THE GODFATHER
By Mario Puzo
Letlingtu :Lallawmawma (Loma Hmar)
Bu I
Then 6
Ningani zingah chuan Tom Hagen chu khawpuia a lawyer office-ah kalin, ZirtawpniaVirgil Sollozo nena meeting an neih hmaa tihfel ngai leh buaipui ngaite tihfel a duh a ni. Meeting
pawimawh tak a nih avangin tlai lamah Sollozzo-an chhungkaw sumdawnna atana rawtna a rawn
thlen tur chungchang an lo hriat lawk tawh chu inbuatsaihna neiha inkawmhona neih Don
hnenah a rawt a. Chu inkawmhona hmasa tan chuan rilru helhkamtu awm miah lo va a awm
theih nan inbuatsaihna felfai tak neih lawk a duh a ni.
Thawhlehni tlai lam tlai tawh taka California atanga a haw leh hnua, Woltz nena an
inbiak dan chanchin Don a hrilh chuan ani chu mak ti vak awm pawhin a lang lova. Hmaih nei lo
va engkim sawi turin a ti a,. Hagen-an hmeichhe hmeltha tak leh a nu chanchin a hrilh chuan duh
lo tih hriat zetin a lo ner sawk a. “Infamita” (Mualphona nasa tak thlen thei thil ti) tia phun supin
a pawmpui loh zia a lo tilang a ni. Hagen chu a zawhna tawp ber zawtin, “He pa hi mipa dik tak
a ni takzet em?” a ti a.
Hagen chuan Don zawhna awmzia tak chu eng nge ni ang tih a ngaihtuah vang vang a.
Khang kum chhung zawng khan chung mite laka Don hlutna chu a danglam avangin chu a
thusawi awmzia pawh chuan awmze dang a nei thei tlat a ni. Woltz chuan nunphung bik a nei
em? A tum a ruh takzet em? Chung chu a nei vek a, mahse chu chu Don zawhna awmzia chu a ni
tlat lo. Chu Movie Producer chuan bawl kual theih hlek loh turin theihna a nei em? Sum tam tak
hlohin a movie siam te tihkhawtlai ni ni ta se, a star lian berin Heroin a khawih tih a lan chhuah
avanga hmingchhiatna nasa tak te a tuar thei ang em? Chung zawng zawng chhanna chu ‘aw’ a
ni leh tho. Mahse chu pawh chu Don zawhna awm zia a ni lo. A tawpah chuan Hagen chuan chu
zawhna awmzia chu a hre fiah ta hram a. Jack Woltz chuan a zahawmna humhimna atana phuba
la turin engkim mai, hloh vek dawn pawh ni se, a thap ngam ang em?
Hagen chu a nui a. Don hmaah hian a nui khat viaua mahse tun tum chu a nui lo thei lo a
ni. “Amah chu Sicilian mi ni ang maiin alawm min zawh ni.” Hagen chuan a ti a. Don chuan
nelawm takin a lu a bu nghat a, chu fiamthu fakderna leh thudik awm chu a hrethiam a ni. “Aih.”
Hagen chuan a ti a.
Chuzawng chu a ni mai. Don chuan a tuk thleng chuan tih dan tur a ngaihtuah a. Nilaini
chawhnu lamah chuan a inah Hagen chu koin, tih dan tur a hrilh ta a.
Chu thil tih dan tur chuan nilengin Hagena rilrua a luah a, tha a tih em avangin a mit sulh
thei hial a ni. Don chuan harsatna chu a su kiang dawn tih chu sawi loha lum a ni a. Chumi tuk
zingah chuan Woltz chuan a rawn phone anga, Johnny Fontane chu indo filmah a changtu a nih
tur thu a rawn sawi a lo beisei a ni.
Chu tih lai tak chuan Phone a lo ri a, mahse Amerigo Bonasera a lo ni a. Chu Ruang
Sawngbawltu aw chu lawm avangin a khur hlawk hlawk hial a ni.
Don hnena inthianthatna kumkhua tur a hlan thu lo hrilh turin Hagen chu a hrilh a. Don
chuan a rawn koh chauh a ni ngai ni. Amah, Amerigo Bonasera chuan Godfather chu malsawm a
nih theih nan a nun thap pawh a pawi ti lo a ni. Hagen chuan Don chu a lo hrilh ngei ang tih a
tiam a.
Nitin Chanchinbua a phek laitaah chuan Jerry Wagner leh Kevin Moonan te kawtthlera
an tlu lai thla an tilang a. Thlalak chu hmuh a nuam fahran lo, tisa chansawm hrual hlawm leh hi
an ang ber awm e. Chanchinbuah chuan, Mak tak maiin an la dam teh tlat a, mahse Hospitalah
thla engemaw zat chu an awm a ngai ngei ang a, Plastic surgery an tih a ngai bawk ang, tiin an
ziak a. Hagen chuan Clemenza hrilh tur thil a chhinchhiah a, Paulie Gatto-a tan chuan thil tihsak
a ngai a ni. Hna a thiam riau tlat.
