neih i hlauh
avang maiin.” a ti a.
“Buainaa intah luh ka duh loh vang a ni.” tiin Bonasera chu a lo phun sup a.
Don chuan a kut a phar a, “Ni lo e, lo tawng suh. America chu vanram angin i ngai a.
Sumdawnna tha tak neiin nun nuam takin i khawsa a, Khawvel hi hrehawmna awm lohna leh i
duh anga hlim leh lawm taka awm theihna hmun niin i ngai a ni. Thian tha neih tul i ti ngai lo.
Chu bakah nangmah vengtu tur Police i nei a, dan rorelna a awm bawk a, nang leh i thil neihte
chungah eng thil tha lo mah a thleng nang. Don Corleone hi i mamawh lo. A tha e, ka rilru chu i
hliam ngeia mahse inthian thatna hlut lo a, min ngaipawimawh lotu laka pem buhbel chawt mi ka
ni bik lo e.” Don chu a han chawl deuh a, hawihawm der, mei nei taka Bonasera nuih pahin,
“Tunah ka hnenah lo kalin, ‘Don Corleone, dikna min hlen chhuah sak rawh.’ tiin min rawn ngen
a, inzah derna a tel hauh lo bawk. Inthianthatna min rawn hlui hauh lo bawk a. Ka fanu pasal
neih niah ka ina lo kalin tualthat turin min rawn ngen a, chutah - hetah hian Don chuan tiel leh
hmusit aw zetin a tawng a- ‘Eng kim ka pe ang che.’ i rawn ti a. Ni lo, ni lo, ka lungni lo lem lo,
mahse zah lo taka min ti turin i chungah eng thil nge ka tih le?”
Bonasera chu hlau leh hrehawm ti zetin a lo au chhuak a, “America chu ka lakah a tha em
em a. Khua leh tui tha tak nih ka duh a. ka fanu pawh America mi ni turin ka duh a ni.”
Don chuan a kut a lo beng a, “Sawi tha hle mai. A tha e. Chuti a nih chuan sawi leh sel
tur i nei hauh lo zuk nia. Roreltuin a rel a. America chuan a rel fel tawh a ni. damdawiina i fanu
chu pangpar bawr leh hmawmsawm bawmte ken sak la, chu chuan a tinuam deuh maithei asin.
Lungawi tum mai rawh. Chubakah thil runthlak tak a ni lem lo bawk a, tlangvalte kha an la
naupang a, pakhat phei kha chu Politician thiltithei tak fapa a nih kha. Ni lo e Bonasera duhtak,
mi dik tak i ni fo thin a. Kan inthianna i hnawl chungin midang thusawi ai chuan Amerigo
Bonasera thusawi chu ka ring zawk ang tih ka ring. He thil atthlak tak hi sirah i hnawl ang tih
min tiam rawh. A American lo tlat. Ngaidam la, theihnghilh mai teh. Khawvel hi vanduainaa
khat a nih hi.”
Thinrim insum tak chunga Donin a tih elna kha fak mai chuan chu ruang sawngbawltu
khawngaihthlak tak chu a ti khur zawih zawih a. Mahse huaisen takin a rawn tawng chhuak a,
“Rorelna dik hlen chhuak turin ka duh che a ni.”
Mahse Don chuan, “Court chuan rorelna dik chu a hlen chhuahsak che alawm.” a ti hmak
a.
Bonasera chuan luhlul zetin a lu a thing a, “Ni love, khang rawltharte tan chauh khan a ni.
Ka tan chuan a ni ve lo.” a ti a.
Don chuan a hre fiah ta tih lantir nan a bu nghat a, “I dikna duh dan chu eng nge ni?” tiin
a zawt a.
“Mit aiah mit.”
“Chu aia tam daih chu i ngen a ni.” Don chuan a ti a. “I fanu chu a la dam tha a.”
Bonasera chuan harsa ti takin,“Ka fanuin a tawrh angin tawrh tir ve rawh.” a ti a. Don
chuan a sawi leh tur chu a lo la ngai chang reng a. Bonasera chuan a huaisenna sawm khawmin,
“Eng zat nge ka pek ang che?” tiin a zawt a, beidawnna runthlak tak avanga rum ri a ni zawk
mah.
Don chuan hnunglam a chhawn ta a. Chu chu a duh tawk tawh tihna, kal tawh tura a tihna
a ni a. Mahse Bonasera chu a chesawn chuang lo.
