Huan zau takah chuan an misawm za rual zet chu an awm a, thenkhat chu thinga siam
dawhsan, pangpar hmanga mawi taka cheiah chuan an lam su nghawng nghawng hlawm a.
Thenkhat chuan dawhkan sei tak, ei tur chi hrang hrang leh siamchawp wine inchhawp vum
thurna chu kilin an thu bawk a. Mo, Connie Corleone chu a bika siam dawhkan mawi takah
mopa nen, mo thiante leh usher ho nen an thu a. Italian tih dan hlui anga mawl taka tih a ni. A
duh dan chu ni chiah lo mah se Connie chuan chu inneihna ‘thing zet’ chu a pa tihlawm nan a
rem tih a ngai tlat a ni, a chhan chu a pasal tur a thlan kawngah a pa chu a tilawm lo miau a ni.
Moneitu, Carlos Rizzi chu thlah pawlh, a pa Sicilian niin a nu erawh italy hmar lam mi a
ni thung a, a nu atang chuan a sam buang thang leh mitmu dumpawl chu a chhawm ta a ni. A nu
leh pa chu Nevada-a khawsa an ni a, dan bawhchhiatna tenau a neih avangin chu state chu a
chhuahsan a ni. New York-ah Sonny Corleone nen intawngin, a farnu nen pawh an intawng
chhawm ve ta a ni. Don Corleone chuan Nevada-ah a thian rintlak tak a tir a, Carlo-an police
laka buaina a neih chu tleirawl at avanga silai nena fimkhur lohna mai, pawi lutuk ni lem lo,
awlsam taka chhinchhiahna bu atanga nuai bo a, chu rawlthar chu record nei loa dah mai theih a
ni tih a rawn report a. Chu bakah Nevada-a dan phalna hnuaia pawisa khelh chungchang
kimchang tak a rawn hawn bawk a, chu chu Don Corleone chuan a ngaihvenin a ngaihtuah zui ta
reng a ni. Thil engkim atanga hlawkna hmuh chu Don ropuina pakhat a ni reng a ni.
Connie chu hmeichhe hmeltha tak a ni lem lo a, cher ria leh hlauthawng hma tak,
hmeichhe nasa tak ni chho mai tur hi a ni a. Mahse tunah chuan a mo kawrfual avang te, a la
thianghlim avanga phurna nasa tak avangte, a hmel hlim sar avangte chuan a lang hmeltha ve lek
lek a ni. Thing dawhkan hnuaiah chuan a pasal ni mai tur malpuiah chuan a kut chu a nghat reng
a, thal ngul ang maia a kareh kual raih a niin, fawh thlawh tiin a hmui chu a tipawrh tarh reng
mai bawk.
Connie chuan a pasal tur chu hmeltha chungchuang tak niin a ngai a. Carlo Rizzi chu a la
naupan deuh laiin thlaler hmunah hna rum tak a thawk thin a, a banpuam te chu a sek thain a coat
hak pawh chu a dar zawnah tihrawlin a do pawng ulh a ni. A nupui turin ngaisang tih hriat taka a
rawn en chu lo en letin a noah chuan wine a han chhunsak a. Lemchan tuala lemchang thiam tak
ang maiin a nupui tur lakah chuan a hawihhawm elkhen a ni. Mahse a mit chuan mo Silk puan
darbah pawisa ip lianpui lam chu a melh leh zauh thin a; chu chu tunah chuan a chhunga pawisa
awmna lehkha ip-in a khat tun tawh a. Eng zat tak awm ang maw? Sang sawm? Sang sawmhnih?
Carlo Rizzi chu a nui sak a, a bul tanna chauh a la nih hi.
Chu mai bakah, lal chhungkaw zinga mi nupuiah a nei tlat a ni. An tuamhlawm ngei ang
chu.
Mipui zing atang chuan rawlthar tuanrang zet pakhat, lu mum zet hian chu pawisa ip chu
a lo melh ve reng a. A thil chin dawklak a nih avangin Paulie Ghatto chuan chu pawisa bawm
chu eng tin nge a ruk theih ang tih a lo ngaihtuah mek thung a ni. A tumna ringawt pawh chuan a
nuih a ti za a. Naupangin silai lem hmanga tank lian kah thluk an tumna ang maia suangtuahna
mawlmang leh atthlak a ni tih a hria a ni. A boss, Peter Clemenza, pa valai takin lam tuala
tleirawl it hmel taka a theh vir vel chu a han thlir a. Clemenza, sang tak leh pumraw lian zet mai,
thiam fu sia lam chunga, a dul lian zetina hur hmel taka nula, amah aia te zawk fe hnute a han
nawk sak vel chuan mipuite chuan kut bengin an lo lawm dur dur a.