Hagen chuan Don Real Estate company te, a Olive Oil lak luh sumdawnna te leh In sak
lam Company te atanga report te chu hmun khatah dah khawmin rang tak leh dak thlarhin darkar
thum lai a thawk a. An vai chuan an thawk chhuak tha lem lo a, mahse indo a lo tawp tak
avangin sum siamtu tha tak an ni chho ang chu. A Secretary-in California atanga phone call a lo
kal tih a rawn hrilh chuan Johnny Fontane-a harsatna chungchang kha a lo theihnghilh hman tep
a ni tih a hrechhuak a. Tu phone nge tih a rinlawkna avang chuan a mur er er a. Phone chu la
kangin, “Hagen ka nia” a ti a.
Phone atanga aw lo chhuak chu huatna leh thinurna nasa tak avang chuan tunge tih hriat a
har hle. “Nang sawn chhe pa,” tiin Woltz chu a au a. “Kum za chhung jailah ka khung vek dawn
che u a ni. Nangmahni man nan chuan ka neih zawng zawng ka seng ang. Johnny-a tilmu ka hlep
bawk dawn a ni, min hria maw, nang vawk tenawmpa.”
Hagen chuan dam takin, “German-Irish thlah ka nia.” Phone-a mi chu a reh vang vang a,
chu tah phone dah ri rak ri chu a hre ta a. Hagen chu a nui sak a. Woltz chuan vawikhat mah Don
Corleone bik vauna chu a la chhak chhuak lo a ni. Kan mifingpa chuan a lawmman chu a hmu ta
ngei e.
****
Jack Woltz chu amah chauha mu thin a ni a. Mi 10 lai mut theihna tur khawp khum lian
tawk a nei a, lamna pindan ang maia zau bedroom a nei bawk. Mahse kum 10 kal taa a nupui
hmasa ber thih atang khan amahin a la mu ta reng a ni. Hmeichhia a mutpui ngai tawh lo tihna a
ni lo. A kum ngaihtuahin a la hrisel tha hle a, mahse hmeichhe naupang takte chauhin a phurna
an chawk tho thei a, chubakah tlai lama darkar tlemte chauh chutiang hun hman chu a taksa leh a
dawhtheihnain a tlin tawk a ni tih a hre tawh a ni.
He ningani tukah hian, engemaw thil avangin a harh hma hle a. A mut pindan lianpui chu
vartian khaw eng chuan phul hmun tiauchhumin a bawh chuk ang maia fiah lovin a lantir a. A
khum mawng lam ke bulah chuan thil engemaw pian hmang a hriat than tak hi a awm a, Woltz
chuan a kiua indawm kangin a han en chiang deuh a. Sakawr lu pianhmang ang a ni. La hai deuh
muai chungin Woltz chuan khawnvar chu a han ban a.
A thil hmuhin a thawn thut avang chuan a damlo nghal rawih rawih thei. Tuboh lian puia
a awma chhut ang maiin a lungphu chu mumal nei lovin a phu zawih zawih a. A lu a hai muai
muai a. Savawm vuna siam chhuatphah chhah tak chungah chuan a luak ta bawrh bawrh a.
A taksa atanga lak hrana awmin, Sakawr ropui Khartoum lu dum mam zun mai chu
thisen nen a lo inchiahpiah nuaih a. A duar var huarte pawh a lo pawrh tuarh mai bawk. A hmui
chu thil phuanin a bawh luk a, Apple tiat zet a mit, rangkachak ang maia de sur thin pawh chu
thei hmin tawih ang maiin, thisen khang tawh nen a tial ruk mai a ni. Woltz chu thlabarna nasa
takin a man a, chu thlabarna avang chuan a chhiahhlawhte a au nghal tuarh tuarh a. Chu
thlabarna avang bawk chuan Hagen kha a call-in a vau a nih kha. Mi a ang maia a chet dan chuan
chhiahhlawh hotu chu a tiralkhel hle mai a, Woltz-a Physician bik leh Studio-a a
thachhangdawltu a ko ta a ni. Mahse an lo thlen hmain Woltz chuan ngai a lo awh leh hman a ni.
He thil hian a thawng takzet a ni. Dollar nuaih ruk man zet sakawr ti chhe duh tu chu eng
ang mi nge maw a nih le? Inthawtlawkna awm miah lo lehnghalin. Thupek tawh sut leh tura
inbiakremna eih pawh awm lo bawkin. Lainatna nei miah lo, thil hlutna ngai pawimawh miah lo
mihring, ama dan siam chauh zawm mi thil tih a ni. Chubakah he mi phena awm mihring hi
thiltithei tak leh fing tak, a sakawr In vengtu pawh engmah loa siam thei a ni bawk. Woltz chuan
a sakawr chu a nghawnga hreipui hmanga cheh chhum a nih hmain damdawiin an hrai rui fe tih a
hre chhuak ta bawk a ni. Zan lama vengtute chuan engmah an hriat loh thu an sawi a. Woltz
ngaihdan chuan chu chu thil theih loh a ni. Tham an ni ngei ang a, a thamtu sawi turin an siam
theih ang chu.