Don Corleone, rilru tha tak leh thiante chunga thinrim rei thei miah lo chu a thaw hak a,
Bonasera lam hawi chuan a inher leh ta nge nge a. Ani chu a mitthi sawngbawl thinte ang maiin
a dang var puap a. Don chuan dam raih leh dawhthei tak hian, “A tirah khan eng vanga keimaha
intulut hreh em em nge i nih?” a ti a. “Court-ah kalin thla khat lai i nghak a. Pawisa tam tak
sengin mi â ang maia awm tir tur che dan hremi i ruai bawk a. Kawtthlera nawhchizuar man
tlawm ber ang maia mahni inhralh mai thin roreltu rorelna chu i pawm a. Kum a han kal deuh a,
pawisa i mamawh hunah bank-ah kalin chhiatpui tham khawp a pung i pe a, i rul let thei dawn
em tih ngaihtuaha an hnim kual che a, i mawngkua thleng thlenga an lepse chhung chein
kutdawh ang maiin an tanpuina i nghak bawk a.” Don chu a ngawi hlek a, a aw chu a rum sawt a.
“Mahse ka hnena lo kal ni lang chuan, ka pawisa Ip chu i ta ni mai tur a ni a. Ka hnena lo
kal ni lang chuan chung mi laktlak loh, i fanu tichhe tu te chu nasa taka tapin an mittui a far tawh
tur. Chutah vanduaina lo thleng palhin nang ang mi fel hian hmelma lo nei palh ta la, chu mi chu
ka hmelma a ni ve nghal ang a.”- Don chuan a kut pharin Bonasera chu a kawk a- “Chutiang a
nih chuan, min ring rawh, an hlau em em ang che.”
Bonasera chuan a lu a kun a, “Ka thian chu ni ta che. ka pawm e.” tiin a hrawka hnawhtu
awm ang maia harsa hian a phun sup a.
Don Corleone chuan a kut chu chu pa darah chuan a nghat a, “A tha e. I dikna hlen
chhuahna chu a awm ang. Engtik niah emaw, chu ni chu a lo thleng lo maithei a, a rulh let nan
thil min tih sak turin ka la ko maithei che a ni. Chu mi hma chuan he dikna hlen chhuahna hi, ka
nupui, i fanu Godmother hnen atanga thilpek angah i ngai dawn a nia.”
Ruang sawngbawltu hlim taka a chhuah leh hnua kawngka khar a nih leh hnu chuan, Don
Corleone chuan Hagen hnenah, “He thil hi Clemenza hnenah pe la. Mi tling leh rintlak, thisen
rim avanga chiai mai mai lo tur chauh hmang turin hrilh rawh. Chubakah, kha Ruang
Chhiahhlawh khan eng ang pawhin min ngai mahse, tualthattu kan ni lo a ni.” a ti a. A fa hmasa
ber, a fapa chuan tukverh atangin huana intihlim ho chu a lo thlir reng tih a hmu a. Beisei bo a ni,
tiin Don chuan a ngaihtuah a. Zirtirna a ngaithla duh lo a nih chuan, Santino chuan chhungkaw
sumdawnna a enkawl thei lo ang, Don a ni thei ngai dawn lo a ni. Midang a zawn hmuh a ngai
ngei ang le.
Chu chu a hmuh vat a ngai a ni, thi thei lo a ni bik si lo va.
Chung mi pathum te ti phu zawk tur chuan huan atangin hlim thawm au ri a lo chhuak ta
phut a. Sonny Corleone chuan tukverh lam a va hnaih vat a. A thil hmuh chuan kawngkhar lam a
hnaih tir nghal ruak a, hlim taka nui chungin, “Johnny a ni. Inneih hmang turin a lo kal a ni. Eng
nge ka hrilh che u kha?” a ti a. Hagen chuan tukverh chu a va hnaih a. “I Godson a nih tak tak
khu.” Don hnenah chuan a ti a.
“Hetah ka rawn hruai ang em?”
“Ni lo ve.” Don chuan a ti a. “Mipui khuan han lawm vel phawt teh se. A inpeih hunah ka
hnenah chuan an rawn kal tir mai ang.”
Hagen chu a nuih a, “I hmu em? Godson fel tak a ni.”
Hagen chuan a lo thik rilru deuh a. Ro halhin, “Kum hnih lai a liam leh tawh hi. Buainaah
a intat lut leh anga i puihna a mamawh leh tawh a ni ang chu.” a ti a.
“A Godfather hnen a nih lohin tu hnenah nge a kal chuan ang ni?” tiin Don chuan a lo
zawt let a.
****
Huana Johnny Fontane rawn lut lo hmu hmasa ber tu chu Connie Corleone a ni a. Mo a ni
tih pawh ngaihtuah chang lo vin, “Johnnee” tiin a lo au a. Johnny-a lamah chuan a tlan phei a.