Nu upa lam deuhte chuan lampui turin a banah an rawn vuan a. tlangvalte chuan zah tak
chung lam tual chu a lo kian vatin, tang ata mandolin tum rik rual chuan kut an beng thup thup a
ni. A tawpa lam chau chaira a thut chuan, Clemenza chu Paulie Ghatto chuan wine vawt raih mai
a rawn pe vat a, a mitko vela thlan chu silk rawmawlin a hru a.
Wine a han in chuan Clemenza chu whale pui ang maiin a thaw chhuak su su a. Paulie
chu lawmthu hrilh taka ruangin, “Mi lam lai endiktua tan chu tum duh ting suh, i hna thawk ta
che. Engkim a tha vek em tih enin va kal kual vat rawh.” a ti hmuk a. Paulie Ghatto chu rang
takin mipui zingah chuan a pil bo ta nghal a.
Band-te chuan thingpui in chawlh an nei ta a. Rawlthar pakhat Nino Valenti chuan
mandolin an hnutchhiah chu lain, a ke vei lam chu chairah hlangin, pawr zet hian Italian
Lengzem hla a rawn sa ta a. Nino Valenti hmel chu tha tak ni mah se a zu in nasat avangin a
biang chu a puam deuh a, tunah pawh a rui deuh viau tawh a ni. A hla thua zahmawh rawngkai
awm a sak lai chuan a mit chu a han meng danglam vel a. Hmeichhe ho chu hlim takin an lo te
tuarh tuarh a, mipa ho lahin a hla tlar tawp lam chu an lo sak pui tuarh tuarh bawk a.
Don Corleone, chutiang lama khermei zet chu, a nupui thau tawi lam chu a thian te ho
nen hlim taka an te vel tho avang chuan, in chhung lamah a pil bo ta daih a. Chu chu a hmuh
chuan Sonny Corleone pawh chuan remchangah lain monute awmna dawhkan lamah phei ve
vatin mo thian pui ber, Luci Mancini bulah chuan a va thu var a. A nupui chu choka lamah
wedding cake en fela a awm daih avangin an him a ni. Nula beng bulah chuan eng emaw a sawi
zauh a, ani chu a tho ta nghal a. Sonny chuan rei lote a han nghak hlek a, zui anga lang si lo
turin, an misawmte biaa ding zauh zauh pah chungin a hnungah chuan a zui ve ta a.
Mite chuan an thlir thup a. Kum thum chhung College a kal avanga american nunphung
la tak mai mo thian chu, nula puitling a ni tawhin, a lo ‘lar’ ve hat tawh a. Inneihna atana
enchhinna an neih chhung zawngin Sonny Corleone nen chuan an inmitmei zauh zauhin an
inchhaih fiam fo a. Sonny chu mipa a hmuh tawh a zawnga tha ber a la ni tlat avangin chu chu
pawi a ti lem lo. Tunah chuan a kawrfual sen dang chu pawt chhovin, in lam pan chuan a kal
mek a, pawisawi lo niawm tak hmelpuin a nui sang bawk a. Bathroom panna stepah chuan
muangchangin a tlan chho a, chutah chuan rei lo te a awm a. A lo chhuah leh chuan a chung
lawkah chuan Sonny Corleone chu lo awmin, ani chuan a lo hui zauh a.
Don Corleone-a Office tukverh inkhar atang chuan, Thomas Hagen chuan huan cheimawi
chhunga inneih lawmna an neih mek chu a thlir a. A hnung lama bangah chuan dan lam zirna
lehkhabu a inrem um a. Tom Hagen chu Don Corleone-a danhremi a niin, a Consigliere din
hmun chelh lai mek a ni bawk, Consigliere hi thurawn petu dinhmun a ni ber awm e. Chutiang
chuan chhungkaw sumdawnna-ah dinhmun pawimawh zet a chelh a ni. He pindanah ngei hian
Don nen harsatna khirh tak tak an lo sukiang dun tawh a ni. Gofather-in huan chhuahsana In a
rawn lut a hmuh chuan, inneihna a ni emaw ni lo emaw, vawiinah hian hnathawh tur a nei a ni tih
a hre mai. Don chu amah hmu turin a lo kal mek a ni. Chutah Hagen chuan Sonny-an Luci
Mancini thil a hrilh ru lai leh an lemchan tereuhte changa In lama an inzui chu a han hmu leh a.