Woltz chu mi a a ni lo a, mahni hma a sial hle tih mai chauh a ni. A khawvela a
thiltihtheihna a lek kawh dan chu Don Corleone-a thiltihtheihna aia chak zawk nia a ngai chu a
thil tih sual lian tak a ni. He thil hi a dik lo tih fiahna a duh hle mai. Thuchah chu a hrechiang hle
a ni. Hausa tak a ni chungin, US President nen inhnimhnai tak an ni chungin, FBI Director nena
inthian tha tak an ni chung pawhin Italian Olive Oil chawluttu satliah ve mai chuan a that thei
reng mai. A that thei tak tak reng chu a nih kha!
A chhan chu Johnny Fontane hnena Movie-a chanpual a pek loh vang maiin. A awihawm
loh hial zawk.
Chutianga chet theihna dan tumahin an nei lo. Chutianga an chet zel chuan khawvel hi
engtinnge a awm ang? A atthlak hle a ni. Chu mi awmzia chu nangma pawisa ngei te, nangma
company ngei ngei leh thupek pe thei tura thuneihna i neih te pawh i hmang thei miah dawn lo a
ni. Communism aiin a let sawm laiin a tha lo zawk ang chu. Hetiang thil hi tih chhiat vek a ngai
a ni. A awm ve phal chi a ni lo.
Doctor chuan Woltz chu na chhawkna a pe a. Chu chuan rilru fim taka awm tirin,
ngaihtuahna fim a hmang thei ta a ni. A thin thawngtu ber erawh chu Don Corleone-an engah
mah ngai lo ni awm taka Dollar nuai 6 lai man khawvela sawkawr hmingthang ber tihhlumna thu
a pe thei mai chu a ni. Dollar nuai ruk! chu lah chu a bul tanna chauh a la ni lehnghal. Woltz chu
a tim uaih uaih a. A khawsakna a lo sawhngheh tawh te chu a han ngaihtuah a. A hausa a, A kut
hmeh rik khauh paha a hnuaia thawk tura contract a tiam chuan khawvela hmeichhe hmeltha ber
pawh a nei nghal thei. Lalnu leh lalpa te a banphakah an awm a, thuneihna leh pawisain a siam
theih nun tha ber a hmang mek a ni. Thin butut avang ringawta chung zawng zawng chan chu a
atthlak hle ang. Corleone chu a biakpawh mai a ngai ang.
Intlansiak chi sakawr thah avanga dan hmanga hremna chu eng nge? A nui chhuak ta
chiam a. Doctor leh a chhiahhlawhte chuan ngaihtha lo zetin an lo thlir reng a. Chutah thil dang a
hre chhuak leh ta. Chutianga chaldelh zeta tu emawin a thuneihna pawisa miah loa a hmuhsitna
avang chuan California pumpuiah mi nuihzatbur a ni dawn, tih hi. Chu chuan thutlukna a neih tir
ta. Amah chu an that lo maithei asin, tiin a ngaihtuah a. Nge ni ang a, chu aia runthlak zawk daih
ruahmanna an lo nei ru khiau zawk em ni?
Woltz chuan thupek pawimawh tak chu a chhak chhuak ta a. Chu thil hretu te chu a mi
rinte vek an ni a. Chhiahhlawhte leh doctor chu Studio chhunga inngeihlohna leh Woltz chanchin
tha lo lam thup tlat tura thutiam la vek an ni. Chanchinbu mi te chu sakawr hmingthang
Khartoum chu England atanga lawnga phurh a nih avanga dam loin a thi tia hrilh an ni a. Estate
chhunga hmun biru lai deuhah Khartoum taksa chu phum tura thu pek a ni ta bawk.
Darkar ruk hnuah chuan Film Executive Producer hnen atangin Johnny Fontane chuan
Phone Call a dawng a, Thawhtanni lo thleng tur atanga hna zawm turin hrilh a ni ta a ni.
*******
Chu mi tlai chuan Hagen chu Don inah chuan a tuk maia Virgil Sollozzo nena inhmuhna
pawimawh tak awm tur atana inbuatsaihna nei turin a kal a. Don chuan a fapa upa ber chu lo tel
ve turin a hrilh a. Sonny Corleone, a hmel ngaihnobei taka chauh hmel zet lo lang chhuak chuan,
tui a lo in mek a. Kha mo thiannu kha a lo khuaikhem leh tawh a ni ngei ang, tiin Hagen chuan a
ngaihtuah a. Lungngaihna tur dang bawk.