Ani chuan nghet taka lo pawmin a hmuiah a lo fawp a. Amah chibai tum mi dang an lo kal pawh
chuan a la kuah reng a ni. A thian hluite vek an ni a, khawthlang lama a thanlen puite an ni.
Chutah Connie chuan a pasal thar lamah chuan a kai phei a. Chu mi nia ngaihsak hlawh ber a ni
ta lo tih a hriat avanga chu mipa sam buang thang lungawi vak loa awm chu nuihza rilru deuhin
Johnny chuan a va en a. Ngainatawm thei ang berin, kut thingin mo pa chu chibai a buk ta a.
Wine no chu a lamah a han lek kang zauh bawk a.
“Johnny, Min zai sak thei dawn lo’mni?” a aw hriat than tak hian Band ho awmna atang
chuan a rawn au a. A han hawi chho chuan Nino Valenti-an a rawn nuih var var chu a hmu a.
Johnny chu band ho awmnaah chuan a zuang chho a, Nino chu a han kuah vawng vawng a.
Johnny-a hmingthan hma leh Radio-a a zai hma kha chuan then hran theih loh an niin, an zai dun
a, nula an len chhuahpui dun bawk thin. Johnny-a Holywood lama a insawn hnuah Nino chu
vawi hnih thum vel phone-in a bia a, Club-a zaina tur ngaihtuah sak a intiam bawk a. Mahse chu
chu a tihlawhtling ta lem lo a ni. Tuna Nino hlim tak leh rui then sang mai a hmuh chuan a
ngainatna kha a lo let leh ta a ni.
Nino chuan Mandolin chu a han perh tan a, Johnny chuan a dara kuah pahin, “Hei hi Mo
thar tan aw ni ang.” a ti a. Chutah ke per tlat tlat chungin Sicilian lengzem hla zahmawh zet chu a
chham tan ta a. Zai pah chuan Nino chuan a taksa chu a han tiche vel a.
Mo chu inchhuang ru deuh si, zak ru deuh siin a sen tan tan a, mipui chu an lo au dar dar
bawk a. An ke perin a chang tlar tawp zel chu uar takin an lo sak pui ve bawk a. Johnny-an hla
dang sa tura a aw a han then kharh kharh chuan kut bengin an lawm dar dar a.
An chhuang takzet a ni. Anmahni zinga mi ngei a niin zai thiam hmingthang tak a ni a,
film star a niin khawvela hmeichhe duhawm ber a nei bawk. Chuti chungin inneih lawmnaah,
mel sangthum laia hla atanga rawn kalin a Godfather a ngaih pawimawhzia a rawn lan tir a ni. A
thian Nino te ang chu a la hmangaih reng a. A tam zawk chuan Nino leh Johnny chu naupang
mai an nih laia an zai dun thin lai kha an la hria a, hmeichhe maktaduaih sawmnga chuang lai
thinlung hnehtu ni turin a rawn thang chho ang tih reng an ring phak lo.
Johhny chu dawhsan atang chuan chhukin Connie chu a zu hruai a, Nino nena an inkarah
chuan a din tir ta a. Mipa pahnihte chu inhmatawnin an kun hniam a, Nino chuan Mandolin chu
chher chhuaih chhuaihin a han perh a. An tih dan thin anga zai hmanga inbeihna ang deuh a ni,
an aw chu ngunhnamah hmangin, a thunawnah chuan an zai dun ta a. Hawihhawm tak niawm
takin Johnny chuan a aw chu Nino zai ri chuan a hliahkhuh tir a, hmeichhia chu a chan tir ta
bawk a, Nino an a tlar tawp ber a sak hlerh hlerh lai chuan a aw chu a zuih ral ta a. Mipui chuan
a lawm nan kut an beng dur dur a, an pathum chuan an inkuah khawm a. Mipuite chuan hla dang
an ngen leh ta a.
Don Corleone, in chhung luhna sir lama lo ding ve reng chauh chuan thil dik hlel deuh a
awm tih a hre thei a. Hlim tak leh fiamthu ti tak deuh si, a misawmte ti lungni lo lo tawk tur si
hian, “Ka Godson khan keimahni min chawimawi turin mel sangthum lai a lo kal a, tumahin a
hrawk tih hnawn pawh in tum nange?” tiin a rawn au chhuak a. Chutah wine no chu an pe ta sap
sap a, tlem te tea a in sak theuh hnuah a Godfather pawm tur chuan a kal ta a. A kuah pah chuan
putara beng bulah chuan eng emaw a sawi zauh a. Don Corleone chuan in lamah a hruai ta a.