Hagen chu a ner sak a, Don hrilh tur nge hrilh loh tur tiin a inbuk fe hnuah hrilh rih loh a titlu ta
a ni. Dawhkan lamah chuan kalin kutziaka hming inziak tlarna lehkha, vawiina a fala Don
Corleone hmuh phalna nei ho hming inziak chu a la a. Don pindana a lo luh chuan hming ziak
tlar chu a lo pe a. Don chuan buk nghauh pahin, “A hnuhnung berah Bonasera hi dah ang che.” a
ti a.
Hagen chu kawngkhar-ah chuan chhuakin huana wine zem bula awmkhawmho lamah
chuan a kal nghal a. Chhang siamtu Nazorine chu a kawk zauh a.
Don chuan chhang siamtu chu lo lawmin a lo kuah thawk thawk a. An naupan laiin Italyah an infiam dun thin a, inthiantha takin an thang lian dun a ni. Easter tuk apiangin sap saum
siam thar diai te, wheat atanga siam chhang, a pawn lam eng kuk mai, motor ke tiat zeta lian hi
Don Corleone-a inah a lo thleng thin a ni. Krismas-ah te, chhungkaw zinga mi piancham a lo
thlen hunin Nozorine chuan chhangthlum cream tah chhuah vekin zahna a rawn lan tir thin bawk.
Eng hunah pawh, harsat lai leh that lai hunah pawh Nazorine chuan Don Corleone-a buatsaih,
chhang siamtu inzawmkhawm pawlah a chanvo phur takin a ti hlawhtling ziah thin a ni. Indo laia
chini leina tur coupon a dil tih loh chu a rulh letna lam a dil ngai lo hrim hrim a ni. Tunah
Chhang siamtu tan thian tha an nih anga a chanvo a dil hun a lo thleng ta a, Don Corleone
pawhin a ngenna chu phur taka tih hlawhtlinsak tumin a lo inkau ve hle a ni.
Don chuan Di Nobili sikret chu a han theh a, noa zufang eng kak mai chu a pe bawk a.
Chutah a sawi tur tha taka a sawi theih nan a darah a kut a han nghat a. Chu tak chu Don zia a ni,
a tawnhriat duhawm lo zet atangin mi dang hnena thil dil hrehawm zia a hre tawh miau a ni.
Chhang siamtu chuan a fanu leh Enzo chanchin chu a hrilh ta a. Sicily atanga Italian
tlangval fel tak lo kal, American sipaiten an man, indona mi tang ni tura U.S-a an rawn thawn,
intiamkamna neia indona harsatna phuhruk tura hnathawk tura chhuah lailawka chu.
Hmangaihna thianghlim leh zahawm tak chu mi fel Enzo leh a duh tak Catherine-i te inkarah a lo
piang chhuak a, mahse indona a lo tawp tak avangin mikhawngaihthlak Enzo chu a ram, Italy-ah
haw tir a ni ang a, a fanu chu thinlung hliam avangin a thi thei hial dawn a ni. Heng mi pahnihte
lungngaihna hi Godfather chauhin a su kiang thei a, amah chu an beiseina awmchhun a ni.
Don chuan Nazorine chu pindanah chuan a kal kual pui a, a kut chu a darah chuan a la
nghat rengin Nazorine tihphur nan a bu nghat nghat reng bawk a. Chhang siamtuin a sawi zawh
chuan, Don Corleone chuan a nuih a, “Ka thian, i lungngaihna chu sirah hnawl mai rawh,” a ti a.
Chutah thil tih tur chu fimkhur takin a hrilh ta a. District-a Congressman pakhat hnenah dilna
theh luh a ni ang a, chu Congressman chuan Enzo chu khua leh tui nihna a neih theih nan special
bill a siam ang a, chu bill chu Congress-ah pass a ni ngei bawk ang. Don Corleone chuan chutah
chuan pawisa a ngai ngei dawn tih a sawifiah a, sen tur chu dollar sanghnih vel lai a ni dawn a ni.
Amah, Don Corleone chuan tihfel ngai leh sen ngai zawng zawng chu a tum vek ang. A thian
chuan a remti em le?
Nazorine chuan rang takin a lu chu a bu nghauh nghauh a, hetiang thil te thamah chutiang
em chu a beisei phak lo a ni.