Don chu thuthleng ban neiah chuan thuin Di Nobili sikret a zu mek a, chu pindanah
chuan a bawmin Hagen chuan a chhawp sa a ni. Havana sikret zu zawk tura a tih pawhin Don
chuan Havana sikret chuan a hrawk a tihnat thuin a hnial tlat a ni.
“Kan hriat tur tul ang zawng zawng kan hre vek tawh em?” tiin Don chuan a zawt a.
Hagen chuan a thil chhinchhiah a dahna file chu a han hawng a. A thilchhinchhiah te chu
dik lo thei a ni lo, thil pawimawh awm thei ang zawng zawng a en vek tih lantir nana
chhinchhiahna ruk ang lek chauh a ni. “Sollozzo chu puihna dila rawn kal tur a ni a,” Hagen
chuan a ti a, “Chhungkaw hnena a tlem bera dollar maktaduaih khat theh chhuak ve tur leh dan
kengkawhtu lam atanga him theihna tura kan intiamna rawn beiseia rawn kal tur a ni a. Chutah
chuan hlawkna kan hmu ve dawn a, a zat erawh hriat theih a ni lo. Sollozzo chu Tattaglia
chhungkuain an hriatpui a, anmahni pawhin hlawkna an nei ve maithei e. Chu thil tih tur chu ruih
hlo lam a ni. Poppy (ram hnim chi khat, ruihhlo siamna atana hman) chinna hmun Turkey-ah
Sollozzo chuan zawmpui a nei a, chuta tang chuan Sicily-ah lawnga phurh luh a ni a, buaina a
awm lo. Sicily-ah chuan chu hnim Heroin-a siam mai tur chu a dah a. A him zawk Morphine-a
siam chhuah phawt a, a tul dan a zira Heroin-a siam tura ruahmanna awm a ni. Sicily-a Heroin
siamchhuahna hmun chu venhim tlat a ni a. Harsatna awm ta chu he rama lak luh a, sem chhuah
chu a ni ta a ni. Chubakah, sum pui, dollar maktaduaih chuang chu thingkunga rah mai mai a ni
tlat lo a ni.” Hagen chuan Don lo then sak chu a hmu a. Don chuan sumdawnna thila tul lo taka
han thluaithlum vel hi a ngaithei vak lo a ni. A sawi chhungzawm leh nghal vat a.
“Sollozo the Turk, tia an kohna chhan hi chhan pahnih a awm a. Turkey-ah a hun tam
zawk a hmang a, Turk mi nupuiah neiin fate pawh a nei a ni maithei. Pahnihnaah chuan, Chemte
hmang thiam tak a ni awm e, emaw a naupan deuh laiin a lo ni thin a ni ang. Tha tawk nia inngai
leh hotu bera indah tlat a ni. Record a nei tawh a, vawi hnih taninah hun hmang tawhin, a
vawikhatna chu Italyah a ni a, a vawihnihna chu US-ah. Thuneitute-ah chuan ‘Narcotic Man’ tia
hriat lar a ni. hei hi kan tan hlawkna pakhat a ni ang. A awmzia chu a hotu ber a nih dawn avang
leh record a lo neih tawh avang chuan thuhretuah a tang thei dawn miah lo a ni.American nupui
neiin fa pathum a nei mek bawk a. Chhungkaw tan pa tha tak a ni.”
Don chuan sikret zu hlut hlut chungin, “Santino, eng nge i ngaihdan?”
Hagen chuan Sonny-a sawi tur chu a hre reng a ni. Sonny chuan Don thuhnuaia awm
reng chu a ning tawh a. A ma puala thil lian tham tak tih a duh a ni. He thil hi a tha hle ang chu.
Sonny chuan Scotch chu a han in khalh khalh phawt a, “He thil dip varah hian pawisa chu
a tam hle mai a.” A han ti a, “Mahse a hlauhawm viau a ni. Thenkhat chu he thil avang hian kum
20 laite jailah an tang a ni. Chet thawhna tak takah tel lo va, venhimna lam leh sum thehchhuah
lam chauh khawih ta ila, a that viau ka ring e.”
Hagen chuan pawm pui tih hriat takin Sonny chu a en vang vang a. A card khelh chu a
khel fuh viau e. A tana tha tur chu a hria mawle.
Don chuan a sikret chu a han fawp vang vang a, “A nih nang, Tom, eng nge i ngaih dan?”
Hagen chuan a sawi tur chu a ngaihdan dik tak a nih theih nan a han sawm khawm a. Don
chuan Sollozzo-a rawtna siam tur chu a hnawl dawn tih hrechiang thawkhatin a inhria a. Mahse a
tha lo ber mai chu, Hagen chuan a hmaa a lo tawn tawh tlem te atanga a ngaihtuahin, Don chuan
thil a ngaihtuah chiang lo deuh niin a hria, hma lam thui tak a dawn lo deuh a ni.