Johnny rooma a lo luh chuan Tom Hagen chuan a kut a lo phar chhuak a. Johnny chuan a
kut vawn pahin, “I tha em Tom?” tih dan phung pangngai ang mai, ngainatna tel lem loa inbiak
pangngai ang mai hian a ti a. Tom chuan a na ru viau nangin a dar a chhin ak a, chu chu Don tha
chhang dawltu tana tawn fo tur a ni tlat.
Johnny Fontane chuan Don hnenah chuan, “Sawmna ka lo hmuh khan, Godfather hi ka
lakah a lungni lo tawh lo a nih hi, tiin ka inhrilh a. Kan nupa kan inthen khan vawi nga lai ka call
che a, Tom hian lo lain i chhuak lawk a tih loh leh i buai thu a rawn sawi thin. Chuvangin ka
lakah i lungni lo tih ka hre ta a ni.” a ti a.
Don chuan zufang chu novah chuan a han thli a, “Khang te chu theihnghilh a ni vek tawh
alawm. I tan tih theih ka la nei reng tho em? Ka tan pui theih loh khawp tur chein i hmingthang
lutukin, i hausa lutuk em lo’ng chu maw?” a ti a.
Johnny chuan chu zu tui eng kak mai chu a han tlak pawp a, a dang a han dawh leh nghal
bawk a. Engthawl tak anga lan a tum a ni. “Ka hausa lo Godfather, ka tlahniam mek a ni. I lo ti
dik a ni. Kha nu vakvai kha neiin ka nupui leh fate kha lo chhuahsan malek tur hi ka ni a. Ka laka
i lung nih loh avang khan ka thiam lo miah lo che.”
Don chuan a dar a chhin uk a, “Ka ngaihtuah vang che alawm, ka Godson i ni miau a, chu
zawng chu ni mai.”
Johnny chu a vei tuak nghat nghat a, “Kha mihurnu kha ka atchilh tlat a. Hollywood-a
star lian ber a ni a. Angel ang mai a ni. Shooting a neih zawha a tih thin i hria em? Make Up lam
buaipuituin a chei tha viau a nih chuan a indep tir mai a. Cameraman-in a lan dan aia thaa a lak
sak chuan, dressing roomah hruaiin a intih tir mai zel. Tu te pawhin an mutpui ni mai. Ka iptea
pawisa nawi Tip atan ka hmang hiau hiau thin ang hian a taksa chu a hmang mai zel. Sual hrim
hrim tura siam nawhchizuar dik tak a ni.”
Don Corleone chuan a lo pawtchat a, “I chhungte eng nge an an?”
Johnny chu a thaw hak a, “Ka enkawl tha hle a ni. Kan inthen hnu khan Ginny leh
naupangte chu Court-in ka pek tur a tih aia tam daih ka pe a. Kar khatah vawi khat tal ka tlawh
thin. Ka ngai hlawm em em a, a chang chuan a dawn hialin ka inhre thin.” In tur dang a han la
leh a. “Tunah chuan ka nupui pahnihna chuan min nuihzat ta a ni. thikna ka nei hi a hrethiam tlat
lo. ‘Thing-cham’ lutuk min ti a ni. Ka zai chu fiamthu thawh nan a hmang bawk a. Ka chhuahsan
hmain ka han khawng deuh hlak a, mahse film a chan dawn avangin a hmaiah chuan ka khawih
lo. Ka chelh bet a. Naupang ka nih laia ka tih thin dan angin a ban leh malah ka hnek sak
chungin min la nuih nia mawle.” Sikret a han tan a. “Chuvangin Godfather, Nun hi a hlu ta lo
riauin a hriat a ni.”
Don Corleone chuan pangngai takin, “Heng buainaah hi chuan ka pui thei lo che a ni.” a
han ngawi hlek a. “I awrawlah chuan eng thil nge thleng a?”
Johnny-a hmela ngainatawmna leh mahni innuihzatna chu a bo ta hlauh a. “Godfather, ka
zai thei tawh lo a ni. Ka hrawkah hian thil eng emaw a thleng a ni. Doctorte pawhin a awmzia an
hre lo.” Hagen leh Don chuan mak ti takin an en hau a. Johny Fontane chu tuarchhel tak a ni thin
si a. “Ka film pahnih te khan sum tam tak a hai lut a. Star lian tak ka ni ta a. Tunah chuan min
thehchhuak ta a ni. Studio Head hian min mil lo riau a. Tunah chuan min ban tir ta a ni.” Tiin a
sawi chhunzawm a.