Congress-a dan bik siam chu a man a tlawm hle lo tih chu hriat sa a ni a, Nazorine chu
lawm avangin a mittui a tla lek lek a ni. Don chuan kawngka thlengin a thlah a, a chhang siamna
hmunah lehkha pawimawh leh tihfel ngai tifel tura mi an rawn kal tur thu a tiam a. Nazorine
chuan huan lama a pil bo hmain a kuah leh ngawih ngawih a ni.
Hagen chuan Don chu a nuih a, “Nazorine tan chuan sum peipunna tha tak a nih hmel.
Cheng sanghnih chauhin Makpa leh chhang siamna lama dam chhunga puitu tur man tlawm zet a
nei thei dawn a nia.” a ti a. Chu tah, “He hna thawk tur hian tu nge ka tih ang?”
Don chuan a han ngaihtuah vang vang a, “Kan Paisan pa kha chu ni suh se, kan piah
District-a Juda pa kha ni rawh se. In address thlak bawk la. Indo a lo tawp tak avangin hetiang
lam chungchang hi a tam viau ka ring a; Washington lamah a tam deuh pawha kengkawh thei tur
leh a man tisang chuang lo tur mi kan neih a ngai a ni.” Hagen chuan a lo chhinchhiah zel a,
“Congressman Luteco ni lovin, Fischer zawk kha tum chhin rawh aw.”
Hagen-an a lo hruai luh mi dang chungchang chu awlsam tak a ni a. A hming chu
Anthony Coppola niin, an tleirawl laia Rel kawnga Don-in a thawhpui thin fapa a ni. Coppola
chuan dollar zanga, Pizza dawr siam nan a mamawh a, thuk siam nan leh eng emaw atan a ngai
a. Eng emaw avangin a bain a theih tlat lo a ni.
Don chuan a ipte zenin pawisa tel a phawrh a, a lo daih lo a. Ner sak chungin Tom Hagen
hnenah chuan, “Dollar za min lo puk tir teh, thawhtanni-a bank-a ka kal hunah ka rul leh mai ang
che.” a ti a. Coppola chuan dollar zali pawh chu a tawk lutuk tho thu a sawi a, mahse Don
Corleone chuan a dara ben thak thak pahin, ngaihdam dil hmel pu tak chungin, “He inneihna
hian min ti kawnkaw deuh mai a ni.” a ti a. Tom Hagen-an pawisa a rawn pek chu lain, ama
pawisa nen chuan Coppola chu a pe ta a.
Hagen chuan ngaisang ru zetin a lo en a. Mi chu a thilphal tak zet a nih chuan, amah
ngeiin a thil phalna a lan tir tur a ni, tiin Don chuan a zirtir fo a ni. Pawisa puk tir tura Don-in a
puk leh chhawng tih a hriat khan Anthony Coppola lawm zia tur chu. Coppola chuan Don chu
Mllionaire a ni tih a hre lo a ni lo, mahse Milionaire eng zat fakauin nge an thian rethei ve tak
tana remchang lo chung pawha chutiang thil chu ti duh ang?
A dawt leh ngaichangin Don chuan a lu a han kan a, Hagen chuan, “List-ah khan a awm
lo nangin Luca Brasi-an hmuh che a duh a ni. Mi hmuha tih a mawi lo tih chu a hre thoa mahse
amah ngeiin lawm pui che a duh a ni.” a ti a.
A vawi khat nan Don chu a lawm loh hmel hle, “A tul kher em ni?” tiin a zawt a.
Hagen chuan a dar a chhin ak a, “Kei aiin i hre chiang zawk alawm. Mahse inneihnaa i
sawm hi a lawm hle a ni. A lo beisei miah lo va, a lawm zia tihlan a duh te pawh a ni ang chu.” a
ti a.
Don chuan a lu a bu nghat a, Luca Brasi chu a hmuh tur thu zaizirin a lan tir a.
Huan lamah thung chuan Luca Brasi hmela hlauhawmna nasa tak lang chuan Kay Adams
chu a thawng hle mai. Chupa chanchin chu Michaela a zawt nghal a. Michaela hian Kay-i chuan
thin thawng lutuk lo leh muang changa a pa chungchang thu dik a hriat theih nan inneihnaah
pawh hruai a ni reng a. Mahse tunah pawh Don chuan sumdawnna pangngai ni lo deuh a khawih
nia hriatna Kay chuan a nei tlatin a lang tawh a ni. Michaela chuan pehhel deuhhleka thu dik
thenkhat chu hrilh a tum ta a. Luca Brasi chu khawchhak lama a ruka thil tihna hmun mi
hlauhawm ber zinga pakhat a nih thu a hrilh ta a. A talent ropui tak, midang puihna tel miah loa
amah chauha tualthah hna a thawh theih dan, dan kengkawhtu lamin an hmuhchhuah leh thiam
loh an chan tir theih miah loa a tih theih thu, miin an sawi thin chu a hrilh a. Michaela chuan then
deuh sak chungin, “Chung zawng zawng chu eng nge dik ber pawh ka hre lo. Ka pa thiante zinga
mi a ni tih chauh ka hria a ni.” a ti a.