“Sawi ta che Tom,” tiin Don chuan tihphur nan a lo ti a. “Sicilian Consigliere meuhte
pawhin an pute thu an pawmpui lo ve thin tho a nia.” a ti a, an nui zo ta vek a.
“I lo ‘yes’ a tulin ka hria,” Hagen chuan a ti a. “A chhan chu i hriat sa a nih kha. Mahse a
pawimawh ber chu hei hi a ni. Sumdawnna dang zawng zawng aiin ruihhlo lamah hian sum deh
chhuah a tam zawk a. Kei nin kan ti lo a nih chuan, midangin an ti tho ang, chung midangte chu
Tattaglia chhungkua te pawh an ni maithei. Chhiah tlingkhawm an hmuh atangin Police leh
Politics lam chakna an fawm khawm tawk tawk ang a, an chhungkua chu kan chhungkua aiin an
chak vat dawn a ni. A tawpah chuan kan thil neih min chhuhsak turin an lo kal mai ang. Ram
hrang hrang ang deuh hi kan ni, ralthuam an inbel a nih chuan, kan inbel ve a ngai a ni.
Chhawrbawk tur an ngah chho zel a nih chuan, keini tan hlauhawm an ni thuai ang. Tunah chuan
Pawisa khelhna lam te leh Union ho te kan nei a, tun atana a tha ber ber an ni. Mahse Ruihhlo
lam sumdawnna hi a la tha dawn chauh a. Chu ta tanga hlawkna tlem lo chan ve emaw, kan neih
zawng zawng thap emaw a ngaiin ka hria. Tunah mai lo pawh, tun atanga kum 10 hnu velah te
pawh.”
Don chuan a ngaihsak hmel zet mai. “Chu chu thil pawimawh tak a ni reng a ni,” tiin a
phun sup a. A thaw hak a, “Naktuk eng tik hun nge he Pathian ringlo pa nena kan inhmuh hun tur
chu?” a ti a.
Hagen chuan beisei nei takin, “Zing dar sawmah hetah a rawn thleng ang.” Don chuan a
pawm maithei a ni.
“In pahnih khan ka bula awm turin ka duh che u a ni.” Don chu a tho a, a han zi mar vel
a, a fapa bana kai chungin, “Santino, zaninah tui taka mut tum rawh. Ramhuai ang mai alawm i
nih. Inenkawl tha rawh, i naupang reng dawn lo a nia.”
Sonny-a, a pain a fapa a nihna anga ngaihsakna a rawn tihlan avanga phur ta deuh chuan,
Hagena zawh ngam loh zawhna a rawt zawt ta a, “Pop, Eng nge i chhanna tur chu ni ta?”
Don Corleone chu a nui a, “Za zela kan chan tur zat ka hriat hma leh thil tul dangte ka
hriat hma chuan eng tin nge ka hriat theih ang? Chubakah zanina thurawn ka dawn te ka
ngaihtuah phawt a ngai a ni. Hmanhmawh vut vuta thil ti mi ka ni lo hrim hrim bawk a.”
Kawngka pana kal pah chuan Hagena hnenah chuan pangngai takin, “Indo hma khan Turk pa
hian Nawhchizawrha sumdawnnain ei a zawng tih kha i thil chhinchhiahah khan a tel em? Tuna
Tattaglia chhungkuain an tih ang hian. I theihnghilh hmain chu chu ziak ang che.” Don aw-ah
chuan ngaihsan lohna a lang tel a, Hagen chu a sen tawn tawn a. Sawi chhuah tur nge tur loh
tihah a inbuk viau kha a nia, inkaihhnawih lo deuhin a hria a ni. Mahse Don ngaihdan siam tur a
tikhawlo ang tih a hlau hle. Mipat hmeichhiatna lamah chuan a khermei kher mai bawk si a.
****
Virgil ‘the Turk’ Sollozzo chu sa nghet tlet tawt, pa vantlang tak a ni a, a vun uk kharh
avang chuan Turk mi dik tak a ni emaw tih pawh awl zate a ni. Ngunhnam ang maia hnar zum
varh, mitmu dum ram mai, nunrawn hmel zet a nei a. Pa zahawm pui mai hi a ni a.
Sonny Corleone chuan kawngkaah lo hmuakin Don leh Hagen-an an lo nghahna Officeah chuan a hruai lut a. Hagen chuan Luca Brasi tih lohah chutianga mi hlauhawm hmel pu chu a
la hmu ngai lo.
Hawihhawm takin an inchibai kual a. He pa hian mipa taka huaisenna chu a nei em? tiin
Don hian min zawt ta se, ‘aw’ tiin ka chhang ngei ang, tiin Hagen chuan a ngaihtuah a. Mi
pakhat chauh ni si chutiang taka huhang ngah chu a la hre ngai lo, Don pawh tiamin. Don lan dan
lah chu a nalh vak lo reng a, a inchei ho lam mah mah a, a lo lawm dan pawh chu a thingtlang
hliah hliahin a hriat a ni.
