NUAI 294 HMANNA FELLO !!
David Sailo
20th February 2023
16th February khan CM chuan House zahawm takah Mizoram sum hman dan endiktu CAG (Comptroller and Auditor General) Report a pharh dung a. Chutah chuan a ni, CM Department chan zinga Horticulture Department ah sum hmanna fel lo tak tarlan a nih tak ni!!
Dawhkanah an chapdarh ve satliah lova, a hmunah an chuk chat chat ṭhin hi a pawi.
Kum 2018-2019 chhunga Aizawl, Lunglei leh Serchhip Division huam chhunga Linkroad laih, cheiṭhat, Culvert leh leilawn siam hnathawh chu March - April 2021 khan diklo awma an hriat avangin a hmunah an endik ta a, diklo chu diklo tiin CM pharh turin Report an pe ta hmiah mai.
CONTRACTOR HNA A NILO TIH HRIA ILA :
Heng Linkroad cheibawl hna hi Contractor kuta pek a nilo a, Department in a thawh liau liau a ni.
Thil fel lo awmah hian Department ngei hi kawh hmasak ber tur tih chiang ila, tu Department chan nge tih pawh hriat tlan a ṭha ang. Rinthu a puhna emaw, huat hrim hrim vang lam ni lovin Department sum hman dik lo liau liau a CAG min Report dan a ni.
HNATHAWH DAN DIK LO LAI CHU :
Lunglei huamchhunga hmun 13 a hnathawhah hian Excavator (JCB kan tih mai) hman (Hire) hun chhung chu hnathawh hun chhung aiin a rei zawka, Excavator hman man hi hnathawh hunchhung tarlan a pelh aṭanga chhutin Nuai 72.15 laiin an pe chuang ta a nih chu!!
Excavator (JCB) hman ni a Department in a Lirthei Number an tarlan chu an han fiah a, Bike, Scooter, Car Number a ni daih tih hmuhchhuah a ni bawk a, he endik zuina aṭang hian Excavator hmanna phuahchawpah a vaiin Nuai 110 lai pek a ni tih an finfiah.
Hei bakah hian hmimun dang 18 a Linkroad cheina hnathawh endikna ah hetiang deuh bawk hian Excavator an Hire chu Car, Bike tih vel Number (An phuahchawp!!) tih an hmuchhuak leh a, heng an hmuhchhuah leh te hi hman manah Nuai 112 an pe chuang leh tih hriat a ni.
Tichuan Linkroad hmun 134 te CAG in an zirchiannaa Hortuculture Department hnathawh fel lo tak avangin avaiin Nuai 294 sum hmanna hi a fel lo hle tih hriatchhuah a ni ta a ni.
MAUA KAN HLAWHCHHAMNA NGAI CHIAH :
A thuhrimah Venus Bamboo a kan tih sual lian tak CM in a sawi kha mau (Raw Material) lakchhuahna kha a hautak lutuk tih a ni a, mahse tuna kan Mau/rua Tender to taka kan chhan hi a chinna (Cluster) Arlei zau hi a endik turin hmanrua engmah keng lo pawhin patling inpawh kal ṭawk ṭawk a ngai a nih cheu hi mawle. Patling pathum zawn ngai ni tak tak phei se kan va buai dawn em!!
Mau leh rua chu Forest Department chan tura ngaih a nih laii.n a Tender zawng zawng nen Horticulture in an buaipui hlauh te hi mak tak a ni.
TLIPNA :
Hetianga lirthei nihna leh a neitu chhuina awlsam tak, VAHAN mai mai hmanga hmuhchhuah theiha Department pakhat meuhin fel lo taka Nuai 294 lai mai an ti chingpen hi chhui zui tlak a ni a, CAG Report (A hmuna enfiah thlap bawk) tlawhchhan hian a ti fel lo tute, manṭang eitute hi chhuichhuaha hremna pek ngei chi a ni e.