A hmasa ber atan Kay chuan a hrethiam tan ve ta a ni. Awih loh hmel deuhin, “Chutiang
mi chu i pa tan a thawk tih min hrilh i tum a ni maw?” a ti a.
Ni hrep e mawle, tiin a ngaihtuah a, a ri thung chuan, “Kum 15 dawn liam taah khan mi
thenkhatin Olive hriak chawk luh lama ka pa sumdawnna chu chhuhsak an tum a. Ka pa chu thah
an tum a, an that tep reng bawk a. Luca Brasi chuan a chhui zui ta hlawm a. An sawi dan chuan
Luca chuan kar hnih chhung lekin mi paruk a that a, chu chuan Olive Oil vanga indona
hmingthang tak chu a ti tawp ta a ni.” Fiamthu sawi ang maiin a nui a.
Kay chu a tim uaih uaih a, “I sawi awmzia chu, i pa chu misual rualin an kap i tihna em
ni?” tiin a zawt a.
“Kum 15 kal taah khan,” Michaela chuan a ti a. “Chuta tang chuan tun thlengin engkim a
pangngai chho leh ta a ni.” a kal thui lutuk ang tih a hlau kher mai.
“Min tihhlauh i tum a ni,” Kay chuan a ti a. “Ka neih che i duh lo vang maiin.” Nui
chungin a kiuin Michaela nakah a nghawk zauh a, “Fing hle mai.”
Michaela chuan a nuih let ve a, “Ngaihtuah zui turin ka duh che alawm.”
“Mi paruk chu a that tak tak em ni?”
“Chu chu chanchinbua an ziah dan chu a nia lawm.” Michaela chuan a ti a. “Mahse
tumahin finfiahna an nei lo a ni. Mahse tumahin an sawi ngai loh a chanchin dang pawh a la
awm a ni. A rapthlak viau a ni ang ka pa pawhin a sawi ngai lo. Tom Hagen chuan a hriaa mahse
min hrilh duh miah lo bawk. Vawikhat chu, “Luca chanchin kha ka hriat theih nan engtianga upa
nge ka nih ngai ang?” tiin ka fiam a, ani chuan, “Kum za i nih hunah” tiin min chhang a ni.”
Michaela chuan wine chu a han lem khalh a, “Chanchin pui tham tak chu a ni ngei ang. Luca
chanchin thenkhat chu.”
Luca Brasi chu hremhmuna ramhuaite pawh ti hlau rum rum thei tur mi hi a ni reng a. Pa
tawi san tha len lawn tak, lu lian pui mai a ni a, a awm vena tawhphawtah chuan hlauhawm lo
thleng tur inralrinna dar khawn rik ang mai a ni. A hmel chu thinur hmel angin a rum ul reng a.
A mitmeng chu a buang ni mah se a nung teh sur lo a, a dul thim ruih thung. A hmui chu mitthi
hmel ang ema nunrawnna lang chu a ni lem lo a, pan hlang leh sen dang lam lek lek a ni.
Tharum thawhna lama Luca Brasi larna chu rapthlak tham a ni a, Don Corleone chunga a
rinawmna erawh hrilhfakawm tak a ni thung. Amah chu, amah chauh pawh chuan Don thuneihna
ruangama lung tangkai elkhen a ni. Amah ang chu an vang hle awm e.
Luca Brasi chuan Police a hlau lo a, vantlang mipui a hlau hek lo; Pathian a hlau lo va,
hremhmun a hlau lo bawk. A mihringpuite hlauhna leh hmangaihna a pianpui hauh lo bawk.
Mahse, a hlauh tur leh a hmangaih turin Don Corleone chu a thlang teh tlat a ni. Don awmna
hmuna hruai luh a ni chuan, mi hlauhawm Brasi chuan zahna lan tir nan a ding khawng at a. Buh
nuaihin lawmpuina thu leh an fa hmasa tur chu mipa ni se a duh thu a han sawi ve luam a.
