Hmangaiha Sailo
Zofa chhak thlang chhim leh hmara
lêng zawng te; siamtu hmun khat, chhulkhat kual vek kan ni; tih hian bul ṭan
teh ang.
Ram leh hnam hmangaihna thinlung pu- a inchhâl
si, Zohnahthlâk chin pawh huikhâwm aia a lengdarh deuh roh zâwnga ṭawng pai leh
ṭawng hran neite hmu mizo ve thei meuh tlat lo hi kan tam khawp mai a. Chhul khat kual rau rau si hi hmangaih chin
ramri kan insiam a. Hetiang mi hian hnam hmangaihna thûk tak an va pawh phâk lo
hrim hrim. An kâ a kua a a thûin an
hmangaih der ve lek fang ani. Theih ni se, Zofa huanga hnam chi hrang tam tak
seng luh dan awm belh se duh nâk alaiin; ṭawng hran nei ve lêm lo keini Mizo ṭawng
kan tih mai hmangtute'n ṭawng hrang neite rilru kan hliam fo leh, kan va dah
hla deuh fo hi kan sim daih aṭul hle.
Khawi chin hi nge Mizo tih pawh hre hrang lo hian; hnam hi hmangaih tak
tak theih ani lo. Fa û nih erawh chu ṭawng hran nei lo ho tal hian chan angâi
hle maiin ka hria; Fa û nih tlin tur chuan kan huangah khân Zohnahthlak hnam
tin hi an len vek angai a. Nang zawng i ṭawng apai êm mai kan ti thiang lo.
Zoramin min hring tawh a. A chhul chhuak ṭheuh ṭheuh Mizo tih neitu bîk kan awm
miah lo. Hnam bil ṭawng nei chuan aduh leh hmang rawh se, a zalenna ani.
Zohnahthlâk anih tho avângin keiin ramri ka lo kham hnan ngawt thei lo.
Khawi ram leh hnam pawhin Hnam hlâwm khat bîk(A group of Nations) kan
tih ho hrim hrimah hian, hnam pêng tam tak an lo inkuah khâwm ve fur tho va;
chu chuan hnam lian a lo siam mai ta ṭhin ani. Mizoram, kan tih chhûngah pawh
Zohnahthlâk te kan inpawm khâwm thiam phawt chuan, hnam hlâwm lian leh zahawm
tham kan ni ve thei mahna!
Ram buai leh vai-len hun an tihte khân zofate min ûm darhin, min ûm ṭiau
nasa êm mai a; Unau si chu hmun dang ram danga an han tlat darh tâkah chuan;
mîzia leh hnam inkaihhruaina dan kal phung pawh a lo phirsi nuaih lo thei tawh
lova; hei hian kan kâr ati hê deuh bûi fo mai a. Chu tak chu he mizorama chêng
nghet sa te hian hneh taka fa û kan lo chan mai hi a ṭûl heavy i ti mai teh ang
aw.
Fa û chuan a nâu te a huikhâwmin a phuar
khâwm a; Inpuia buhchangrum leh se bawng
thâu tak pawh alo barhin lungrualna thu a fah fo pawh angâi a. Ṭawng hran
hrante inkâr khi tûr a lo char phui zung zung tûr ani. A nihna takah chuan 'fa
û' ni bîk tûr kan awm loh rualin Mizo in ti tlat si, tlatna mual hranga
chêngte Mizo ṭawng hmang thei miah lo
tam tak an awm a. Chûng mi te pawh, Hnam dang, ram dang mite'n an hmuh mizo loh
palh vênna atân; Zohnahthlak ṭawng tam tak kan neih thu pawh hi kan mithiam
zâwkte kha'n han au chhuahpui tam ta bawk ula ka ti hle mai. Ni e, hnam pêng
tin hian tlêma rilru intihnat tawn zeuh châng pawh kan nei fo hi pawi ka ti ṭhin
hlê mai a. Mizo kan ni lo, ti deuh fun pâwl an lo awm kha'n mizo anga lo
ngaitute'n nâ kan ti ṭhin a. Hmar
Mizo,kan ni e, Paite Mizo kan ni e, Bawm Mizo, Thadou Mizo, Gangte Mizo, Lai
Mizo, Mara Mizo, Ralte Mizo, etc kan ni
e, tih khan hnam pêng hrangte hming kha Skip miah lovin kan lungdam tlân-na ni
siin akal thei tih kan hriat fo pawh a ṭha áwm e.
Mizo nih tinuam lo tu-ah tû-mah hi i ṭang lovang u. Hnam pung chak lo,
pun hlauh vânga apiang lo zâwnga phe sek
lawi si kan nih nâk alaia, a awm chhunte kan inchemhâr fo mai chuan; A mal mal
chuan Mizo ni tûr bîk kan awm lo va. Hnam hlâwm khat ni tham bîk kan awm lo.
Kristian sakhua ni lo zuitute'n heti khawpa an hnam pun duh a, Sawrkârin birth
Control ti tûra a vaukhân meuh pawha duh ve miah lo Hindu leh muslim ho kan
tluk lo hle.. Pun kan duh, a tipungtu nih kan tum lêm hran lo! Kan nawmsak phah
dâwn emaw kan ti a, chaw kan khawn lo chauh va. Kutdawh State nihte kan la
hlawh ta dah a!! Nuih pawh hi kan ti za bâng love. Kristian kan nihna ṭanga
thlir chuan, kan chhul reh pin hi thiang lo bur tûr zâwk leh, Pathianin min tih
tâwp sak hmâ chu keini hian a tih tâwp hna lo thawk ve sek lo ila.
Kan thlahte Vâna Arsi zât an lo ni ang a,
Pathian kan va tilâwm zâwk dâwn êm!
Hnam dang pawhin, Rizai pahnih leh bêl pakhat chauh nei pawhin fa an
hring kawi duah mai a; an nghei ai chuan rawtuai hmunahte an fasên an paw lût
a. Rawtuai nên Ém-ah an phurh pawlh nawk nawk a- Rawtuai chhumte an ei hawng
hawng a; Damtêin chhûl rêk ping hnam keini tluk thova hrisêlin an lo seilian
tho!! Pathianin engkim chungah ro arêl miau alâwm.
Chuti khawp chuan Pathian nung be lo vê mahin
an pathian an ring ngam a; risk an lâk huai ngam chuan keini Pathian nung
chiang bal neitu hian ngah nge kan rin ngam ve loh! Kan dâwih zek zuk
lutuka, Kan Pathian pawh kan ko êih zo
lo anih hi.
Awle,
Zohnahthlâk tlângtin mual tin a lêng te; Kan hnam hi kan inhlut tawna
kan in unau-na tinghet zual zêl tûrin rilru i siam ang u. Kan rilru tihnual lo
ila, He ramah hian awm la, thil ṭha ti rawh, min ti tu, Lalpa thu awih ila.
Hnam vohbik kan nih hi chakna atân i hmang ila. Kan pun thûr thûr theihna atân,
pun hnathawh lam kha ṭhahnem ngâi ila. Tû mah thin nâ a insiam tawn lovin, kan
vêla hnam dangte hlauh tham, Hnam lian nih tumin i ṭang sauh sauh ang u aw.