Sollozzo chu a sawi tumah chuan a lut nghal chat a. Sumdawnna chu ruihhloa
sumdawnna a ni a, engkim buatsaih a ni tawh. Turkey rama Poppy chinna hmun chuan kumtinin
sum tam tham tak a hmuh sak thin. France ramah chuan venhimna hnuaia awm Morphine siamna
hmunpui a nei a, Sicily ramah Heroin siamna hmun pui him tha tak a nei bawk. Heng ram pahnih
tea a ruka bungraw tawlh chu thil awlsam leh him tak a ni. America-ah erawh chuan za zela
panga chu hloh a ni dawn a, a chhan chu FBI chu an hriat theuh angin tham theih an ni ve lo a ni.
Mahse a hlawkna chu a hrawl hle tho ang, hlauhthawn tur a awm chuang lo.
“Anih chuan engvanga ka hnena lo kal nge i nih?” Don chuan hawihhawm takin a zawt a,
“I thilphalna chu engtin nge ka phu phak ve dan?”
Sollozzo-a hmel thim ruih chu a ngeng ngalh reng a, “A pawisain dollar maktaduaih hnih
ka mamawh a ni.” a ti a. “Chutiang bawka pawimawh chu, hmun pawimawha thil ti thei tak thian
ka mamawh bawk a ni. Bungraw phurtu ka mite chu kum a vei chuan man an ni nual dawn a.
Chu chu pumpelh ngaihna awm miah lo a ni. An vai chuan pawi khawihna record la nei lo vek
an ni tih ka tiam ngam a. Chu chu roreltu tan pawh inhremna nep deuh a nih theih nana tan chhan
tur a ni thei ang. Ka miten buaina an tawh huna kum hnih-khat aia tam lo tan tir an ni ang tia
tiam thei tur thian ka mamawh a, chutiang a nih chuan an ngawi tlat dawn a ni. Mahse kum
sawm leh sawmhnih te a nih chuan, tu nge hria? He khawvelah hi chuan chak lohna tur tam tak a
awm tlat a ni. An tawng chhuak palh thei a, mi pawimawh zawkte hlauthawng takin an siam thei
tlat a ni. Chuvangin dan lama inhumhimna neih chu tih makmawh a ni ta a ni. Ka lo hriat danin,
Don Corleone, Kutdawh iptea pawisa nawi awm zat zeta tam thunun theih Judge i nei tih hi.”
Don Corleone chuan chu fakna chu hre awm pawhin a lang lo va. “Kan chhungkaw tan
chuan za zela engzat nge ni dawn?”
Sollozzo-a mit chu a de sawr a, “Za zela sawmnga.” A han chawlh hlek a, chu tah nem
duaiin, “Kum khatnaa i chanpual chu Dollar nuaih thum emaw nuaih li emaw a ni ang a, tichuan
a sang chho zel dawn a ni.” a ti a.
Don Corleone chuan, “A nih leh Tattaglia chhungkua tan za zela engzatnge ni ve thung
ang?”
A vawikhat nan Sollozzo chu a hlauhthawn hmel ta deuh a, “Ka chanpual atangin a then
a zar an chang ve ang, chet chhuahnaah an puihna ka mamawh a ni.”
“Tichuan,” Don chuan a ti a, “Sum beithamte leh dan lama venhimna avangin za zela
sawmnga ka dawng ang a, Chet chhuahna lam chu ka lungkham a ngai lo vang. Tih hi em ni min
hrilh i tum?”
Sollozzo chu a bu nghat a, “Dollar maktaduaih hnih chu beitham nia i ngai a nih chuan.
Don Corleone, ka lawmpui a che.”
Don chuan dam raihin, “Tattaglia ka zah avang te, mi tak tak, zah taka en tur che i ni tih
ka hriat avang chauha hmuh remti che ka ni a. ‘Aih’ tiin ka chhang dawn che a, mahse a chhan
ka hrilh ang che. I sumdawnna chu a hlawkna a san ang bawkin a hlauhthawnawmna pawh a
sang a. I thiltih turah chuan, ka tel ve a nih chuan thildanga ka hlawkna a tichhe dawn tlat a ni.
Ni e, politics-ah chuan thian tam tak ka nei ngei alawm, mahse pawisa khelhna lam bansana
ruihhlo-a sumdawnna ka khawih tih an hriat chuan thian tha anga en theih an ni dawn tawh lo a
ni. Pawisa khelh hi zu lam ang niin an ngai a, thil tha lo mah ni se pawisawi lo niin an ngai a ni.