Chutah innei tharte tana thilpek, lahkha ip a chhunga pawisa awm chu a hlan ta a ni.
Chuzawng chu a tih duh chu a ni mai a. Tom Hagen chuan Don Corleone-a nungchang
inthlak ta chu a lo hmuh hmaih lo. Don chuan lalin a chunga thil ropui tak titu a lo lawm angin
Brasi chu a lo dawngsawng a, tih dan phung pangngai ang ni lovin, lalin a mite chunga zahna a
lan tir angin a ni. A thusawi zawng te, a chet velna zawng zawngah te chuan Don chuan Luca
Brasi chu a a tan a hlu hle tih a lan tir zel a. Inneih thilpek chu ama kuta a fala a pek teh tlat
avanga mak a tihna vawite khat mah a lan tir lo. A hrethiam miau a ni.
Luca Brasi-an a pek lehkha ip chhunga pawisa chu midangin an pekte aia tam daih a ni
dawn tih chu chiang sa a ni a. Brasi chuan eng zat nge a pek ang tiin darkar tam tak a ngaihtuah
a, mi sawm dang zawng zawng te pek aia tam daih a ni tur a ni. Zahna sang ber lan tir nana mi
thilphal ber nih kha a duh a ni, chuvang tak chuan a ni Don kut ngeia pek a duhna chhan pawh
chu, thiam lo taka lawmthu a sawina te chu Don chuan a lo hmuh kan sak thin tlat a ni. Hagen
chuan Luca Brasi hmel rum ul mai kha bo vin, hlimna leh lawmna hmelin a thlak tih a lo hmu
thei a. Hagen-an a chhuahna tura a lo hawn sak kawngkaa a chhuah hma chuan Brasi chuan Don
kut chu a fawp a. Inveng ru deuh takin Hagen chuan Brasi chu a han nuih sak a, ani chuan polite
takin a lo kiai khum ve suk a ni.
Kawngka a inkhar chuan Don chu hahdam ta huai ni awm takin a thaw hak a. Brasi chauh
chu he khawvela hlauthawng taka awm tir theitu a ni. Chu pa chu leilung pianken thahrui, thunun
hleih theih loh ang mai a ni. Dynnamite anga dim leh fimkhur theihtawpa enkawl a ngai a ni.
Don chuan a dar a san uk a.
Dynamite takngial pawh mamawh hunah chuan tangkai takin a hman theih tho alawm.
Hagen chu a han en a, “Bonasera chauh a mi awm tawh.” tiin a zawt a.
Hagen chu a bu nghat a. Don chuan a han ngaihtuah vang vang hnuin, “I lo hruai luh
hmain Santino kha heta lo kal turin hrilh rawh. Thil a zir ve a ngai tawh a ni.”
Huanah chuan Hagen chuan ngaihtha fahran lovin Sonny Corleone chu a zawng a.
Bonasera chu lo nghak fan fan tura hrilhin Michaela-te thutna lamah chuan a kal a. “Sonny i lo
hmu mial em?” tiin a zawt a. Michaela chuan a lu a lo thing a. Hrep taka, tiin Hagen chuan a
ngaihtuah a. Sonny chuan khang hun chhung zawnga kha mo thiannu pui ber kha a lo zar buai a
nih vaih chuan buaina namen lo tak chu a awm ngei ang.
Sonny-a nupui te, chu nula chhungte pawh chu; chhiatna nasa tak a ni thei dawn tlat.
Ngaihtha lo zetin nichin darkar chanve vel liam taa Sonny-a lut a hmuhna kawngka lam pan
chuan hmanhmawh takin a kal ta a.
Hagen-a in lama a kal lai en reng chung chuan, Kay Adams chuan, “Tu nge a nih a? i
unaupa angin i sawia mahse hming hran a neih bakah Italian hmel a pu lo bawk si.” tiin Michaela
chu a zawt a.
“Tom hi kum 12 mi a nih atangin kan inah a cheng tawh a ni.” Michaela chuan a ti a. “A
nu leh pate an thi tawh a, kawtthlera mitna hri vei chunga a vak vai lai Sonny-an a hmu a, lo
hruai hawin kan inah a cheng ta reng a ni. Kalna tur dang a nei lo a ni. Nupui a neih hma zawng
kha chuan kan inah a awm a ni.”
Kay chuan phur zetin, “A romantic hle mai.” a ti a. “I pa chu rilru tha tak a nih dawn chu.