Don chu a Godson hmaah chuan a ding a. Rum alin, “Engvangin nge chu pa chuan a duh
loh che?” a ti a.
“Liberal Organisation tana hlate kha ka sa thin a, i hria em? khang thil ti lo tura min duh
te kha. Ni e, Jack Woltz pawhin a duh lo ve tho a ni. Communist tiin min ko a, mahse a titawp
thei lo a. Chutah ama tana a voh rauh rauh nula chu ka chhuhsak ta a. Zan khat atan chauh ni
mahse min zui tlat a ni, eng nge ka tih theih hrep chuan ang? Chutah ka nupui nawhchizuar
chuan min paih chhuak a. Ginny leh naupangte lah chuan bawk vak chunga ka pan a nih loh
chuan min pawm tawh dawn lo bawk a. Ka zai thei lo zui ta bawk. Godfather, eng nge ka tih tak
ang?”
Don corleone hmel chu khawngaih thla lang hlek lovin a rum ul a. Hmuhsit hmel zetin,
“Mipa tak angin bul i tan leh thei alawm.” Chutah thinur tak hmel a pu ta thut a. “MIPA TAKIN
MAWLE” tiin a au va. Johhny chu rawn panin a samah a tham a, a han thing nawk nawk a.
“Vana Isu leh! Ka kiangah khang chen i awm chunga tun aia tha zawka i awm lo hi thil theih a ni
em ni? Hollywood tuai ang maia, tap leh khawngaihna dil maw? Hmeichhia ang maia tap aAwiha, Eng nge ka tih tak ang, eng nge ka tih tak ang?”
Chutia Don-in a tih dan a han zir vel chu a mak riau a, beisei loh tak a ni bawk, Hagen
leh Johnny chuan an beisei loh lutuk avang chuan an nui ta hawk hawk a. Don chu a lungawi hle,
a Godson chu a lo hmangaih hle tih a ngaihtuah chhuak zawk a. Chutianga tawngkama tihelna
chu tuar ve ta se a fate chuan eng tin nge an ngaih ang? Santino chu a tum bur ang a, kar khat
chhung zet a nungchang tha lo a chhuah pek ang chu.
Fredo chu a zam nghal ringawt ang a. Michaela ve thung chu nelawm loh zetin a nui ang
a, in atanga chhuakin thlakhat zet hmuh tur a awm lo ang. Mahse Johnny ve thung chu, ah, pa tha
tak a va ni em! a nui a, a Godfatherin a tih nachhan hrethiam nghalin a chakna a sawm khawm
mek a ni.
Don chuan a sawi zawm leh a, “Nangmah aia thunei zawk, i pu nula i chhuh sak a, chutah
a tanpui loh che avangin i sawisel a. Awmze nei lo a nih chu. Nawhchizuar nei tur maiin i
chhungkua kal sanin, i fate chu pa nei lovin i siam a, chutah inhawng taka an lo lawm loh che
avangin i tap a. Film a siam dawn avanga a hmaia hnek i duh loh nawhchizuarin a nuih zat che
avangin mak i ti bawk a. Mi a ang maiin i khawsa a, chutiang chuan i tawp ta a nih chu.”
Aw dam deuh zawkin, “Tunah chuan ka thurawn ngaithla turin i inpeih tawh em?” a ti a.
Johnny chuan a dar a chhin ak a, “Ginny chu ka nei leh thei lo a ni, a duh dan ang kha
chuan ni lovin. Pawisa khelh te, zu in te, thiante nena len vahte ka duh a ni. Mifel tak tak ten min
um zui a, ka dang ngawt thei bawk lo a ni. Bakah Ginny bula ka awm chuan rahbeh ang mai niin
ka inhre thin a ni. Isu leh! khang thil hrep kha paltlang ka duh tawh lo a ni.”
Don-in tihthinrim a ni tih a tihlan hi thil vang tak a ni a. “Nei leh turin ka hrilh lo che. I
duh duh chu ti rawh. I fate tana pa nih i chak chu a tha e. A fate tana pa nih tling lo mi chu mipa
tak tak a ni thei lo. Mahse i fate nu chuan a pawm theih nan che i bei tur a ni. Nitin i hmu thei lo
ang tih tunge sawi? In khatah in cheng ho thei lo tih sawi a awm em ni? I nun i hman duh dan
taka hmang chungin an hnenah i cheng thei lo ang tih ziak a awm em ni?”
Johnny Fontane chu a nui hawk a. “Godfather, hmeichhia zawng zawng hi Italian nupui
tar lam ang an ni vek hleinem. Chutiang chu Ginny-in a pawm thei lo ang.”