Ruihhlo lam thung chu sumdawnna tenawm takah an ngai tlat bawk. Ni lo e, lo hnial tum duh
suh, ka ngaihtuahna ni lovin an ngaihtuahna a ni ka sawi ni. Engtinnge miin ei a zawn tih hi ka
buaina a ni ve lo. Ka hrilh duh zawk che chu he i sumdawn mekna hi a hlauhawm hle a ni tih hi a
ni. kum sawm chhung chu ka chhungkaw memberte hi tha takin, hlauhawm leh natna tawk lovin
an awm a. Duhamna avang chuan anmahni leh an nun dan chu ka tiderthawng thei lo a ni.”
Sollozo-an a hrilhhaizia a tihlanna awmchhun chu, amah tanpui tura Hagen emaw Sonny
emaw an tawng beisei ni awm taka room chhug melh kuala a mit kal ralh ralh chu a ni. Chutah,
“I dollar maktaduaih hnih chu a him loh i hlauthawng deuh em ni?” a ti a.
Don chu hul hakin a nui a, “Aih.”
“A peipunna lam chu Tattaglia chhungkua pawhin an tiam thei ngei ang che.” Sollozzo
chuan a ti leh a.
Chutah tak chuan a ni, Sonny Corleone-an ngaihdan leh thil nih dan phunga ngaihdam
theih loh tih sual a rawn neih tak ni.
Phur hmel zetin, “Tattaglia chhungkua chuan kan sum dah lak kir leh chu kan hnen
atanga hlawkna beisei miah lovin an tiam a maw?” a ti a.
Hagen chuan a hlauthawng hle mai. Don-in mitmeng vawt raih leh kha zeta a fapa upa
ber a en chu a va hmu a, ani chu hrethiam lo tak leh zamna avangin a thu khawng reng a.
Sollozzo chu a han hawi kual leh a, mahse tunah zawng lungawi takin a ni ta thung. Don kulhah
chuan khi chat a hmu ta miau a ni. Don a lo tawng chhuah leh chuan a awah chuan inhnarna a
lang tel a, “Naupang ho hi chu an duham thin a.” A ti a, “Tunah chuan nungchang mawi pawh an
hre tawh lo a nih hi. Aia upate pawh zah zolovin an lo inrawh thlazen a nih hi maw. Mahse ka
fate ngainatna avanga chak lohna ka neih avang hian ka tikhawlo zo ta hlawm a nih ber hi. I hriat
ang khan, Signor Sollozzo, ka chhanna che kha thu tawp a ni. I sumdawnnaa vanneihna tha tak i
dawn theih nan duhsakna ka hlan che a ni. Keima sumdawnna nen chuan a insu buai miah lo a
nia. Ka tihthlawn che avangin pawi ka ti khawp mai.”
Sollozzo chuan inthlah nan a lu a kun a, Don chu kut thinga chibai bukin, Hagen chuan
Car thlengin a va thlah ta a. Hagen a mangtha lai chuan a hmelah engmah chhiar theihin a tilang
lo.
Rooma Hagen a kir leh chuan, Don Corleone chuan Hagen hnenah, “Kha pa kha engtin
nge i ngaih?” tiin a zawt a.
“Sicilian a ni tlat a,” Hagen chuan a ti ro halh a.
Don chuan ngaihtuah muk zetin a lu a lo bu nghat a. Chutah a fapa lam chu a hawi a, dam
dapin, “ Santino, Chhungkaw pawn lam mite hnenah eng nge i rilrua awm tih hriattir ngai tawh
suh ang che. Eng nge i kuta i hum tih hriattir tawh ngai suh. Kha nula tleirawl nena in lemchan
nuihzatthlak tak avang khan i thluak hi a no ta deuh niin ka hria. Duhtawk tawh la, sumdawnna
lamah i rilru dah tawh ang che. Ka hmuh phak lohah awm nghal rawh.” a ti a.
Hagen chuan Sonny mak ti hmel chu a hmu a, chutah a pain a hauh avanga thinrim hmel
nen chuan. A nula mina chu Don chuan a hre lo turah a ngai em ni? tiin Hagen chuan mak a lo ti
hle a. Chubakah nichin maia thil tihsual hlauhawm tak a neih kha a hre miah lo em ni? Chu chu a
dik a nih chuan, Hagen chuan Don Santino Corleone hnuaia Consigliere nih chu a chak lo kher
ang le.
Don Corleone chuan Sonny-a chhuah thleng chu a nghak a. Chutah savun chair ban neiah
chuan a thu thla hnawk a, in tur a duh tih zaizirin a lan tir nghal bawk a. Hagen chuan annisette
chu novah a thlit sak nghal a. Don chuan rawn en chhovin, “Min hmu turin Luca Brasi rawn tir
ang che.” a ti a.
****
Thla thum hnuah chuan, Hagen chuan Office hna chu hmanhmawh takin a thawk mawlh
mawlh a, hma taka chhuah a, a nupui leh fate tana Krismas thilpek tur lei a rilruk deuh a ni.
Johnny-a phone call-in a rawn tibuai ta a, ani chu a rawn phul hlut a.