Fa hetiang zat a nei chung pawhin mi dang fa atan a la leh a nia.”
Italian pem ho chuan naupang pali awmna chu chhungkaw te tham tak niin an ngai tih
chu Michaela chuan a sawi chhuak duh lem lo a. “Tom hi fa lak a ni lo.” a ti a. “Kan zingah a
cheng mai a ni.”
“Oh.” Kay chuan a ti a. “Engvanga fa atana la lo nge in nih?” tiin a zawt dilchhut a.
Michaela chu a nui hawk a, “A chhan chu ka pa chuan Tom-an a hming a thlak chuan
inzah lohna, a nu leh pa dik takte zah lohna a ni dawn a ti tlat a ni.”
Chutah Tom Hagen-an Don office-a Sonny-a a tir lut lai leh Amerigo Bonasera a hui
zauh lai chu an hmu a. “Vawiin Ni angah te eng vanga i pa chu sumdawnna thila tibuai nge an
nih a?” tiin Kay chuan a zawt a.
Michaela chu a nui leh hawk a. “A chhan chu kan hnam danah Sicilian mi chuan a fanu
pasal neih niah an thil dil a hnar thiang lo tih an hre tlat alawm. Sicilian mi tumahin chutiang hun
tha chu bawhpelh an phal lo a ni.”
****
Lucy Mancini chuan a kawrfual sen dang chu pawt chhovin kailawnah chuan a tlan chho
a, Sonny Corleone-a hmel ngaihnobei tak, tisa chakna nasa tak avanga sen tul tawh a hmuh
chuan a hlau deuh hle. mahse he hun thlen tir tur hian a hma kar zawng khan a lo chhaih fiam
tawh a ni. College a kal laia a ngaihzawng neih pahnih te chuan engmah danglamna a thlen lova.
Kar khat bak a daih lo ve ve a ni. A ngaihzawng pahnihna nena an inhnial tumin a ngaihzawng
chuan a nihna sawiin, “Nei lian ropui si” a lo ti tawh a. Lucy chuan chu chu hrethiamin College a
kal chhung zawng chuan tumah a chhuahpui tawh lo reng reng a ni.
Tun nipui chhunga a thian tha ber, Connie Corleone pasal neihna atana inbuatsaihna an
neihna-ah, Lucy chuan Sonny-a chanchin an sawi ruk chu a hre fo a. Chawlhni tlai khat chu
Corleone chhungkaw chokaah chuan, Sonny nupui Sandra chuan zep hauh lovin a sawi vel a.
Sandra chu nu pianken tha tak, vun hraw hraih mai, Italy-a piang niin a naupan laia America
rama pem pui a ni a. Sa nghet leh hnute lian zet mai a niin kum nga chhung lekin fa pathum a nei
hman a ni. Sandra leh hmeichhe dangte chuan inneih zan rapthlak zia sawiin Connie chu an
chhaih fiam a. “Pathian leh,” tiin Sandra chu a nui kar kar a, “Sonny-a thil ka hmuh hmasak ber
leh chu chu keimahah a lut dawn tih ka han hriat chuan, ka te nasa teh e. Kum khat hnu thleng
chuan ka taksa chhung chu buhhawp chhum kawi ang zul hi ni rengin ka hre mai. Hmeichhe
dang chungah chu thil ropui chu a hmang tih ka hriat chuan, Biakinah kalin bati ka va chhi a ni.”
An zavaiin an nui hawk hawk a, mahse Lucy ve thung chuan a kap kara a tisa phu zaih
zaih chu a hre rauh rauh a ni.
Tunah Sonny awmna lam pana kailawna a tlan chhoh mek lai chuan tisa chakna nasa
takin a rawn tuam hlup hlup a. Kailawn chhawrdawh a thlen chuan Sonny chuan a kutah vuanin
a lo kai a, mut pindan ruak lam pan chuan a hruai ta nghal a. A hnunga kawngkhar a inkhar
chuan a ke chuan a chakna a hloh zova. Sonny-a chuan a rawn fawp a, vaihlo rim kha fak chu a
nam ram ram bawk a. A hmui chu a han kau a, chumi rual chuan a mo thian kawfual hnuaia
Sonny-a kutin a zut chho zai zai chu a hre thei a, a kut lian leh lum takin a kap kar a rawn zen a,
a kumkar khawih tura a Satin kekawrte sir lama a pawh sawn te nen lam chuan. Sonny-an a
kekawr a phelh chhung chuan a nghawngah a lo kuah chial a. Ani chuan a mawng tam ruak
kangah chuan manin a pawm kang a. Lucy chu tlemtea inperh kangin Sonny-a mal chu a kherh ta
chial bawk a. An lei leh lei chu inbuan tir tawp tawpin an inkeih hlawih hlawih a. Dim lo zeta a
rawn nawr avang chuan Lucy chuan bang a tauh dawt hial a ni. Chutah Lucy chuan a kap kara
thil sa zetin a rawn dep chu a hre ta a.