Don chuan a lo nuihzat hle a. “A chhan chu tuai ang maia i khawak vang a ni. Court-in
pek tur a tih aia tam i pe a. Pakhat zawk lah chu film a siam dawn vang maiin a hmaiah i khawih
duh lo bawk a. I thil tih turah hmeichhia i inrawlh tir a, Mipa ho hremhmuna kan tal vawn vawn
laiin vanramah mithianghlim ni dawn mahse he khawvelah hi chuan an tling tawk tak tak lo.
Chubakah kha mi kum chhung zawng khan ka en thlithlai reng che a.” Chutah thahnemngai
zetin, “Godson fel tak i ni a. min zahna pawh i lantir nasa viau. Mahse i thian dangte ve thung hi
le? Midang nen kum khat chhung in inkawm a, a kum lehah midang nen. Kha pa movies -a che
nuihzatthlak deuh Italian rawlthar kha. A vanduai ta hlauh mai a nang lah chuan amah aia i
hmingthan tak vang maiin i hmu ngai ta lo a. A nih leh i thian hlui, school i kal pui leh hla saa i
kawppui thin, Nino khu eng tin nge? Beidawnna avangin zu a in tam viau a mahse engmah a
sawisel lo asin. Hna rim tak thawkin lung phur truck a khalh a, kar tawpah pawisa tlem hlawhin a
zai thin bawk. Nangmah demna thu reng a sawi ngai lo. Tlem tal pawhin i pui thei lo’mni? eng
vangin nge i theih loh ang? A zai thiam viau asin.”
Johnny chuan ning hmel pu zetin, “Godfather, theihna a nei tawk lo a ni. A tha viau a,
mahse lian tak a ni thei lo.”
Don chuan a mit a chhing duar duar a, “A nih leh nang, Godson, theihna tak tak i nei lo
tih i hria alawm. Nino nena hnathawk turin lungphur truck-ah chuan hna ka pe mai dawn che em
ni?”
Johnny-an a chhan tak lohah chuan a sawi chhunzawm a, “Inthianthatna hi engkim a ni
asin. Thiamna leh theihna ai pawha sang zawk a ni a. Sorkar ai pawha chak zawk a ni.
Chhungkaw nihna nen a intluk thuak a ni. Theihnghilh ngai suh ang che. Inthianthatna bang
chhah tak lo siam tawh ni la chuan ka tanpuina i dil lo tur. A nih min hrilh teh. Engvanga zai thei
ta lo nge i nih? Huanah khan Nino ang mai khan i zai thei hle si a.”
Chutia a han nawr fiam deuhna avang chuan Hagen leh Johnny chu an lo nui a. Johnny
inphahhnuai hun a lo thleng ve ta a. “Ka aw a chak ta lo riau a ni. Hla pahnih khat ka han sa a
darkar tam tak emaw nikhat lai emaw ka zai thei lo zui thin. Enlawkna pawh ka paltlang hleithei
ta lo a ni. Ka aw hi a chak lo a ni, natna chikhat a ni mai ang chu.”
“Tichuan hmeichhe lamah buaina i nei a. I awrawl a dam lo bawk a. Chu hnathawh tir
duh lo tu che, Hollywood Pezonovante (mi pawimawh, mi lian) nena buaina in neih chungchang
chu min han hrilh teh le.” Don chuan hna chungchang lam a hawi ta a ni.
“I mi pawimawh elkhen te ai daiha lian a ni.” Johnny chuan a ti a. “Studio a nei a,
President pawh indonna atana film a mi ang sawimawina thurawn a pe hial a ni. Thla liam ta mai
khan kumina thawnthu chhuak ropui ber leh hralh tla ber filma siam phalna a nei a. A thu laipui
chu keimah chanchin hlauh hi a ni mai. Lem ka chan a ngai reng reng lo ang a, keimah kha a ni
tawp mai. Ka zai a ngai bawk hek lo ang. Academy Award chu dawng chiang sa ka ni mai. Mi
zawng zawngin ka tan a that zia leh lemchangtu anga ka larpui tur zia an hre vek. Mahse kha
sâwn Jack Woltz khan min duh lo tlat a, min chan tir duh lo tlat a ni. Man tlem thei ang ber tura
ka zawrh pawhin aih a ti tlat a ni. Thu a rawn thawn a, Studio hmuna a kephah fawpa ka va
inphahhniam chuan a ngaihtuah tur thu a rawn sawi a ni.”