Film chu shoot tan a ni tawh a. Don tan krismas thilpek, a mit tipawng zawrh thei tur
khawp a rawn thawn mek a, amah ngeiin rawn pek tum a ni a, mahse movie lamah thil tih ngei
ngai a awm avangin, Tuipui kam lamah a awm a ngai tlat a ni. Hagen chuan a dawhtheih lohna
chu thup a tum hram hram a. Johnny Fontane -a ngainatawmna hi a lakah chuan a sang teh vak
lo. Mahse chu thilpek a hriat chakna chu rawn thoin, “Eng thil nge a?” tiin a zawt a. Johnny
Fontane chu a nui hak a, “Ka hrilh thei lo che, krismas thilpek atana tha lawr lak a ni.” Hagen-a
hriat chakna chu a bo hmak a, Hawihhawm takin phone chu a dah thei ta hram a.
Minute sawm hnuah chuan Connie Corleone-in phone-ah a be duh tih a Secreatry chuan a
rawn sawi a. Hagen chu a thaw hak a. Hmeichhe naupang a nih kha chuan Connie chu fel tak a
ni a, mahse pasal neia nutling a nih ang erawh chuan a chimawm khat tlat a ni. A pasal sawiselna
tur a nei reng a, a nu tlawh tura rawn hawin ni hnih ni thumte a cham fo thin. Carlo Rizzi pawh
chu nuihzatbur maiah a insiam ta bawk. Sumdawnna pangngai ve tawk takah dah a ni a, mahse
chu pawh chu a tlachhe der a ni. Zu a in nasain a hur kual a, pawisa a khelh bakah a nupui a
sawisa fo mai bawk. Connie chuan a chhungte chu a hrilh lem lo a, mahse Hagen chu a hrilh
thung. Eng chanchin lungchhiatthlak tak hre leh ang i maw, tiin a ngaihtuah a.
Mahse, Krismas boruak chuan a tiphur ve niin a lang. Krismasah eng nge a pa chuan a
duh ber ang tih Hagena chu rawn zawh a tum mai chauh a lo ni a. Sonny, Fred leh Mike te tan
pawh. A nu tana a lei tur chu a lo hual lawk sa tawh a. Hagen chuan thil eng eng emaw a han
rawt pui a, mahse a lo hnawl fithla vek a ni. A tawpah chuan a duhtawk tir thei ta hram a.
Phone a lo rik leh chuan Hagen chuan a paper ken lai chu bawmah a paih lut rawk a. Eng
nge ni na vei. A chhuak tawh tur a ni ang. Mahse phone call lak duh loh chu a rilruah a lang lo
hrim hrim a ni. A secretary-in Michael Corleone-an a rawn phone tih a rawn hrilh chuan phur
takin a phone chu a la nghal a, Michaela hi chu a ngaina riau a ni.
“Tom,” Michael Corleone chuan a ti a. “Naktukah Kay-i nen khawpuiah kan rawn
inkhalh thla dawn a. Krismas hmain kan putara kha thil hrilh tur pawimawh tak ka nei a ni.
Naktuk zanah inah a awm ang em?”
“Tehlul mai.” Hagen chuan a ti a. “Krismas hma chuan khua a chhuahsan lo vang. Tihsak
theih che ka nei em?”
Michaela chu a pa ang bawka tawng tlem a ni a. “Aih” a ti a. “Krismas-ah kan inhmu ang
chu tiraw. Long Beach lama kal vek tur a ni a, a dik em?”
“A dik e.” Hagen chuan a ti a. Mike-an inbiak lumlam vak pawh awm lova phone a dah
thin chuan a tihlim riau a ni.
A secretary hnenah chuan a nupui lo phone a, a rawn tlai deuh tur thu leh zanriah bawp
erawh man hmana thlen a tum thu hrilh turin a ti a.
Building pawn atang chuan Macy’s lam panin a chhuk thla hlawk hlawk a. Tu emawni hi
a kalna turah tak a rawn ding a. Sollozzo a hmuh chuan mak a ti hle.
Sollozzo chuan a banah a rawn vuan a, zawi supin, “Hlauthawng suh, biak che ka duh
mai a ni.” a ti a. Kawngsira car ding kawngkhar chu a rawn inhawng vat a, Sollozzo chuan
hmanhmawh zetin, “Tah khan lut rawh, biak che ka duh a ni.” a ti a.
Hagen chuan a ban chu a vawnna atang chuan a thingthla a, a la hlauthawng lem lo, a
chiai deuh chauh a ni. “Ka hman lo tlat,” a ti a.
Chutih lai chuan a hnungah mi pahnih hi an rawn ding a, Hagen chuan a ke chu zawi
rawih rawihin a hre hial. Sollozzo chuan nem takin, “Carah khan lut rawh, that tur che ni ila
tunah hian i thi tawh ang. Min ring rawh,” a ti a.
Hagen chuan tang buai duh lovin carah chuan a lut ta nghal a.