Lucy chuan a kut pakhat chu a kuahna atang chuan la thlain kaihruai turin hnuai lam chu
a han ban a. Tisa hlawm lian ropui zet, thisen zam inphan khat tuk chu a vuan ta a. Amaha nunna
nei tham zet a niin a phu ut ut a. A tisa nem lai huh hlap tawh a han tawh tir chuan hlim luat tuk
avangin a tap lo chauh a ni. A taksa chhunga nawr luh a nih a, rin phak bak khawpa nawmnain a
tuam avang chuan a thaw hlawp hlawp a, a bawp chu Sonny-a nghawng thleng dawn dawn
chuan a ti kang sang a. Chutah thal bawm chhunga thal mu thun ang maia a taksain kawlphe ang
maia rang leh dim lo baksaka nawr zawt zawtna a han tawh takah chuan, nuam tawrh avanga eu
ngawng ngawng chungin a dam chhunga a hmasa ber atan a vawrtawp turu zet chu a thleng ta a
ni. Chu mi rual deuh thaw chuan mipa chi tam zet chuan a mal mam han mai chu a rawn luan
pherh nguai ta bawk a. Chhuatah chuan an tlu dun hnawk a, inkuah chial chungin an thaw ta
hlawi hlawi a.
Hun eng emaw chen chu a liam hman a ni ngei ang, kawngkhar zawi tea kik ri kark karh
chu an hre ta a. Sonny chuan rang taka a kekawr ha tha pahin kawngkhar rawn inhawng thut tur
dang turin a ngheng tlat bawk a. Lucy chuan a kawrfual chu zut mar a han tum sa teh a, a mit chu
a de sawr sawr a. Nawmna nasa lutuk mai petu thil chu saw thawmhnaw dum chhungah sawn a
awm reng si a.
Chutah Tom Hagen-a aw, zawi sat chu an hre ta a. “Sonny, a chhungah khan i awm em?”
Sonny chu chu hahdam huaiin a thaw hak a. Lucy chu a siai zauh a, “Aw awm e, Tom,
eng nge ni ta?”
“Don chuan a office-ah a hmu duh che a ni, tunah.” a aw chu a la zawi sap reng a. Chutah
a kal sawn ri chu an hre ta a. Sonny chuan rei lote a han nghak leh hlek a, chutah Lucy chu a han
fawp vang vang a, Hagen chu a zui ve ta a.
Lucy chuan a sam a khuih a, a thawmhnaw te chu a siam tha bawk a. A taksa chu sil
urhin a hria a, a hmui chu nem deuh nuakin a hre bawk. Kawngkhar chu hawngin a chhuak a, a
kap kar chu ban chuapin hre mahse bathroom lam pan ta lo chuan kailawn lam a pan a, huan lam
a pan tlang ta nghal a. Mo thutna tura an siam bik lamah chuan kalin Connie bulah chuan a va
thu ta nghal a. ani chuan pangchang aw zetin, “Khawnge i awm daih? I va ruih hmel ve. ka bulah
awm reng tawh rawh.” a lo ti hlar a.
Mopa sambuang thang chuan wine chu a lo thlit a, hrethiam takin a lo nuih a. Lucy chuan
pawi a ti chuang lem hlei lo va. Grape wine sen khaih mai chu a in a. A kap kar hnawng ban
chap chu hre rauh rauhin a bawp a khaw kherh a, a taksa chu a khur ru der der a.
Wine a in pah chuan, no phenah atangin Sonny Corleone chu a zawng rilru deuh a. Amah
lo midang reng reng hmuh chak a nei lo. Connie beng bulah chuan zawi tein, “Darkar tlemte
hnuah chuan, engtinnge a awm tih chu i hre mai dawn a ni.” a ti a. Connie chu a nui kar kar a.
Lucy chuan inla muk zetin dawhkanah a kut suihin a nghat a. Monu hnen atanga ro hlu tak ruk
sak ang maiin, hlawhtling inti zetin a thu a ni.