Don chuan chung thil atthlak tak a sawi titawp tur chuan a kutin a lo zap a. Mihring rilru
fim pangngai zingah chuan harsatna te chu chinfel zel theih a ni. A Godson darah chuan a beng
thuk a. “I inngai lunghnual a ni. Tumahin an ngaihsak lo che niin i ngai a, i rihna a tlahniam nasa
hle bawk. Zu lam i ti nasa deuh a ni maw? I muhil thei lovin damdawi i ei bawk maw?”
Pawmpui lo tih hriat takin a lu a thing a.
“Tunah chuan ka thupek zawm turin ka duh che a ni.” Don chuan a ti a. “Ka inah hian
thla khat chhung tal awm turin ka duh che a, tha taka ei leh in a, chawl hahdam turin ka duh che
a ni. Inkawm puiah ka duh che a, i awm hian nuam ka ti tlat. I Godfather atang hian he khawvel
chungchang thenkhat zirin chu chuan Holywood hmun ropui tan chuan a pui thei mahna che.
Mahse i zai tur a ni lo a, zu i inin, hmeichhia i kawp bawk tur a ni lo. Thla tawpah chuan
Holywood lamah i kir leh thei tawh ang a, tin, he mipawimawh, mi lian pa hian i hna duh chu a
pe ang che. Tha mai em?”
Don chuan chutiang thiltihtheihna chu a neih Johnny Fontane chuan a ring lem lo. Mahse
Don chuan chutiang leh chutiang thil reng reng chu tih ngei tur a nih loh chuan a tih tur a ni tiin
sawi ngai lo.
“He pa hi J.Edgar Hoover-a (FBI din a nih theih nana mi pawimawh tak, FBI director ni
zui ta leh heti hun laia director ni mek- loma) thian hnai tak a ni asin.” Johnny chuan a ti a. “A
lakah chuan awki san hlek pawh a theih loh.” A ti a.
“Sumdawng mi a ni alawm.” Don chuan nem takin a ti mai a. “A hnial theih miah loh tur
thil ka hlui dawn a ni.”
“A tlai lutuk tawh.” Johnny chuan a ti leh a. “Contract te pawh sign a ni vek tawh a.
Shooting pawh kar leh maiah tan a ni ang. Thil theih loh hulhual a ni.”
Don Corleone chuan, “Kal rawh, Party-naah chuan va kal tawh. I thian ten an nghak reng
che a nia. Engkim chu ka kutah dah vek mai rawh.” Johnny chu room atang chuan a nawr chhuak
a.
Hagen chu dawhkan bulah thuin thil a chhinchhiah mek a. Don chu a han thaw huai a.
“Thil dang a la awm em?”
“Sollozzo hi ngaihthah theih a ni tawh lo ang. Tun kar chhunga i hmuh ngei a ngai a ni.”
Hagen chuan penin calendar chu a kawk va a.
Don chuan a dar a chhin uk a, “Tunah chuan inneihna a tawp ta bawk a, i duh hun
apiangah a ni mai.”
A chhanna chuan Hagen chu thil pahnih a hriattir a. A pakhatna leh pawimawh zawk chu,
Sollozzo dilna chu hnawl a ni dawn tihna a ni a. Pahnihnaah chuan, A fanu pasal neih hmaa a
chhanna a pek duh loh avang chuan, Don Corleone chuan a chhanna pek avang chuan buaina a
beisei tih hi a ni.
Hagen chuan fimkhur deuh takin, “Clemenza hnenah ina awm tur mi rawn dah turin ka
hrilh ang em?”
Don chuan dawhthei lo zetin, “Eng atan maw? Inneih hmaa chhan ka duh lohna chhan
chu kha tiang ni pawimawhah kha chuan khaw thiang tak, chhum awm miah lohna, hmun hla tak
thleng pawhin, ka duh vang a ni a. Chubakah eng chungchang nge sawi a duh tih hriat lawk ka
duh vang a ni bawk. Tunah chuan kan hre ta a. A thil rawt tum erawh a tiha tih rual loh
(Infamita) a ni.”
Hagen chuan, “Chuan i lo hnar ang a?” Don chu a bu nghat a. Hagen vek chuan, “Ka
ngaihdan chuan chhanna i pek hmain kan zavaiin - chhungkua zawng zawngin- kan sawiho tur
niin ka hria”
Don chu a nui a. “Chu ti tur maw? A tha alawm, kan sawi ho ang chu, California atanga i
lo let leh hunah. Naktukah thlawk chhuak nghal la, Johnny-a chungchang kha tifel ang che. Kha
film siam lama mi pawimawh pa kha hmu ang che. Sollozzo hnenah chuan California atanga i lo
kir leh hunah ka hmu ang tih hrilh bawk la. A dang a la awm em?”
Hagen chuan pangngai takin, “Damdawiin atangin an rawn call a, Consigliere
Abbandando kha a thi tep a ni. Zanin pawh a daih tawh lo ang. A chhungte pawh an chah tawh a
ni.”
Cancer-in Genco Abbandando chu damdawiin khuma a beh tir tak tlat avangin Tom
Hagen hian kum kalta chhung khan Consigliere (thurawn petu - loma) dinhmun chu a luah a.
Tunah chuan Don Corleone-an chu dinhmunah chuan a nghet ta tih a sawi chiah a nghak tawh a
ni. Mahse thil buaithlak tak a awm a. Hnam dan phungah chutiang dinhmun pawimawh chu
Italian nu leh pa inkar atanga lo piang te hnenah chauh pek theih a ni a. Chu dinhmun a lo vawn
lailawk ringawt vang pawh hian buaina chu a awm pang tawh a ni. Chubakah, kum 35 mi chauh
a la ni a, tawn hriat nei turin leh Consigliere fing khermei tak ni tur chuan a la upa tawk lo nia
ngaih a ni.
Mahse Don chuan chutiang lam reng sawi lovin, “Eng tikah nge ka fanu chu moneitu nen
chuan an chhuah dawn?” tiin a zawt a.
Hagen chuan a sana chu a han bih zauh a, “Rei loteah Cake an zai anga chumi hnu darkar
chanve hnu velah a ni ang.” a ti a. Chu chuan thil dang a hriat chhuah tir a. “I makpa thar chu,
Chhungkaw chhungah thil pawimawh tak i chantir dawn em?”
Donin uar zeta a chhan avang chuan mak a ti hle, “Teuh lo mai”. Don chuan dawhkan
chu a han beng dawp a. “Teuh lo, Ei an hmuhna tur hna tha tak pe la, mahse chhungkaw
sumdwnna chu hriattir ngai suh ang che. Midang, Sonny, Fredo leh Clemenza pawh hrilh ang
che.”
Don chu a han ngawi hlek a, chu tah,“ Ka fapate kha hriattir rawh, an pathumin, Genco
khawngaihthlaka kan tur chuan hospitalah min zui ang. An zahna hnuhnung ber lan tir turin ka
duh hlawm a ni. Fredie hnenah khan Car lian kha la chhuak turin hrilh la, Johhny hnenah khan a
lo kal duh leh duh loh zawt ang che, ka sawm bik angin.” Hagen an zawhna zawt hmel pu taka a
en chu a hmu a. “Zaninah California pan chuan thlawk turin ka duh che a ni. Genco hmuh nan
hun i nei ve lo vang. Mahse Hospital atanga ka lo let leha kan inbiak hma chuan lo chhuak suh
ang che. hrethiam em?”
“Hrethiam e.” Hagen chuan, “Engtik hunah nge Fredo-a car chu a lo inrin ang?”
“Mi sawmte an haw vek hunah le,” Don chuan, “Genco chuan min lo la nghak em em
ang.”
“Senator khan a rawn call a.” Hagen chuan, “Amah ngei a lo kal theih loh avangin pawi a
ti a, mahse i hriatthiam tho a ring a. Khang FBI mi leh sa Liscence number chhianchhiahtu te
chungchang vang kha a ni maithei. Mahse a thil kengtu bik hmangin thilpek a rawn thawn tho a
ni”
Don chu a bu nghat a, amah ngeiin Senator chu lo kal lo turin a hrilh lawk tih sawi
chhuah kher chu tul a ti lem lo. “Thil pek hlu tak a ni em?”
Hagen chuan a ni tih Italian ho tih dan phung zuiin a hmelah a lan tir a, chutianga
German leh Irish thlahpawlh pianhmanga lo lang chu a mak zawk hle.
“Hmasang thil Silver hmanga siam a ni a. Hlu tak a ni. Naupang hovin a tlem berah
sangkhat chuan an hralh thei ang. Senator chuan a dik tak hmu turin hun a hmang rei viau a ni.
An ni ang mi tan chuan a man zat ang aia pawimawh daih a ni.”
Senator te ang mi pawimawhin a laka chuatianga zahna a lantir avanga a lawmna chu
Don chuan thup a tum lem lo. Senator chu, Luca Brasi ang thovin, a thiltihtheihna ruangama ban
pawimawh tak a ni a. A rinawm zia he thilpek hmang hian a rawn nemnghet nawn leh a ni.
*****